VANDUAI VANNEI SI!
(True Story Happened To My Friend In 2010)

"Mazual, mi puitling i ni tawh a, i laka zep chi niin ka hre lo bawk a..." tiin Sawmtei pa chuan muangchang hian a sawi charh charh a. Hospital veranda reh deuh ruih mai, tlakdalna an vuah bulah chuan kan ding dun ran a, rilru hah hmel ang reng tak leh ral hla tak thlir chung hian a thaw leh deuh hak a, a thil sawi tum ber hriat chak tak leh nghakhlel zetin kei chuan ngawi rengin ka lo en ha a. A hmel leh awmdan atang chuan chanchin lawmawm tak min hrilh tur a nei lo tih leh ngaihthlak nuam lo tak chanchinin min deng dawn a ni tih ka hre thiam mai a, mahse, chuti chung chuan, a thil sawi lai kar laka reilote a chawlh det chhung chu rei ka lo ti kher mai.

KA NUPUI HUAL DAMDAWI INAH
Sawmtei nen hian kum 4 lai kan inzui ve hnuin phur takin palaite kan tir a. A chhungte leh keima chhungte chu keini pahnih aimahin an phur zawk emaw tih mai turin an titi tui ber a ni a. Kei hi fapa mal ka nih avangin ka nu leh pa hian mo neih an chak mai bakah 'tu' neih ve hi an chak tawh a, Sawmtei lah an hmeichhe duhzawng mi tak a lo ni leh zel nen, nupui ka nei tur chu kei aiin an nghakhlel fe zawk reng a ni. Mahse, vanduaithlak ang reng takin, inneih ni tur kan ruat fel vek tawh hma kar hnih chauh a awm tawh tihin a dam lo tan a. Dam lo satliah mai mai tura kan ngaih kha a dam hlei thei ta hauh lo mai a, tum loh deuhin damdawi in lama indah luhte a ngai ta hial a ni. Chutiang dinhmuna kan din tak deuh nuaih avang chuan inneih ni tura kan lo ruat fel vek tawh sa pawh chu 'Sawmtei a dam veleh' a innei mai turin thulh loh theih a ni ta lo a ni.

Office ka ban veleh hmanhmawh takin (Tlai tin ka tih dan angin) damdawi in lam chu eitur tuihnai chi tinreng nen ka pan leh a, a ei thei dawn lo tih hre reng mahila, tlemte tal a ei theih tak mialin tiin duhsak takin a tui tha thate chu man to eng ang mahse ka kensak ngei ngei thin. Dahlia par hi mawi a tih tlat avangin ka keng tel ngei ngei bawk thin. (Dahlia hi pangpar zawrhnaah hian a lo vang viau mai, a tirah phei chuan ka zawng nasa khawp mai a, vanneihthlak takin Venghluia ka thiante thian veleh chhawngin an lo nei teuh mai a, chu chu nitin kuang khat te te in ka lei sak a, Sawmtei tan chuan ka kensak ziah thin). Vawi khat pawh office kan buai em avangin tlaia damdawi in ka pan chu, gate ka luh hnuin Dahlia par ka ken theihnghilh daih tih ka hrechhuak thut a, rang zetin ka tlan let leh vang vanga, ka va lei sak leh ngat nghe nge a ni.

'Vawiin hi kan inneih ni tura kan lo ruat lawk ni chiah kha a ni a' tiin office pawh ka bang hma lui a, a tan bik liau liaua a hriat loha rangkachak zungbun ka chher tir chu ka ak ran a, Dahlia par mai bakah Rose par chheh khat lian ang reng tak ka keng tel bawk a. Kan tum loh deuh a hetia hun kan hman tak avangin Sawmtei inthlahrung lutuk chu ka khawngaih a, vawiinah hian innei thei lo mahila, hun hlimawm tak leh special tak, kan hriat reng dun tur hun hlimawm danglam tak siam sak ka duh a. Chubakah vawiin
hi doctor-ten test hrang hrang an neih result chhuah ni a ni a, result tha lam dawn ngei kan inbeisei bawk a ni.

VANDUAINA THUAHHNIH
Damdawi in step-a ka kal chhoh laite chuan ka phur vang nge ni, ka zang deuh vah hian ka hria a. Step hnih thum mai maite chu pen kanin ka kar chho deuh pawk pawk a, ka hmel a hmuh huna a hlim hmel tur mawlh bak ka ngaihtuah theih tawh loh avangin ka kalna tur ka lo en lo bawk a, nu pakhat ka su thu hnawk nghe nghe a. Inthiam lo tak chunga ngaihdam dil paha ka kaih thawh hnu chuan hmanhmawh takin
ka kalsan leh mai a. Chanchin duhawm lo takin pen sawmhnih danah min lo hmuak reng tih hre hauh lovin Sawmtei awmna WARD chu tlan titihin ka pan phei zel a.

