THEIHAI LEH MIZO IDOL EFFECT

"Ui, a rah hnem lutuk,ka va'n ei chak e" tih pahin Mamawii chuan ka thianpate kawmthlang huana theihai rah tuarh chu a kawk a, a zuang tawr tawr a. A thianteho pawh chuan an ei chak thu an lo sawi ve tliar tliar a. Ka lo phur ru khawp mai a, "Yes, hit dawn lutuk, ka zuk lawh sak teh ang" ka lo ti rilru a.

Chu theihai kung chu lian ang reng tak, a kungbul lam mar chho pur mai hi a ni a. A awmna lah chu a kham ang reng viau mai bawk a, thlang lam atang phei chuan sang ang reng tak hi a ni a, tlak palh vaih chuan vanneih berah damdawiin hi a ni ngawt dawn tih hi a chiang reng mai a. Mahse, chutiang lam ka ngaihsak hman lo, a ruka ka 'star' em em khan a ei chak tlat! A hmel hmuh ka chak em em thin mahse ka hmuh meuh chuan ka en that leh ngam loh khan a ei chak miau a, lawhsak ngei chu tih makmawhah ka ngai nghet bur anih chu!

INTAWNNA
Mamawii ka hmuh hmasak berna hmun chu Sikulpuikawnah a ni a, hemi tum hian kan sikul bang kan thianzahovin hawker phenah meizial kan zu ru a, kan ding khawm laih a, chutih lai tak chuan a thiante nen alu-papor an rawn lei a. Ka hmuh tirh atangin ka mit ka la sawn thei lo nghal a, an kal liam thlengin ka thlir zui nghe nghe a. A hmel ka hmuh chhung chu hun reilote nimahse a zuna uai nan chuan a rei tawk viau a ni ngei ang, in lama ka haw hnu thlengin ka mithlaah a cham ta reng a, ka rilruah chuan amah hlir mai chu a awm ta a, "Khawi vengah nge a awm ang le ? Class eng zah nge a nih tawh ang ? A fel ang em le ? Chhass a nei ang em le ?" tih vel ringawt mai chu ka rilruah a awm ngut ngut a. Chumi zan chuan ka mumangah ka lo hmu nghe nghe a, mahse, vanduaithlak takin kan sikul 'Miss' (ka ngei em em) ah a lo chang leh daih a.

Rawlthar zak zum tak ka nih mai bakah hmeichhe lamah ngat phei hi chuan zakzum tih piah lam hi ka ni awm e. Ka thiante hnenah pawh ka rilru chu ka hrilh ngam lova, amah hmuh dan leh hnaih dan chu keima thiam dan leh theih ang tawk tawkin ka bei ve nasa mai a.Ngaituah zawng na na na chu a chanchin ka hre thui zel a, a hming leh vengte ka hre zel a, ka thianpa pakhat nau nen an inkawm thin tih te ka hre zel a.

Ka hmuh fuh takin tiin ka thianpa ka kawm khat ve tak chu ka kawmngeih thar ta a, an inah te chuan ka leng ve ta fo mai a. A nau nen an lo inkawm ve nasa bawk nen vawi thum lai chu an inah chuan kan leng rual tawh a, mahse, biak chu sawi loh, a bul hnaiah pawh ka awm tha ngam lova,phone number dilte chu hla tak a ni. Hmuh chak avanga kal tlut tlut e ti lo chuan, a lo kal ve pawhin ka lo zak em em ringawt zel a. A awm chhung zawng chu ka leng ve a, a haw veleh hlawhtling inti ru takin minute khat pawh laklawh nei hauh lovin ka haw veleh ringawt zel bawk thin.

A TAN CHUAN SIAR LAK HUAMIN..
Vawi khat mah thing ka la lawn ngai lova, mahse, ka huphurh hauh lova, huphurh chu sawi loh, ka phur em em mai a. Ka thianpa nau hnenah chuan, "Khawi, ka zuk lawh sak ang che u" intifel zet hian ka'n ti a. Ka beisei lawk ang ngeiin Mamawii (ka 'star') chuan, "Ui, i van fel, mahse, i lo thei dawn mi?" nui deuh har har chungin a rawn ti a. "Mipa tan te chuan harsa hlei nem" confi hmel zet hian ka'n ti liam ve ngawt a, tichuan, huan lamah chuan ka chhuk thla ta a.

