DUHAM CHU CHANNA LEH MUALPHONA!

Tleirawl luck lai a ni bawk a, hmangaihna te lah chu a phuk a phak pawh hre lem lovin 'Ka hmangaih che' tih mai mai te chu kan 'Khawi maw, i sahdah chu..' vel mai mai a. Min duhtu apiang duh ve zel vang pawh ni chuang lem lovin a rualin hmeichhe pathum lai mai chu 'Ka'n hmangaih' tehreng a nih kha! Thlathum vel lai kha chu an pathum tan ka'n rinawm em em mai mai khawp a! Veng hran daiha awm an nih hlawm avangin a tirah chuan han bum kual vel kha chu a harsa lem lo khawp mai a. Pakhat phei chu hostel-a a awm avangin hna a ti awlsam leh zual.

GIRLS MANAGEMENT
No.1 kha chhun lamah ka'n bazar pui darh darh a, induh hmel em em khan mi zingahte khan kan inkai hnak hnak a. 'I tan chuan engpawh..' ti niawm fahran khan a thil duhzawng ka'n thlan tir vel a, mahse, a tawpah to vak lo ka leisak ta thin a. Haw hma deuhin restaurant romantic (biru deuh) bera ka hriat, mahse, changkang em em loah ka'n chawlhpui leh a. 'Care' tawkin an in thleng ka'n thlah leh thlapa, zan lamah lehkha zir emaw hnatlang emaw a awm chhuanlamin ka len hman loh thu ka'n hrilh leh te te pahin kan in 'Chawei tui, bye, love you..' ta thin a ni.

Zan lamah No.2 te run lam ka bel ve leh ta thung a. Chhun lama ka buai thu leh ka ngaihthute kan hrilh malh malh a. A thian mipate lakah ka thikthu ka'n tichhe ngei bawk a. "Annite chu thik chi an ni hlei nem, thian tak tak alawm.." a tih pawh khan ka ti tau lui deuh ngat ngat thin. Min rinhlelh hmain ringhlel let daih ila kan lang rinawm hmel tlat allawm! Chuan ka phone kha silent mode-ah ka dah ngei ngei bawk thin. Dar 10 a rik chuan ka haw a hun tih ka hria, phal lo viau mahse ka haw lui ngei ngei thin.

Dar 10.30 vela in ka thlen chuan No.3 biak a lo hun leh chiah chiah tawh a. An hostel-ah 10.30pm light down a ni a, a phone ken luh ruk kha a phawrh ve leh thei chiah tawh avangin No.2 dar 10pm a ka haw san ngei ngei thin nachhan kha a ni reng a. Ngai awm em em leh a thlum thei ang berin sazu buh chip ri ang maiin sms chhuin ka han rik pui leh tlat tlat a. Chumi pah chuan good night message tha tak tak ka lo save sa kha No. 1 leh No. 2 te kha ka'n thawn pah nghal bawk a. Tichuan, sms kal tlanga ka'n 'muahh..' kim vek hnu chuan mut a lo hun tawh hle thin. Luck inti em em leh zei inti zet khan ka muhil ta thin a ni.

DOUBLE TROUBLE
Thla thum vel lai chu harsatna em em pawh nei lovin inngeih em em vang pawh nilovin kan awm tlang dial dial a. Top up leh sms ka heh deuh tih loh chu buaina em em hranpa pawh ka nei hrih lova. Mahse, thla lina a rawn inher chhuah meuh chuan 'DOUBLE TROUBLE' a hnai ta. Buaina satliah mai pawh a ni lo, manganna tham tak tak a tling ta! No. 1 leh No. 2 te chu kum thum zetin an inthlau nangin an birthday a in ang tlat! Ka inthiam lohna lai ber chu 'Tinge birthday in ang kher kher ka lo thlan le aw..' tih a la ni chauh mai!

Birthday card sweet thei ang ber pahnih ka'n lei phawt a, pakhat chhun lamah ka pe ang a, pakhat zanah tiin ka rilru ka siam a. Mahse, ka plan ang chuan thil a thleng dawn ta hauh lo, an pahnih chuan 'lunch' ei an rawn phut ve ve tlat mai! Val Zeia hi ka buai ta nak mai le.. Pakhat zawk chawhma lamah ka ei pui ang a, pakhat zawk chawhnu lamah a ni tawh mai ka la ti ta fan a. Tichuan, a hun lo thleng phawt se, ka 'manage' leh thei mai ang ti rilru chungin hlauhthawnna pawh nei em em lovin chu ni ropui lo thleng tur chu ka nghak a.

