AMAH LO CHU PA DANG KAN NEI SI LO!

"He pa hi chu a ninawm ngawt mai, veng a ti tawp si. Inkhawm kal lai takte hian khawlaiah hian a lo mu leh reng thin" tih pahin inkhawm kal tur thenkhat chuan an sawi zui lawng lawng a.

Ka motor atang chuan ka zu thlir a, a samte chu a bukin a kete lah chu a bal hle mai a. 'A va zial lo tak aw, patling pui ni si, sawtia zu ruia kawng sira han mut tak reng mai chu! Inkhawm kal tam vanglai takte a ni lehnghal a, chhungte pawh a nei lo emaw ni le?' tia ka lo ngaituah ruk mek lai chuan mipa naupang lian ve fu tawh pahnih hi an rawn kal hnak hnak a, an inthlahrun hmelin an zah hmel khawp mai lehnghal a. chupa mu lai chu an pahnih chuan a zak tawn tawna kaikuahin an pawm thova. Zo tha thum mang lo tih hriat tak hian kaikuah pah hian an kal pai pui chan chan a. Mak ka tih deuh avang chuan an kal lai vel chu ka lo thlir reng a, a chang chuan an han tluk pui leh rih a, chu pa tawp tak lah chu a rum tuah tuah reng a.

Kan chhungte boral avangin veng dangah inkhawm lova kal ka ni a, an in tak ka chian loh avangin midang lo thleng tur an in awmna hria ka lo nghak mek a ni a. Ka thil hmuh chuan engtin emaw tak hian min khawih a, ka mit ka la sawn hlei thei lova. An kal liam hma deuh chuan tlangval pathum inkhawm tur rawn kal hnenah chuan tunge a nih ka lo zawt ve ringawt a. Anni lah chuan en mang hlei lo hian,"Zubur Rinthanga a nih saw, a fapate pahnih hian an zawn hawng deuh reng thin alawm" tih pah hian min kal pel leh mai a. An liam hnu pawh chuan an kal liamna step lam chu ka la thlir reng a, eng emaw tak hian min mawlh a. Hriat chian ka chak ta tlat a, ka lo nghah mekte pawh ngaihsak lo chuan motor atang chuan ka chhuk a, ka umzui ve ta nghal a. Ka zuk hmu zui ta mai lova, ka nghaha te an rawn thlenga min rawn phone takah chuan ka let san leh ta a.

Nilengin mitthiinah kan awma, vuina neih zawh hnuah rei lote kan awm leh hnu chuan haw zai kan rel ta a. Motor dahna kan han thleng chu mipui hi an lo pungkhawm luih luih mai a. Hawkdak ve ta ngang chu eng nge thil awmzia tiin mipui karah chuan ka va in hnawh ve tawlh tawlh a. Ka thil hmuh chuan min ti phu chiang kher mai! YMA duty hovin zinglama naupang pahnih ka hmuh, zurui chatthla rawn kuahtute, a lian zawk kha an lo man chu niin! Patling thau pui pui leh tlangval rum pui pui chuan an lo hual thup mai a. Thu an lo zawt vel a, chu naupang chu a zam em em tih hriat tak hian a khur der der tih pawh ka va hre nghal thei a.

An lo vin khur khur a, an tiang kente chuan a dar leh remchang lai laiah chuan an lo hawlh sawk sawk a. A hlau tih hriat zet hian a melhkual zak zak a, a mittui a hnai hle tih pawh a hriat mai theih a. A hualtu ho lah chuan an vaw chak hmel em em mai a, "Kan hrilh ngun tawh lutuk che, vawi eng zat nge kan man dawn che ? Nu i nei tawh lova, kan khawngaih che a, mahse, kan khawngaih seng lo ang che" pathau deuh hmui hmul nei chhur hian a lo ti khur khur a. Chu naupang hmelah chuan hrehawm tihna leh zahna hmel zawng zawng ka va hmu thei hian ka inhria a. Tap deuh pur hian chung a hualtute chu a melh kual a, a kut khinghnih suihin ngaihdam a dil mawlh mawlh a. Ka khawngaih lutuk chu va chhan mai hi ka duh a, mahse, mi venga va inrawlh kha chu tha ka ti chiah si lova. Tanpui mamawh em em, chhantu ngaia tap vawng vawng mai han hmuha tanpui thei si lo dinhmuna han din hrehawm dan chu ka hre ve thiam chiang kher mai.

