MY FIRST KISS

A vawi khatna leh a hmasa ber a nih avangin ka zam ru hle mai a. Miin min hmuh ka hlauh em avangin khaw en lai pawha ti ngam lovin zanah tumah hmuh lovin bathroom-ah hruai luh ka tum ta a.

Bathroom-a kan lut dun tur chu ka hawi kual zak zak a, min lo hmu an awm em tia fimkhur taka ka thlek kual hnu chuan dim thei ang berin Bathroom kawng ka chu ka hawng da da a, kan lut dun ta a. Thawmnei lo thei ang berin kawngka chu chhung lamah ka kalh leh thlap a.

Tichuan, dimtein amah chu kan zut a, engmah a sawi lem lova. Ka ngampa deuh sawt a, duat tak hian ka kut chuan ka chelh nghet sauhva, a haw lem lo aniang, engtin mah a awm lova, a tang hek lova, min duh ve tak tak a nih ngei ang ka ti rilru a.

Uluk zet hian ka melh vang vang a, lungchim taka fawh ka tum lai tak chuan thawm a rawn ri, ka phu nasa kher mai, ani erawh chu a phu eih lova, a ti thang viau tawh anih ngei ka ring nghal a. Ka vawn lai chu ka thlah vat a, thawm chu ka'n ngaichang leh te te phawt a. Kan ngawi dun kar a.

Reilote hnuah chuan thawm a reh ve mai a, tichuan a hma aia ulukin ka lamah chuan ka pawt hnai a, engmah a la sawi chuang lo. Chutah ka pian ahnu lama a hmasa ber ni turin ka zuk fawp de de a. A tui nge a tui lo pawh ka hrethiam lo. Ka zuk fawp nawn leh a, ani lah chu ka tih ang angin a awm mai si a.

Chutah le, duhthawh em em mai hian ka fawp ta mawlh mawlh mai a. Mita min lo hmutu chu awmse ka ei zo mai duh hmelin min lo ngai ngei ang. Ka damchhungin a zunah ka uai dawn tih hre reng reng lovin amah ka itna leh ka insumtheih lohna chu remchang ka hmuh hmasak berah ka ti puitling ta a ni.

Kha zan kha ka hua a, tunah chuan kalsan duh mahila ka thei tawh si lo. Harsa taka ka thawhchhuah ve tawk tawk ka pawisa tam tak atan nitin ka hmang ral a. Ka nun a tibuai em em a, mi zinga ka awm rei deuh leh min ko chhuak sek a, mi awm lohna hmun remchang leh bathroom te kan pan leh dun nge nge thin. Ka tan a tha lo tih hre reng chungin kawp lo thei si lovin ka awm a. Duh lo hle mahila ka thisenah hian a zun chuan zung a kaih tlat tawh bawk si!

Aw... sikret / meizial!

Sawi ngaihna tak pawh ka hre lo che...