Wish hmasa bertu nih tumin zan dar 12.00 a rik chiah chuan Birthday Wish sms mawi ber nia ka hriat ka lo save rauh rauh chu an pahnih chuan ka thawn ta a. No. 3 ka mangtha zo chiah kha a ni a. Inhre tawn hauh lo khan an ni pahnih chuan lawm em em hian message romantic tawk min rawn thawn let bawk a. Ngaih tha takin a tuka fimkhur taka chet tum ran chung chuan ka mu ta a.

TRIPLE TROUBLE
Ka lukham hnuaia ka phone dah rawn ri chur chur avang chuan ka harh zawk a, enchiang mang hlei lo hian ka'n pick up a. "Hallo" "Hallo, bawih, i la tho nang nge ? Hei dar 9 velah ka chhuak thei dawn a, vawiin chu inhmu ang aw.." rawn ti heu mai le! Ka tho zawk a, ka phone ka'n en chiang a, No. 3 lek chu niin! "Eng a ? Engtin maw i tih ?" "Vawiinah kan warden-in chhuah min phal sak a, zing chawei kham veleh ka chhuak dawn. Tlaiah dar rukah ka lut leh ang, min bazar pui rawh aw.." a rawn tih leh chuan ka harh kawk kawk mai hian ka hria. Chhan ngaihna ka hre tawh si lo, "Awle" ban deuh hian ka tia, ka rilru erawh chuan "Not today, babe" a ti chuai raih mai.

Val zeia rilru hi a buai tak zet tawh, tukhum hiah bak tihngaihna vak ka hre tawh lova. 'Vawiin chu mipui kan tam deuh a ni! Engtin nge niang aw.,,! Nikhat hi darkar 60 vel nise aw..! Engtin nge mi pathum ka 'manage' tak ang le ? Ka zin daih zawk dawn mawn le aw..' Thluak chuan hna a thawk mawh riau tawh, fin a tawp tlat! 'Chhungte dam lo hnaivai an awm em aw..? Thingtlang khaw hnai deuh lehlanna tur a awm ang em aw..? Emergency thil tha deuh ka nute hian min tirhna tur an hre lo maw le..?'

Mahni phak tawkah rilru ngaihtuahna chuan kil tin kil tang a dap rauh rauh a. A tawpah chuan ka fin kherekna zawng zawng sawm khawmin dam loh dera 'Khawsik sang tak' neih ka tum ta a. 'E.. a ni leh thei lo, khawsik thut chu a awih awm loh em mai, 'pumna' in thlak leh zawk ang' tiin ka plan chu ka thlak leh ta a. Chawei khamah ka thil ei fuh loh avangin ka pum a na em em dawn a nih chu!

TROUBLE MANAGEMENT
Vawilehkhata a ruala ka hrilh vek chuan phone a busy ka hlauh avangin a indawt te tea hrilh ka tum ta a. No.1 chu ka pum a nat thut thu leh khum atanga ka thawh chhuah peih loh thu sms-in ka va hrilh ta a. Ka rin lawk ang ngei hian rang zet hian a rawn call nghal a. Pumna awm em emin ka lo rum vel a, chhang pawh ka chhang tha peih lo, a sawi apiang chu ka 'mmmm..mmmm..mmmm..' zel a. Min han khawngaih em em khawp a, a tap lo chauh hi a ni ringawt a. Tichuan, No.1 chu engtin tin emaw ka dah tha thei ta phawt a.

A phone a dah chiah chu rang zet hian No.2 ka va message leh a. No. 1 ka tih ang bawk khan 2 leh 3 te pawh ka dah tha thei ta a ni! Ka rilru chuan ka plan chu fing ka'n ti khawp mai a, ka dik lohna leh ka tenawm zia lam reng reng ka ngaihtuah pha lo. Ka sawi hmaih daih chu hetih hun lai hi chawlh a nih avangin chhun lamah tih tur vak ka neih loh lai a ni ve hrim hrim a. 'Vawiin chu inah nilengin ka tawm mai ang' ka ti rilru a, thlamuang takin computer ka on a, buaina nei lo ang hrimin ka hla play chu ring zet zet hian ka zawm bawk a.

REAL TROUBLE
Chhunah nilenga ina ka awm ngai loh avangin ka ning deuh chuan dawrah kuhva leh cigarette ka zuk lei a. Minute 20 hnu velah inah ka let chho leh a, stepah te chuan a hma lawka ka hla play chu sa in ka zai chho lawng lawng a. Engin nge min lo hmuak dawn tih hre hek lo le, thawveng em em hian ka lam chho deuh ti tih a.