Theihai kung lam pana ka kal chu tukverhah min lo thlir reng tih ka mitin hmu lo mahila ka rilru chuan a hre kar a, ka rilru chu hlimna hlir hian a khat a, mahse, ka kal danah ka buai tlat, min lo thlir reng awm sia tih ringawt ka ngaituah avang chuan thingzung lo pir chu ka chhuih palha, chiang em em mai hian ka inbin thla ta a, inring lo ka ni bawk a,ka lum thla nasa mai a. Ka han inham din meuh chuan theihai kung bul chu ka lo thleng der tawh. Ka lai lutuk chu theihai kung bulah chuan ka ding reng a, ka tih tur ber pawh ka theihnghilh ta emaw ni, engmah tih nachang hre ta lo chuan theihai kung chu ka kheuh ka kheuh ta ringawt a.Ka zah tawhsa teh reng nen, ka thianpa lah chuan "I va thleng thla hma ve" tih pahin min la rawn nuih nghek nghek zui a, Mamawiite thianho chu an lo nui dar dar lehnghal. "A lian ber min rawn lawh rawh aw" tia Mamawii'n min rawh auh takah chuan ka zah a reh deuh a, phur zet chuan a kungah chuan ka lawn ta a.

THEIHAI THUR A THLUM TLAT!
Theihai rah len hun a la nih loh avangin a lian deuh tur awm ka melh kual a, a zar thlang lam ami ho chu a lenthat deuh bik avangin rilru mitthlaa Mamawii hmu chung chuan ka ban thla da da a. A zar a te sia min dawl lo mai ang tih lam pawh ka ngaihtuah thei tawh lo, a rah lian ber ka zuk hmu chu theihai ni tawh lovin Mamawii hmel ka hmu tlat a, ka zuk ban tawk tawk a. Ka mitthlaah chuan theihai rah lian ber ka pek huna hlim taka min han nuih sak tur laite chu a hmu a, nui mawi tak chunga min han melh vel turte chu a lo lang zut zut bawk a. Mamawii mitthla chung leh amah ringawt ngaihtuah chung chuan ka zuk ban vak a, ka ban pha thei hram a, ka lo zo ka ipteah laia ka khung zo chiah tihah chuan ka dinna zar chu a tliak rawp a, ka tla thla ta rawp rawp mai a.

A phe vuai hian ka hria a, chumi hnuah a thim leh mup a, engmah ka hre zui ta lova. Ka harh leh meuh chuan ka thianpa khumah hian ka lo mu zar mai a, ka thianpa leh Mamawii te thianho chuan min lo hual khup bawk a. Ka hnungzang hi a na em em mai a, ka lu chu rit deuh bur hian ka hre bawk a. Mamawii'n min lo en ve reng tih ka hriat avang chuan ka inti pa lui ve a, an phal lo chung ka tho lui a. Mahse, ka kal that theih vak loh avangin kan inthlenga min thlah turin taxi min laksak ta a.

Kar khat a ral hnuin tlai khat chu ka cellphone Nokia 1100 ngei mai chu a rawn 'chhaya chhaya' ta, "Hello" "Hello, Mapuia ni em ?" hmeichhia hian a rawn ti a. "Aw, ni e, tunge aw?" ka'n ti liam ve satliah ngawt a, "Mamawii ka nia" a rawn ti chiah mai chu ka zuang dawrh hian ka hria, ka thinphu a rang phut a, a su ta dup dup hian ka hria a, "Eng nge i an tawh, i tha zel em ? I theihai lawh kha ka hawn a, ka ei daih a nia" a rawn ti nui har har a. "Ka tha tawh lutuk, theihai chu a tui em?" kan tih chuan, "Tui rapthlak, a thur tha khawp mai, mahse, min lawhsak a nih avangin a THLUM tui ka ti!" a rawn ti chiah mai chu ka hlim lutuk hi awmngaihna ka hre lo, ka lawm lutuk chu theihai kung atanga tlak nawn leh pawh ngai dawn se ka inhuam sak mai ka ti rilru a. Mamawii'n 'thur mahse a thlum' a tih dawn phawt chuan a aia na deuhin tla leh dawn pawh ni ila ka inhuam sak sak khawp mai ti rilru chungin tuma lawm lohvin ka nui khi ta reng a.

