PATHIAN ANGEL

('What are words' by Chris Medina ka ngaihthlak apiang hian engtin emaw tak hian ka awm thin a, ka rilruah amah ka inchana, he thu hi ka ziak ve ta tawp a ni)

Zing ni chhuak eng mawi tak chuan ka mut pindan tukverh darthlalang chu a rawn chhun lut raih a. Boruak a nuamin khawlum uap churh te, fur ruah sur leh chhum zing chuai thinte chuan min kian san tawh bawk a, thawhphan pawh awm hauh lovin rilru zangkhai takin ka tho nghal a. Ka sana ka’n en a, 6.30 am 02 Otc. 2009 a lo inti kalh a.

Ka cellphone nizana ka lukham hnuaia ka hnawh luh kha ka’n en a, ‘ 1 message’ tih a lo awm a, phur tak hian ka’n hawng nghal a, “Good Morning, My Husband 2b, lo inenkawl tha rawh aw, Have a wonderful day!” tiin a lo inziak a. Ani nen hian kum riat zet kan lo inzui ve ta a, chhum lo chat lovin kum riat chhung zet ka thawh veleh a ka chhiar tur hian message a lo dah ngei ngei thin. A dah loh anih chuan eng emaw dik lo a awm a ni tih ka hre nghal mai thin a, chutiang anih chuan a damlo emaw, harsatna a tawk emaw a ni ziah bawk thin. Kan inhre chiang dun em em a, kan duhzawngte, kan ngainat loh zawngte, kan chanchin engkim akip akawiin kan inhriatsak kilh kelh a. Harsatna kan tawh reng rengin a hre hmasatu ber kan ni dun bawk thin. Ka hlimna leh ka damchhan hi a ni hliah hliah a, hlim taka a nui reng mai thinte chuan ka khawvel hi a va timawi thin tak em! Ani ka tawng hi vannei ka inti tulh tulh a, inchhir chu sawi loh ka lo tawng lo ang tih ka hlau leh hnuhnawh khawp mai. Piang nawn leh mahila amah ang nilovin amah bawk hi tawn leh ka duh a ni.

Nidang zawng aiin chu mi zing chu a mawi bik hle in ka hria a, tukverhah ka dakchhuak a, huana thing hrang hrangah chuan sava taktê tê ho hi an lo awm sap sap a, an hramte chu nidang aiin a mawi zual hian ka hria a, kawtzawl phulte pawh zing dang aiin a hring mawi bik em em hian ka hria a. Ka rilru chhungril chu tuma hriat loh hian a nui var var a, ka hlim hliah hliah mai ani. Ka dinhmunah hian midang pawh awm se, tunge hlim lo bik ang ? Kum riat chhung zet ka engkima engkim lo ni tawh, he khawvela ka hmangaih ber chu ka nupui niturin nikum hmasa khan a thawhna office ah ngei mai ka propose a, damchhunga nupa ni mai tawh turin kar leh khian Pathian leh kan chhungte, leh kan thian thate hmaah “Tiam tlat e” kan ti dawn tlat alawm! Dar 9 a ri a, ka cell-phone a rawn ri a, a call picture atana a nui lai hmel ka dah chu a fuh thlawt hian ka hria, a aia hmeltha hi an awm thei hian ka hre lo. “Hello”, “Hello, dear, vawiin kan dinner ei tur kha.. Senator lo kal dawn avangin kan buai dawn a, mahse lo haw hma chu ka tum tho ang” a rawn ti talh talh a. “Ok, please, dar 4 hmain aw..., Oak Hills Park lamah kal hmasak kan ngaih kha,” ka lo ti a. “Sure, ka hmanhmawh deuh, ka kal nghal dawn e, love you, take care “ a rawn tih chuan, “You too, love you, stay safe baby,” tia phone dah pah chuan a thlalak chu kan zu chuks zauh a.

Chu mi nî chu inneihna lam buaipuitu even management nen kan indawr a, ka buai hle mai a, dar 4 rik hmaa engkim lo tihfel a, amah lo dawng-sawng hmana awm ka duh si a. A rang thei ang berin tih tur tul awm zawng zawng chu ka’n ti zung zung a, ka phe buai khawp mai a. Dar 3 velah chuan ka tih turte chu ka tifel thei hram a. Inlamah hawin ka inbual sawk sawk a, ka inbual laite chuan ka phur tawh lutuk vang pheng nge shower te chu chak ta lo hle hian ka hria a.