Tichuan le, kawngkhar ka'n hawng chiah mai chu ka phu nasa kher mai! Ka rin phak leh beisei loh lutuk chuan min lo hmuak tlat mai le! Tawng nachang pawh hre lovin kawngkhar bulah chuan ka ding reng ringawt a. Kan thuthlengah ngei mai chuan No.1 chu a lo thu vang mai a, a hma dawhkanah chuan polythene hian eitur niawm tak hi a infun teuh bawk a.

Ka pumna min rawn kan a tum ngei a ni tih ka hre thiam mai a. "Tinge..? Eng nge..? i lo kal ?...Aaah tinge i lokal duh a, ka tha tawh alawm.." ka tih bah nuaih mai a. Ani chuan, "I mut daih ka ring a, phone-ah pawh ka rawn hrilh lawk duh lo che a. I pum a na maw ka tia..!?" hrethiam lo hmel zeta min en chung hian a ti a. A bula va thut pah chuan, "Nia, hei damdawi ka ei a..." ka tih lai chuan ka damdawi ei hming min zawt ang tih ka hlau kher mai, "...ka dam deuh tawh a nih hi. Ka mu ning lutuk a, intih harh pahin dawrah kuhva ka zuk lei lawk alawm le" ka'n tih chuan a awih ve hmel ta deuh va.

"Ti rawh, ka roomah phei ang" tih pahin a banah ka kai a, kan nula awmpui hnenah chuan "Tlingi, thingpui min lo siam rawh aw.." tih pahin polythene chu ka khai nghal bawk a. Tichuan, ka room lamah kan inzui phei ta a. A card tura ka lei ka pek hnu chuan kan hlim dun ta hle a, thinrim lam a lang tawh lo hrim hrim. Card dang nalh deuh ka la nei tih a hre der si lova, a 'manage' leh theih mai lawm ka ti rilru a.

Kan hlim dun vanglai takin choka lamah thawm a awm tlat mai a. Hmeichhe aw hian, "Mapuia hi a awm em ?" a rawn ti a. Ka thin chu a phu nghal dup dup mai, 'Karei leee..h!! Tunge ni ta ang le ? No. 2 a ni hlauh ang em aw..ni lo hlauh se aw..!' Lungphu a rawn rang thut a, ka phi nghal chung bawk a. No.1 lah chuan mak tih hmel zet hian min lo en kar bawk a. "Chu chu tunge a ? Tunge..tunge ?" a lo ti ve sek bawk a. "Chu chu lawm kei pawhin ka hriat duuuuh.." tia vin nghek mai hi ka chak a.

'Aaa leee..Ka hlauh ang ngei ngei chuan No. 2 a lo ni chiang kher mai!' Tlingi lah chuan, "Mapuia maw ? Aw, awm e, a lum(room)ah a tiannu(thiannu) nen an awm dun.." a ti ta mai a le! Khawvel hi chim phut se ka va ti em! Anih loh leh spiderman-a chan thut a, ventilator-a inkah chhuah daih mai ka va chak tak em!

Ka bula mi lah chu a meng rum nasa tawh mai a, a tum buau bawk a. 'Ka va chhuak dawn nge niang aw..' tia ka inngaihtuah lai tak chuan...'chhei lee.. ka room kawngkhar a rawn inhawng ta! Aaa leee.. ramhuai a lo lut a ni ringawt alawm le!!!'

No. 2 chu ka room kawngkaah chuan a rawn lang heu mai le! A phu chiang ngei mai! Ka bula mi nen chuan an in men phawk siak a ni ringawt hian ka hria! Inthurual ni awm fahran hian mak tih hmel em em hian ka lam an rawn hawi rual a, hrethiam lo hmel tak leh thinrim hmel em em hian min melh dun ta reng mai a!

Chemtatrawta thawnthua kaikuang ang mai khan sawi tur reng reng nei lovin ka melh tawn dun vel mai mai ringawt a. Ka kuna ka chal ka tuai ka tuai a, ka tukhum nen ka tuai chhawk vel mai mai a. Hnar chu mit bulah a awm lurh lurh mai a ni!Ka zak lutuk chu ka sa up up hian ka hria, thlawh bo san daih thei se ka va ti tak em!