"Rambuai laia vai sipai dum lian pui pui nunrawng hmelchhe zet hovin kan farnute an han khawih rak tuarh tuarhte, an han khawih te vawng vawng te leh an tap hawm hawm laia sipai dangin silai kau sa nena min tin reng avangin che thei silovin awmhmunah hian kan lo inseh ruh ngat ngat mai ani" tia kan pate rualin min hrilhte kha ka hre chhuak uaih uaih a. Chutia an hual tuau tuau laite chuan tih theih ka nei der si lova, ka tih theih awmchhun chu engtin nge an tih zel dawn tih lo thlir a ni tawp mai.

Thlir hrehawm ka tih em avangin an hotu ber nia ka rin pathau deuh hmuihmul nei chu ka va pan ta tawp a. Kan nau a nih thu leh a thil tih sualah pawisa chawi ngai an tih zat zat ka chawi mai tur thu leh ngaidama chhuah turin ka va ngen ta a. Anni chuan hreh hmel zet hian ka dilnate chu min lo pawmsak a, mahse, pawisa erawh chu chawi a ngaih loh thu leh tunchina fimkhur turin min ti a. " Awle, ka pu" tih pahin chu mipa naupang chu ka motor lamah ka kai phei dawr dawr a. Mak tih hmel leh hrethiam lo hmel zet hian min en a.

Motor chhungah chuan a chanchin engkim min hrilh ta a. A nu hian kum 2 kalta khan a pa zurui ning lutuk avangin a tlan bosan a. A pa lah zuruia khawlaia mu kual mai mai a nih avangin an unau pawh chu school pawh kal chhun zawm thei lovin mi inah an inhlawhfa thin a. Tui chawite, mi bill pek sakte, mi motor silsakte leh a remchang apiang an thawk dun mai thin thu te a sawi a. A pa hian zu la turin a tir fo thin a, chu pawh an unau inhlawhna pawisain, vawi eng emaw zat chu YMA ho pawh hian a zu la lai an lo man tawh thin ani tih te chu min hrilh ta zel a.

"Tinge i pa chu i hnial mai loh, in unau inhlawhna pawisa lehnghal" tia ka'n zawh chuan ka rin loh dan leh beisei loh dan daihin min chhang ta a. "Nia, mahse, zu hi a taksa in a mamawh tlat tawh a, zu lei sak hi ka zak ve thin lutuk. Khawlaia a lo mu kaih hawte hi hrehawm kan ti dun thei khawp mai. Mahse, a tan chuan engmah tih hreh kan nei lo, kan hmangaih dun em em a, AMAH LO CHU PA DANG KAN NEI SI LO" a ti ta reuh a. Ka rilru a khawi kher mai, ka khawngaih bawk si, ka lawm reuh bawk si chu tlangval intipa ve tak ni mahila, ka romol (ramal) ka phawrha, ka inhru ta malh malh a!

Nu leh pa zahna chang hre hauh lote, nu leh pate thing leh mawl tia hmusit em emte, tawngkam leh che zia thlenga nu leh pa hnuaichhiah duh mai kan tam tawh ziate ka ngaihtuah chhuak a. He mite unau hian an pa zungawl vei, zahpui awm tak, khawlaia zuruia mu mai mai chu theihtawpin an enkawl a, hmuhsit ahnekin an hmangaih em em a, he khawvelah hian an tan pa dang an piang leh dawn tawh lo tih an chiang kher mai!

Ka haw kawngah te chuan ka thinlung chhung ril berah chuan suma buh deng inrawn ri ang maiin 'AMAH LO CHU PA DANG KAN NEI SI LO' tih chu a ri nawt tlut tlut a...