MILIM

Milim siam thiam tak mai hian hmeichhe lim lian pui mai hi nalh takin a siam a, ama in kawtah tak mai chuan a hung a. Chu mi hmun rawn kal pel tawh phawt chuan ding meuhin an thlir vung vung thin. 'Mipui an thuhmun fo thei lo' an tih angin a then chuan a mawi zia hahipin an sawi a, a then erawh chuan sawiselna tur an hre hle mai bawk a.

Mifing tak mai hian a rawn en ve a, a han thlek vang vang a, "A nalh hle mai, mahse, a hnar khi a lian mah mah a nih khi" a ti a. Milim siamtupa chuan leihlawn / leilawn a dawh lawk a, tuboh leh chhe-ni nen a lawn chho ta a. A rukin vaivut a hum chho tel bawk a. Tichuan, chu pa hmuh lai ngei chuan tuboh leh chheni chuan milim hnar chu a chhu karh karh a, chutih rual chuan a vaivut hum chhoh ruk pawh chu a milim hnar a chhut mek nawi niawm takin a thlak thla ar ar bawk a. A hnu deuhah chuan engmah pawh chhu thla tak tak lem lo chuan a rawn chhuk thla leh ta a.

"Tikhian eng nge a an tawh?" tia a zawh chuan chu pa chuan, "A dik thlap tawh alawm, a nalh tawh khawp mai" tiin a lo chhang vat a.

Midang thil tih sawisel chak ve hrim hrim hi a awm theih a, chu bakah, midang hlawhtlinna lawmpui aia sawiselna tur lo zawng mi hi a awm theih a, midang thatna, dikna leh mawina tam tak hmuh kan/khum a, an diklohna leh mawilohna takte lo zuk thur chhuah sak nalh nalh chak mi hi a awm theih bawk. Anihna dik takah chuan thil / mi kan sawisel tam tak hi an dikloh vang aimahin keimahni rilru dik loh vang leh kawih vang a ni duh khawp mai!

Mihring hi milim ni ta ila, kan fel lohna laite, kan that lohna laite, kan dik lohna laite, kan sualna lai zawng zawngte hi tuboh leh chheni hmangin chhu thla zel ta ila, a tawpah chuan kan chhu thla ral vek thei ngei ang. Tunge tuboh leh chheni rawih ngai lo khawpa fel famkim leh tha awm thei ang le ?

I bialpa, i bialnu, i nupui, i pasal, (tupawh) kha milim ni ta sela, eng zata tam nge i ker / kher thlak ang ? Eng zata tam nge i ker/kher ban ang le ?

Hei vang hi a ni ngei ang, famkim lo te Pathian hi hmangaihna a nih a, mihringte thinlungah hmangaihna a lo dah ni! Hmangaihna mit chuan mi famkim a zawng lova, mi famkim lo kha a hmu famkim mai zawk a ni!