PHATSANTU TENAWM!

Ka thian tha ber nia ka lo chhal ve thin Mawitea chu ka sawm a, phur zet leh hmanhmawh ru ang reng takin taxi stand lam chu ka pan pui a. Stand-a lo ding hmasa ber chu ka kal duhna lam ka hrilh a, a rate ka zawt zui nghal bawk a. A rate a sawi zawh rual rual chuan dawn hniam pawh tum eih lovin "Kan hmanhmawh deuh a" tih leh a chhunga thut luh ka rual a,ka phur leh nghahhlelh tawh em avangin taxi fare chu to pawh ka ti phal lo.

Ka bag puar ul chu ka pawm hlun a, a chhungah chuan ka hmangaih ber ta tur thil tam tak ka thun teuh a. Chhungte thil min chah pawh pawisa neih loh chhuanlama ka lei theih loh laiin ani ta tur erawh chu a tha ber leh to ber chi ka lei thei zel a. Ka u fate thil tur pawh ka lei theih mang loh laiin ani ta tur erawh a mawi ber chi leh nalh ber chi ka hawn sak thei zel bawk a. Ka bag chhungah chuan ka Juliet-i ta tur thil mawi leh hlu tinreng hi a awm kim a ni ngawt mai.

Ka mitthlaah chuan kan inhmuh huna a awm dan turte a lo lang a, ka hmel a hmuh veleh hlim takin a te chul ang a, ka thil hawn sakte ka phawrh hunah phei chuan lawm avangin a te chel chul ngei ang, min kuah nawk nawk duh hialin ka ring. Ama ta tur mai nilo, a nu leh pa, a nau ta tur thlengin ka hawn sak vek si a, an lawm nui ri turte chu ka bengchhe ri nge maw ni, ka hre lawk thei deuh hialin ka inhria. Chutiang ringawt ka lo ngaihtuah avang chuan Mawitea min biaknate leh kan taxi chuanna in kan hma lawka 407 tuiphur a su tep te pawh ka lo hre mang lova.
Ka rilru ngawt ka lo kawm lai chuan an kawt kan lo thleng der tawh a. Kan chhuk fel sawk sawk a, an in step chhoah chuan a tlan hian ka tlan chho titih a, ka hnungah Mawitea'n hmanhmawh zetin min rawn zui ve bawk a. Surprise ka duh avangin an ina ka kal tur pawh chu ka phone lawk duh miah lova, rin loh deuha min han hmu thut tur leh a hlim te thawm, au chel chul tur ka hmuh chak avang a ni ber bawk a. Thaw huam huam chungin an kawngkhar chu ka kik a, ka phur tawh lutuk chu an rawn hawn hmate chuan ka din dan ka lo thlak sek hman a.

Kawngka a ri ta rak a, a rawn inhawng a, Rintei nu a lo ni a, confi deuhin "Eeee...in lo dam maw?" tih pahin chibai tumin ka kut kan lek chhuak a, a ni pawh chuan a rawn lek chhuak ve nain a hming maiin a rawn lek chhuak a. "Dam e, i lo haw a ni maw?" a ti a, en pawh min en lem lova, 'a nu chu a ze ngai bawk a la pu a ni maw' ka ti rilru a, ngaihthat lohna turah pawh ka ngai lem lova. "Dam e, hei vawiinah ka rawn haw a, khawnge Rintei hi ?" tih pahin inchhungah kan inzui lut a.

"A room-ah a awm aniang, lo thu r'u, ka'n ko ang e" a ti a. Hmana ka kal dawn zana kan thutdunna ngei chu a lo la danglam lova, tah ngei chuan ka bag puar ul mai chu ka nghat a, ka thu ta a, ka bulah ngawi rengin Mawitea a rawn thu ve bawk a. Ka'n hawi kual vela, an in chu hmana mi nen khan danglamna hmuh tur a awm pawh ka hre lova, 'Dam chuan kum khat lek te chu a lo rei lo hle mai a' ka tih rilruk lai chuan, "Thil a ti laklawh lawk a, a rawn chhuak dawn,lo nghak ru" a nu chuan a rawn tih chuan ka phu deuh zawk. Ka mitthlaa ka lo beisei lawk nen chuan a in ang lo tan ta phawt mai a, ka thin a rim deuh nghal phat a. Ka awm tih a hriat veleh a rang arangin a rawn hlim takin a rawn zuang chhuak ve nghal tura ka ngaih laiin chutiang a ni ta hauh lo mai a.