Tichuan, phur zetin kan inhmuhna tur Oak Hills Park lamah chuan car-in ka inkhalh phei ta a. Tlai hi a duh ngai loh avangin kan inhmuh dawn reng rengin a hun taka inpeih ka tum tlat thin. Dar 3.30 a ri chiah tihin ka phone a lo ri rang rang a, phur zeta lak pahin ka’n ‘Hello’ nghal a. Hlim aw tih hriat zet hian, “Honey, buai em? Tunah khawnge i awm ? Hei ka hman chiah aaa..” a rawn ti a. “ Park ka thleng chiah, ka nghak mek che” ka’n tih chuan, “Ok, Ka rawn chhuak dawn chiah e.. minute 15 chhungin ka rawn thleng ang, love you, bye” a rawn ti leh a, kei pawh chuan, “Love you too, bye” tiin phone ka’n dah leh a. Heta kan inbiak hi kan damchhunga cellphone-a kan inbiak hnuhnung ber tur a ni tih chu hre lawk ila, ka dah hlek lovang le!

Khawvelah hian hmangaih berte nghah tluka nghahhlelhawm leh rei duh hi a awm theiin ka ringlo. A lo thlen hma chuan Park sir lam thutna nuam zetah chuan thuin ka lo nghak a. Ka rilru chu a hlim veng veng a, a hnena ka thil sawi tur zawng zawngte ka lo duang a, kum riat kal ta a kan inngaizawn tantirh dan te ka sawichuak ang a, ka damloh laia hospital-a pangpar a rawn ken ziahte kha ka sawi ang tiin kan tunhma hun hlimawm tak takte chu ka ngaihtuah a. A college kal haw ka thlah a, kalkawngah ka car a thi thut a, kan chhuka kan nawr dun laite kha a la hre ve reng anga, a birthday-a ka thilpek hmasak ber, teddy bear lian puite kha, khatih lai kha chuan a la naupang ve hle kha a nia titein ka rilru ka lo kawm a.

Kan inneih huna a kawr hak turte chu ka lo mitthla lawk a, puithiam hmaa kan chhechham thutiam sawi turte chu ka rilruin ka sawi a. “A nuamah pawh, a hrehawmah pawh, retheihnaahpawh, hau-saknaah pawh..a chhe ber pawh lo thleng se, ka damchhungin ka hmangaih reng ang che..” tiin ka thiam ang angin ka phun sap sap a. Ka rilru suangtuahna chuan thenrual min hriatpui tura lo kal khawmho hmelte chu a hmu a, puithiamin “Now, you may kiss the bride” a ti tur lai hmelte chu ka lo hmu lawk a. Hlim hmel em em leh thlamuang hmel zeta a ni’n min rawn en let lai turte chu ka hmu bawk a. Pangpar hnunglama a vawr tur laite, midangin an inchuh laih laih tur laite chu ka hmu lawk a, ka thinlung chu lungawina leh hlimna hlirin a khat a.

Ka cellphone a rawn ri-a, ka harh zawk a, a rawn thleng tawh a ni ngei ang ti rilru chungin ka tho chhuak a, ka’n hawi vel nghal a. Amah awm reng reng chu ka hmu lova. Cellphone ri kha a lo tawp leh daih a, ka zuk enchiang a, phone number ka hriat loh hi a ni a. Sana ka’n en chuan dar 4 a lo ri reng tawh a, ‘tinge a la rawn thlen loh aw, a tlai ngai der si lova’ tiin ka ngaih a tha lo deuh a. Cellphone chu a rawn ri leh a, rang zet hian ka pick up nghal a, “Hello, Mr. Christopher Medina a ni em ?” hmeichhia hian a rawn ti a, ka lungphu chu a inrawn nghal tlut tlut a, hlauhthawnna hlirin ka khat nghal a, “Aw..aw...ni e,” ka ti thei tawk a. “Pine-mount Hospital, 7th Street ah hmanhmawh taka mamawh i ni e” a rawn ti leh ringawt a. Engtin mah ka chhang lo, car-ah ka tlan lut a, Pinemount Hospital lam pan chuan ka damchhunga ka speed san ber tum ni turin ka tlan phei nghal a, a thlawh hian ka thlawk phei ni berin ka hria.