Nidang ang lo takin Sawmtei nu leh pa chu kawngka bulah chuan an lo ding dun a, min han hmu chu an pahnih chuan an inmelh deuh zawk hian ka hria a. Engmah ka sawi hma chuan Sawmtei Nu chuan, "Khawi ka lo ken chhawk ang che" tih leh ka thil khai bawr teuh chu min chhuhsak a rual a, "A ngai lo ve" pawh ka ti hman lo! A pa chuan ka dara rawn vawn pah hian, "Mazual, saw lamah sawn i phei lawk teh ang" a ti a, a kal nghal a. Kei chuan a ngaihna hre lo zet leh hrilhhai ang reng takin a kalna lamah chuan ka zui phei ve nghal a.

Damdawi in veranda hungna thir inphan phei chu a vuan a, hmun hla tak thlir niawm takin a hawi vang vang a, a thaw deuh halh halh hian ka hria. A bulah chuan ka va ding ve a, "Ka pa Mawi, eng nge ni ta ? Eng thil awmzia ni ta le?" tia hlauthawng taka ka zawh chuan, ka lam a rawn hawi a, ngun taka min en hnu chuan, "Mazual, mi puitling i ni tawh bawk a, i laka zep chi niin ka hre lo bawk a..." tiin thu ngaihnawm loh zet chu min hrilh ta a ni. "Hei, Sawmtei result a chhuak a, pehhel kual lovin han sawi tlang nghal dawt mai ila, a chhul paih sak ngei ngei a ngai dawn a..." a ti chiah chu ka bing nghal mup mup hian ka hria. Ka ngaihtuahna te chu a tawi nghal tuk a, ka khawhmuhte pawh fiah lo nghal ruai hian ka hre bawk a.

TAHNA RUAMAH
Ka mitthlaah chuan Sawmtei'n amah avanga kan innei thei ta hrih lo pawi a tih zia leh a inthlahrun zia ka bula a sawi siam siam laite chu a rawn lang a. 'Fa kan neih hunah mipa nge hmeichhia i duh?' tia min zawha rang fahrana 'Mipa le, mipa nge nge' tia ka chhan dante chu a rawn lang chuaih chuaih a. Nui san san chunga, "Mipa pawh ni se, hmeichhia pawh ni se, kei chu ka duh ve ve. Nangmah nena kan fa a nih phawt chuan uite pawh ni se pawi ka ti lo" tih fiamthu pahah a nui ri har harte chu ka bengah hian la thangkhawk raih raih hian ka hria a. "Tak takin mipa leh hmeichhia tih te chu sawi a la ngaihlei nem, Pathian malsawmna vek a nia, a enga mah hmaa duh lo thlante chu a chi dawn em ni ? Fa kan nei thei dawn nge dawn lo tih pawh kan hriat loh hi! Pathian thu thu a ni e tiraw... Mazual" a tih ri te chuan ka thinlung chhungril chu a deng ri nawn awn awn a.

Chu hun reilote chhung chuan ka rilru chuan hmun tin hmun tang a dap a, helai atangin hmun hla tak kum tam tak hnua ka la tawn tur chauhte thlengin min hruai a. 'A pa... a pa.. a pa...' tia min ko ve tu tur ka damchhunga fa ka nei ngai lo turte ka dawn thlen meuh chuan ka hnim ruai ruai hian ka hria a. Ka mitthlaah ka nu leh pate, 'tu' awt em em hmel a rawn lang a, 'A pi a pu..' tia ko tu tur nghakhlel taka an lo thlir ve laia 'tu' hmel an hmu ngai reng reng lo turte chu ka ngaihtuah zel a, engtik laiin nge ka mittui a lo luan tih ka hre hman lo. Ka thiante hovin an fa u ber hming kohva an hming an han invuah velte chu ka ngaihtuah chhuak zel a, 'Vanlalhumi Pa, Mawizuala Pa, Zoremi Pa' tia an han inkoh vel laia ka damchhunga fa u ber chu sawi loh, fa hming koh tur pawh ka nei ve ngai lo turte chuan min va han vel chiang tak em! Mipa, mipaah pawh mahni inenkawl thei mai pawh ni lo, midang pawh enkawl thei khawpa puilting ve tawh nia inngai si chu ka biangah hian dan rual lohvin mittui a luang zung zung a, ka ngam loh Khuanu rel vanduaina chu ka hmachhawn miau si a le!

Mahni inkhawngaihnaah ka lut a, Sawmtei ka hmangaih em avanga min duh der ve em emtu nula hmeltha leh fel tak takte ka lo hnar tawh zawng zawngte hmel chu ka mitthlaah a indawtin an rawn lang a. Tunah pawh hian fapa mal ka nih avang leh kan chhungkaw dinhmunte, ka hnathawh leh khawtlang mi hmingtha ve tak ka nih avangin, Sawmtei lo pawh hi ka hmu teuh dawn tih ngaihtuahna tha lo chuan min rawn luah a. Sawmtei hi nei lo ta mai ila, a chhungte pawhin min hrethiam mai ang a, amah Sawmtei ngei pawh hian min hrethiam thei ngei ang a,nge a thei kher dawn em ni le titein ka ngaihtuahna chu a insual nasa hle a.