Sitting room-ah chuan Mawitea nen chuan ngawi rengin kan thu dun rauh rauh a, thuthlengsei ban kan zut kan zut dun a, sawi tur vak awm hek lo, a rei duh khawp mai. A rei tak fu hnu chuan keimah ngeiin va vin chhuah vak mai hi ka chak tawh a, mahse, ka insum hram hram a, a tlawmthlak deuha ka hriat avangin kan lo la nghak hram hram a. 'Rintei chu eng nge maw a tih le ? Eng nge maw a awm zia le? A nu lah kha khawnge maw a kal daih le?' ka tih rilruk lai chuan kawngkhar a rawn ri rawk a, 'A nu a niang, koh tir leh ila, a rawn chhuah la chhuak lo a nih fo chuan, keimah ka va ko chhuak tho tho ang' tia ka lo ngaituah mek lai chuan tlangval ngo lampang hi tlangnel hmel zet hian a rawn lut phar phar a.

Kan bulah chuan chapo hmel zet hian a rawn vei thar thar a, a hmel ka ngei sa nghal tawh nak alaiin thingtlang lama Rintei chhungte rawn zin ni turah min han ngai nghal ngawt a, zin haw hlim pawr deuh hlek ka lo nih avang leh ka bula ka bag dah puar ulte avang chuan a awm ve tho e. Amah ka huatna ti zual turin Rintei room-ah chuan a va lut tlang nghal purh a, ka insum zo ta ngang lova, "Mawite, kal ang" tih leh thawh ka rual a, an kawngkapui kan thleng tep tawh tihah chuan Rintei chu a rawn chhuak a. "In haw dawn a mi ? Hei kan dine-out dawn a, ka lo insiam laklawk a" a rawn ti ringawt a. Ka hawi let a, a hmel ka hmuh chuan ka thinurna chu inbengdaih har ka va ti em! A hnungah ka ngei deuh pa kha Rintei chu kuah ti tih deuh hian a lo ding bawk a, thil awmzia chu ka va man thiam nghal vek,"Phatsantu tenawm" tih paha va reh nawk nawk mai ka duh a, mahse, ka inthing harh nawk a, ka lehhawi a, tawngkam khat pawha chhang lovin kawngkapui chu ka hawng a, Mawitea nen chuan kan chhuak dun ta.Ka tih theih chhun chu ring taka an kawngka khar thuai a ni tawp mai, ka va khar na tak em!

Phai lama lehkha zir tura ka chhuk dawn zana kan awm dante chu ka mitthlaah a rawn lang uarh uarh a. Ngawi rengin kan pahnih chauhin an sitting room-ah kan thu dun a, sawi tur ber pawh kan hre lo, in zin san ngai hauh lo kha a kum leha haw tur chauhin a vawi khatna atan ka kalsan dawn avang khan hrehawm kan ti dun em em a, kan lung a leng lawk a, lung a leng a ni satliah lova, kan lung a chhe dun a ni ber mai. Ani phei chu a mittui hi a tla deuh reng mai a, a inhnit leh hraih hraih thin.

Dar 12 a lo ri a, sitting room-a ngawi renga kan awm avang chuan a nu ngaihtha lo chuan aw a rawn thian deuh sek mai bawk a. A tawpah phei chuan zung turin a rawn tho chhuak ta nghe nghe a, a va zung a, a mu leh a, ka la haw si loh avangin, a hnu reiloteah an uite chhuanlamin a rawn tho leh a. Tah zet zawng, a inthlahrun thlak zozai ka tih tawh em avangin la thlahlel hle mahila haw zai ka rel mai a ngai ta. Mahse, mawngin zung a kaih ta tlat ang maiin thawh kan a va har ve, kan in en a, engmah kan sawi lo, kan mit leh mit chu a intawng a, inthen mai chu harsa kan va ti tak em! A kut ka vawn sak a, ka thlah hlei thei lo, han pawm lawk a, han kuah leh vawng vawng chu ka chak teh lul nen, a nu lah chu a vei tawn deuh sek tawh mai si a. Sana ka han en a, dar 1 leh minute 20 a lo ni tawh a.