CHICKS FIGHT
No. 2 a rawn tawng chhuak ta! "Hei tunge ?" tih pahin ka bula mi chu a kawk siah a. Ka chhan hma hmain,No. 1 chuan, "Nang kha tunge i nih zawk?". "I va zak thei lo tak! Tunge i nih a?" "I zak thei lo fe zawk..!" tih pahin No. 1 chu a ding ve ta hluai a. Thinrim engphiarin tawngka nen chuan an inbei ta siah siah mai a, kei lah chu an sirah ngawi rengin ka lo dingkhawng reng a. Sawi tur reng reng ka neih loh mai bakah thil han sawi ngamna chi a ni lo hrim hrim. Pakistan sipai leh India sipai indo mai tur inep ut, boruak alh phut mai thei hi ka lo tehkhin hman pek a. Buaina kaikuang ber kei chu ka leh awl ta daih mai a!

No. 1 chuan ka card pek chu a rawn phawrh chhuak, "Hei eng nge en teh? I dawng ve em ? Zaktheilonu!" tih pahin chhuang hmel em em hian a rawn lek chhuak ta. No. 2 chuan eng mah pawh sawi lovin card chu a pawhthlak sak lawk a, ka hmaah tak chuan rawn dingin a pawtthler ta kawk kawk mai a.

Ka roomah chuan birthday card man to chi nalh zet mai them chu a darh ta nuaih mai a. Chutah le, karei! ka hmaa hmeichhe ding chu a dak ta awrh mai a, No. 1 khan a samah hnung lam atangin a rawn tham a, a pawt vak chu niin! Aaa leee.. action action action... action hlang a ni ngawt mai!

An pahnih chuan an inkek dun ta bawrh bawrh mai a, "Tenawm nu..Zaktheilo nu..mi hur nu.." an te tuarh tuarh a. Kei lah chu tih vak ngaihna pawh ka hre lo, ka lo vir kual ve chung a, "Hei..hei..hei.. inthlah tawh ru.. inthlah ru.." tiin ka lo chiau ve chul a. Ka tawng chu hre awm pawhin an lang lo, chhuatahte chuan an thal dun tawp tawp mai a. A chunga tang zawk ka pawt tho dawn a, ka pawh sawn veleh pakhat zawkin a rawn bei leh a. Ka mangang kher mai, "Khawngaih takin..plizz plizz..inti tawh suuuuuuuuuu..." ka ti chul a.

Kan thawmah Tlingi a rawn tlan lut, "Engati nge..ti nge aaa.. ti nge aaa.." tih pahin min rawn pui a. No.2 ka pawh sawn laiin ani chuan No.1 a lo man bet ve bawk a. An la inkawk siah siah a, tawngkam chhe tinrengin an la inbei zui a, la incho tak an ni. Hmeichhia hi an va lo chak ngai em! Pawngsual tih tam takte pawh hi an duh ve reng em ni chu aw.. ? An duh chuan an lo chak kher mai a, mipa tan pawhin chai tham fe an lo nih hi!

ROYAL RUMBLE 3 ON 1
Chutah le, a aia rapthlap zawk a thleng! Tlingi emaw ka tih kha, Tlingi a ni awzawng lo mai! Hostela awm No. 3 kha lo ni rengin! Ka va enchiang chu bazar haw tih hriat tak hian bag a ak ap a, kawngka bula dawr lian polythene thar tih hriat tak puar al chu ka va hmu tel bawk a. Chhai raw...leh..! Ka room chhung ngeiah chuan kha leh chen ka lo bum kual, thiam thil chi tinreng phakar leh tenawm taka ka lo vawrh khum thin, ka lo hmangaih em em, "Nang lo chu!" ka lo tih theuh te nen chuan kan han awm ho teh reng a nih chu! Tunah tak chuan ka room chu Zawlnei Daniela an paih luhna sakeibaknei rual riltam puk ai khan a tihbaiawm loh bik kher lovang!

Engmah pawh sawifiah ngai lovin No.3 chuan a rawn hrethiam nghal vek a. Midang ang lo takin min rawn pan chat a, engmah sawi set set lovin ka hmaiah chuan a'n beng thuai mai a. Sawi tur leh sawi theih reng ka nei lo. A thinrim lutuk chu a tawng thei lo, a hmui chu a khur dar dar a, a kutte chu a khur hlawk hlawk bawk a. A aia nain ka hmaiah chuan ri thlawrh khawp hian a rawn beng leh a. A duh tawk mai dawn emaw ka tia, ka hmaiah chuan a beng ri ta chawrh chawrh mai a, ka hmai hup paha inven mai loh chu tih theih ka nei lo.