Hospital ka va thleng chu a nu leh ka chhungte chu corridor sei pui maiah hian an lo dingkhawm a. An hrilhhai hmel tak zet hian ka hria, a nu chuan tap chungin min lo kuah a, thil awmzia chu ka hrethiam nghal a, mahse ka va hrethiam lo si em! A nu chuan tawng pawh tawng tha hlei thei lo hian tap chungin a chet sual dan chu min hrilh a. Office atanga a tlanchhuak tur kha Motor lian nen an insu a, a na hle mai a, a lu a sawh a, biak theilohin a awm mek, a marphu chiah an lo en a, doctor te pawhin a dam-chhuah an beisei loh thu tlang takin an lo hrilh vek tawh a lo ni a. Ka mitsulh hian ka hria, ”A theih loh, a theih loh, kar lehah kan innei dawn, ka nupui tur i nih kha, i thi thei lo, i thi tur a ni lo” tiin ka au tuarh tuarh a, chumi pah chuan an dah luhna pindanah chuan va tlan luh ka va tum a, duty te ho chuan min lo dang bet a, ka tal vak vak a, a tawpah chuan ka pain min rawn man beh takah chuan a koki-a uai bet chungin ka tap ta hlawp hlawp a.

Kum hnih lai a liam ta, tunah chuan ka mitthlaa ka lo suangtuah ve thin zawng zawngte kha engmah lo maiah a lo chang zo ta. A hmel hlim nuisangte chu hmuh tur a awm tawh ngai lova, hmelhriat loh hmu ang maia min en changte a awm thin. A mitmengte chuan a thil ente chu a hmu em tih pawh a hriat tawh loh a. Ka thilsawite chu hre hmel pawh a pu tawh lova, a pian nalh tak ka thlir nin theih ngai lohte chu tunah chuan a chantawk chu wheelchair a ni tawh mai si, inneih kawr mawi tak kan lei dun a inhmeh em em mai te kha a damchhungin a ha ngai dawn si lo. A kut zungtang mawi taka kan inhualna zungbun a bunte chu eng nge an nih pawh a hre lova, ka bun tir laia lawm avanga a bianga mittui rawn luang thla ngiai ngiai te kha tunah chuan thawnthu mai an lo ni ta si a. A bula amah lainat em em a awmte chu tute nge an nih a hre lova, khawilaiah nge a awm tih pawh a inhre hek lo, hre tur pawhin a ngaihtuahna leh hriatna thazamte chuan an thlawh bosan zo tawh si a..! Tunah chuan thi si lo dam si lovin khawvel dangah min lo chhuahsan ta si a...! Mahse, ka thinlung chhungril chuan, ‘Tun hun hi a ni dawn lawm ni kan thu tiamte hlenchhuahna hun tur chu, kan chungah eng pawh lo thleng se, ka hmangaih reng ang che tia kan sawi dun thin te kha, hetiang dinhmuna a din hnuah hian kal san leh ta si ila eng mihring nge maw ka nih ang le’ a ti a.

A taksa leh rilrute chuan dinhmun rapthlak tak chang tawh mahse, ka hmangaih zual sauh a, a kutte chuan a duh banphak tawh lo mahse a duh chu keiman ka banpha alawm, a duh sawi thei tawh lo mahse a mamawh hretu ka nih avangin ka sawi sak thei alawm, a kete chuan din pui zo tawh lo mahse duat taka pawmna tur kut leh ke leh thahrui chakna ka la nei alawm. A hmel leh hmai te, a vun te chuan ngai awh tawh lo mahse ka duhna leh hmangaihna chu a ni telin a zual sauh sauh zawk a. A mamawh hun lai bera a kianga ka awm theih avangin ka lawm a, ka kal san hla phal lo, ka hming a lam apiangin a bulah ka awm tlat a ni tih hria se ka duh a ni. Duat taka enkawl theiin ka awm a, hma-ngaihna thu hi sawi mai a tawk loh zia tifiah theia ka awmte hi ka va lawm em! Pathianin amah veng turin ‘angel’ a rawn tir a, chu ‘angel’ chu keimah hi ka lo ni reng alawm! A beng bulah chuan zawite hian, “Hlau reng reng suh, ka kalsan ngai lovang che, i bulah ka damchhungin ka awm reng ang, ka hmangaih tawh che a, ka hmangaih che a, ka hmangaih reng ang che” ka zuk ti a.

Anywhere you are, I am near
Anywhere you go, I'll be there
Anytime you whisper my name,
you'll see How every single promise I keep
Cuz what kind of guy would I be If I was to leave when you need me most

What are words If you really don't mean them When you say them
What are words If they're only for good times Then they don't When it's love Yeah,

you say them out loud Those words,
They never go away They live on,
even when we're gone And I know an angel was sent just for me
And I know I'm meant to be where I am
And I'm gonna be Standing right beside her tonight
And I'm gonna be by your side
I would never leave when she needs me most I'm forever keeping my angel close

“WHAT KIND OF GUY WOULD I BE IF I WAS TO LEAVE WHEN SHE NEED ME MOST ? I WOULD NEVER EVER LEAVE WHEN SHE NEEDS ME MOST!!!!