A nu bedroom lama a luh lai chuan pawnah min rawn thlah a, an verandah light kan off a, chutah duhthawh em emin kan inkuah ta vawng vawng a, ani lah chu a tap zawih zawih a, "Khawngaih takin kal lo mai rawh, min kalsan lo mai rawh" tih paha a inhnit hlawp hlawp takah chuan ka ticket lak chu cancel leh theih nise ka va ti tak em! "Dam takin kan inhmu leh dawn alawm, rinawm takin lo awm la, keipawh rinawm takin ka awm reng ang" tih pahin duat deuh maiin ka chul heuh heuh a. "John, i tan ka rinawm reng dawn alawm, khawvelah hian nang lo chu hmangaih ka nei lo, ka duh ngai bawk hek lo ang. Ka damchhungin ka hmangaih ang che" a ti a, min en a, "Ka tan i rinawm reng thei ang em, John, mawh, John, i rinawm reng thei dawn em?" a ti zui a. Kei chuan, "Teh reng mai, khawi hmunah pawh awm ila, i tan chauh ka rinawm reng ang" ka ti a. "Anih min tiam rawh" a tih chuan "Thu tiam hi ka duh lo khawp mai a, kan tiam nasat poh leh kan bawhchhe nasa thin a. Mahse, ka hmangaihna che ah hian ka chiang a, chuvangin ka tiam thei ang che" ka ti a, ka ngawi dat a, "Rinte, i tan ka rinawm reng ang tih ka tiam a che" ka ti a, a aia nain a kut chu ka hmer a, ka lamah ka pawt hnai sauh a, "Ka lawm e, keipawh i tan chauh tiin ka tiam a che. Rinawm loh ai chuan thih ka thlang zawk" tih pahin thlamuang hmel em em hian ka awmah a rawn bei hnap a, a sam ngil sei siau mai chu ka zut sak neuh neuh a.

Kawngkhar riah kan phu rual thawt a, kan inthlah rang ngei mai. A nu rawn chhuak chuan, "A tlai tawh lutuk, John-a, haw tawh rawh. Lalrinsang, nangpawh lo lut tawh rawh" a rawn tih meuh chuan engmah sawi ngamna chi a ni tawh lo, lai deuhin ka ding a, ani chu inchhungah a lut a,hnunglam atang chuan Rintei chu a tap ani tih ka va hrethiam nghal mai a, ka van khawngaih tak em! A nu chu ka ngei kher mai,'Rei tak ka awm bosan dawn a, min hriatthiam ve awm a nia, ani pawh a nulat lai chuan a lo tawng ve tawh ngei awm si a, a va'n hmelchhe reuh tak' ti rilru nauh nauh pahin an gate ka chhuahsan ta kha a ni a.

Kum khat hi dam chhung a an lo ti ta em ni ? Rinawm tura intiamna mittuite kha awle mittui mai em ni a lo nih reng ? Hmangaihna hi mit hmuh phakah chiah em ni a lo awm ngai le ? A tana ka lo rinawm ve thinna zawng zawng te chu tun darkarah mai khan engmah lo a lo ni tih ka hre ve chiah a, duhsakna tinreng nena ka pawisa neih chhun ang anga a thil tur ka leisak laite ka mitthlaah a rawn lang a, ka bag ah lai chu ka phelh lawk a, kawng thlang kham sang lai bera ka vawm thla ta nawl nawl a, ka bag dum thla nul nul chu zui ve mai tuma ka insiam rem lai tak chuan Mawitea chuan min lo dawm bet hlauh lo sela chu ka chan tur chu a sa lai district a ni tawh ngei ang!

Kan chak loh lai ber pawha khawngaihna leh lainatna nena min lo chelh reng thintu engkimtithei Pathianin ka nunna hlu tak min la zuah sak avangin tunah erawh chuan hei hi ka sawi ve thei ta, "Rinte, ka rilru leh thinlung na taka i hliam avangin ka lawm e. Nang hi lo la hmangaihin lo la duh tlat che ila chuan tuna min hmangaih em em tu, ka nihna engkim min pawmsak thlaptu leh engtik lai pawha ka tana rinawm reng hi ka tawng awm si lova. Kan hmangaih chauh ni lo, min hmangaihtute lo hlut zia min hriattirtu i ni avangin ka lawm e"