Chutah leh, No.1 leh No. 2 an rawn thawk! Ka sam buk zet mai ka lo enkawl uluk ve em em thinah chuan an rawn tham ta ale! An pahnih chuan min hnuk kun a, min hnuk dak leh a. Ka hnung zangah te chuan an chum ri kawng kawng a. "Tenawm pa.. lerha, i va lo tenawm ve.." anchhia min lawh tuarh tuarh a, an tap deuh pur bawk. Ka theihtawpin ka inveng ve a, mahse, a rem lai laiah chuan min tum zawt zawt a, min pet chawrh chawrh bawk a. Mipa ka ni a, theihtawpin bei let ve ila chuan ka hneh ngei ang, mahse, 'misual chu um lohvin an tlanchhia' tih ang mai khan ka diklohna leh thiamlohna avang chuan ka che let eih ngam si lo!

A tawpa min thlah meuh chuan ka taksa pumpui hi na lo lai a awm lo tih mai tur hian a na em em vek mai a. Ka hmai an hamna te chu a thi nuau a, ka nak an chhuihnate chu a ruh a tliak ta emaw tih mai tur hian a na tawlh tawlh mai a. Ka sam an hnuhnate avang chuan ka luvun an hik ta emaw tih tur hian ka lu te chu a thip hlur bawk a. Ka khum sirah chuan ka thusawp nuaih a, ka indawm kun ran a.

A tawp nan ti niawm takin No. 2 chuan ka hnung zangah a rawn chhuih thum leh kawng a, ka euh awrh hial nghe nghe a ni. Ka tawngkam dawn tam ber chu, "I chawh..i chawh..i chawh" tih leh "Thi rawh.. thi rawh.. thi rawh.." tih a ni. No.2 tih thik niawm takin No. 1 chuan min rawn kek bu leh lawp a, ka malpui puam lai takah chuan a la chhuih zui! An duhtawk hian min pawngsual ni ber hian ka hria. Mahse, chung ka natna zawng zawng aia hrehawm zawk chu mualphona leh zahna a ni! Inthurual niawm fahran hian min chhuahsan ta diak a, chhuah pah chuan vawithum lai ring zet hian kawngkhar chu an khar bur bur a, chumi hnu chuan ka room chu a reh ta tlawk tlawk a!

TUH RAH SENG
Ka zak lutuk chu ka khum bulah chuan ka thu kawm reng a, engtin nge khan ho pathum khan min sawi zui ang ? Engtin nge an thiante hnenah ka chungchang an sawi ang ? An chhungte hnenah engtin tak min rel zui ang maw ? Ka thiante hnenah engtin nge an lo sawi ang le ? An hmel engtin nge ka hmuh leh ngam tak ang ? Kan birthday lawmdan chu a va mualphothlak ta haih haih ve! Zei hle nia ka inhriat laite, fing leh remhria ka intih em em laite, hmeichhiate chu bum an har lo em mai tia ka uan em em lai te ka rilru mitthlaah a lo lang a. Luck ka intih zia te kha aw..!

Ka va lo sual tak em! Mi tenawm tak chu ka ni chiang alawm! Min tihdan zawng zawng kha ka phu chiang a ni! Ka phu aia nepin min la chhuah zawk niin ka hria! Hmeichhe rilru thianghlim tak tak pathum lai rilru chu ka hliam a, na ngawih ngawihin ka siam bawk a! Dam tik ni a nei leh ang em ? An nunah eng ang takin nge nghawng ang ? Mipa zawng zawng an rin loh phah vek ang em ? An rilru hrehawmna chu tuin nge chhawk ta ang?

Heng zawng zawng aia pawi zawk chu Ka rinawm lohna leh bumhmang ka nihna chuan ka thil neih zawng zawngte channa bak min thlen lova, chu mai bakah neih let leh theih tawh loh zahawmna ka hlohva, mualphona zakhua chuan min tawngchilh zawk ta si a. Mihringte hi Pathianin kawng engkimah kan TUH RAH SENG TURA A DIN LEH DUANTE kan nih avangin kan rinawmna tuh rah kan seng thin ang bawkin kan rinawm lohna man pawh a kim biaiin kan tel leh dawn si a!

Chutia ka inngaihtuah a ka indawn kun reng lai chuan ka'n dakchhuak a, Tlingi chuan mak ti hmel em em hian ka room hnawk nuaih mai leh thi sung maia chhuat laia ka lo thu kawm reng chu min lo en kur mai a. Rum em em hian ka'n melh vak a, hlau hmel zet hian a tlan chhuak ta nghal a.