'Kan va han vanduai tak em! Mi tam takin fa enkawl sen loh an nei a, sikul thaa luh tirna tur pawh nei hlei lovin football team khat daihte an neih laiin keini ve chuan pakhatte pawh kan nei thei dawn si lova. Eng thil sual nge maw kan tih tak le ? Pathian pawi kan sawi ta em ni ? Ka hnathawhnaah pawh ka phak tawkah rinawm leh taima takin ka thawk ve thin si a, eiruk tur tam tak pawh Pathian avangin ka lo hnawl ve tawh a, ka rinawm tlat avangin ka hmelhriat thenkhat eiruk tumte hmaisen pawh ka lo tawrh phah ve thin tawh a ni lawm ni! Pathian malsawmna dawng tlak lo turin eng nge maw kan lo tih dun le. Biak In hawng ngeia inneih kan tum tlat avanga kan invawn thianghlim dun ve lai leh he hun ropui tak tawng tura kan lo insum ve tang tangnate kha a va sawt ta si lo ve! Aw Lalpa, i rorelna hi a lo va mak ngai em!' tiin ka felna lai leh ka thiltih thatte chu chhuang ru tak chungin Pathian lakah ka vui tan a, ka thin a rim a, ka rilru a na ngawih ngawih bawk a, ka lungchhe lutuk chu tah hlawp hlawp mai hi ka duh hial a ni.

AW NEM ZAIDAM, VANNEIHNA MIN THLENTU
Chutia ka inngaihtuah kun reng lai chuan ka thinlung chhungah hian aw nem zawi dam dap hian, "Sawmtei hi i hmangaih em?" rawn ti hian ka hria a, rang takin, "Aw hmangaih e, ka hmangaih tak zet a ni" tiin ka chhang nghal a. "Khawvelah hian inhmangaih tawn em em innei ta hi an vang khawp asin! Kan hmangaih berte hi kan nupui pasal an ni thei lo fo thin a nia. Mi vannei bik tlemte te chauhin an hmangaih berte an nei thin asin" rawn ti leh tlat hian ka hria. Ka phu zawk a, ka harhchhuak nghal huai hian ka hre bawk a. 'Hmmmm... a dik, Sawmtei hi ka hmangaih, ani pawhin min hmangaih, kan inhmangaih tawn tak zet! Hmangaih berte nupuia neih theih tluka hlu leh ropui a awm thei dawn em ni ? Inhmangaih tawn em em innei ta lo tam zia ka hria, hmangaih ber te nei thei lo mi engzat nge tunah hian he khawvelah hian awm mek tak ang maw...!? Kei chuan ka hmangaih ber mai nupuiah ka nei thei dawn a, ka vanduai emaw ka tih laiin ka lo va han vannei tak em! Tunah pawh hian kei aiin a thil tawn hi hrehawma ti zawk daih ang, na a ti zawk bawk ang. Chutih laia rilru dik lo ka lo pu ringawt hi chu ka va a tak em! Chu lo rengah a thiam lohna pakhat mah a awm lova, hrehawm ti taka hun a hman lai hi ka hmangaih zia lanchhuah tirna tur chu a ni dawn lawm ni ?' tiin chu aw nem dam diai ka hriat chuan ka ngaihtuahna zawng zawng chu min rawn thlak sak hlawk a, kan chunga thil lo thleng chu VANDUAINA atangin VANNEIHNAah min rawn leh sak ta hlauh mai le!

"Aw Lalpa, he khawvelah nula leh tlangval tam tak, mahni hmangaih berte nei thei loh avanga mittui nena nun hrehawm tak hmangtute leh harsatna chi hrang hrang avanga tap zawih zawih chung leh rilru na em ema duh berte nei theih loh avanga beidawnna khura indawm kun reng mekte awm laia kei ve te hian ka hmangaih ber mai Sawmtei nei thei tura min siam avangin ka lawm e. Ka VANDUAI hle emaw ka tih laiin khawvela mi VANNEI bik tlemte te zingah min tel tir si a. Khawngaih takin kan inhmangaih tawn reng theih nan mal min sawm dun ang che" tiin rilru tawngtaina nen Sawmtei pa, engtin nge ka chhan dawn tih ngaichanga min lo en rengtu chu kalsanin ngawi rengin kawngkhar lam chu ka pansan a.

Hlim rilru tak leh 'Big Surprise' siam ngei tumin a zungbun ka pek tur dahna bawmte ka kekawr ipte chhunga mi chu zuk khawih rauh rauh pahin WARD chhungah chuan ka lut ta a.

(Hming ho khi hi thlak danglam an ni e.)