(Laltheihai, ka lawm e...)

MIZO IDOL LAMAH..
Zan khat erawh chu ka chet dan a fuh tawk lo a, kan inkar chu thlum lo kher asin! Kan thianzahovin Mizo Idol Chanmari Hall-ah en tumin ruahmana kan lo siam lawk vek tawh a. Chhunah chuan,"Ka thiannuin a birthday a lawm dawn a, 'In pahnihin zanah lo kal ngei ngei ang che u' a ti a" a rawn ti ta mai. Thiante nen kan lo 'plan' lawk sa vek tawh han thulh san leh chu ka hreh tawh bawk si, ani han hnar lah kha ka ngam chiah bawk si lo. Ka rilru a buai ang reng khawp mai

a, "Ka hman ka ring lo" ka'n ti ringawt a, "Ti nge ? Eng nge i tih dawn aaaa...?" tia min rawn zawh leh chuan engmah pawh ngaihtuah chiang mang hlei lo hian, "Kan committee dawn a, mmmm... eng lo ho a nia... Keimahni sub-committee bik" ka'n ti liam ve leh satliah ringawt a. Ani chu lawm loh hmel ang reng tak hian, "A hma pawhin i sawi lawk bawk si lova, min rawn sawm nasa ve asin le... I hman loh chuan keipawh ka kal lo mai ang" a ti chuai deuh raih a. "Emergency meeting an ko thut a.. " te ka ti kawi kual vel ta mai mai a.

Tichuan, Chanmari Hall lamah chuan kan thianzaho chuan kan inkhalh phei a, kan bengchheng phei khawp mai a. Dawt ka hrilh avang erawh chuan ka rilru a nuam chiah lova, "Nangmahni vangin Mamawii dawt ka hrilh ringawt a nia aw.." ka ti dek dek a, "Ho lutuk ho lutuk, nang hi kawm pawh i kawm theih loh, Mamawii Mamawii ti reng ringawt mai" min ti ta zek hlawm avang chuan ka ngawi zui ve leh ta mai a. A hmun kan thleng a, mipui an lo tam khawp mai a, a boruakin min chiah bawk a, Mamawii leh ka dawtsawi vanga ka rilru nuam lo pawh chu a reh ta deuh a.

Tlar hnung lam kil chhak lamah chuan kan thianzaho chuan kan thu tlar tham a, a tirah chuan nungchang that hmel tak hian kan thu ngawi kar hlawm a. A rei telh telh a, kan zia dik tak a lo lang tan ta. RK-a a rawn zai meuh chuan kan phul zo ta, mipui phar suau suau karah chuan Zama chuan rawtna phurawm deuh mai a rawn siam a, "Kan vaiin dingin lam ang u, cameraman khian min rawn la vat mai ang. TV-ah kan lang dawn alawm, TV-a live-alan ve hrim hrim pawh a chakawm alawm" a ti a, kan lo phur tlang khawp mai a. Ka thiante ho chu an zavai mai chuan an ding ta suau a, an thiam ang ang chuan an lam ta nghawng nghawng a.

Zama 'plan' ang ngei chuan cameraman chuan keimahni ho chu a rawn 'focus' nghal vat a, chu veleh a aia uar lehzualin an phar ta lawp lawp hlawm a. Kei chu ka zah deuh avangin thu chunga kut beng mai kha ka ni a, chutia cameraman-in a rawn focus tih an hriat veleh chuan Tluangtea leh Ricky te chuan min pawt tho lui ta, tang zui ta bik lem lo chuan uar em em mai hian ka thiante ho chu ka zawm ve ta a. Hetiang puipunna hmuna ka pian ahnu lama ka lam vawi khatna a ni nghe nghe a, a nuam pawh ka ti phian a, tih fo tlak ni hialin ka hria!

MIZO IDOL A THLUM VE LO!
Kan han bang ta chu hlawhtling hi kan inti khawp mai a, mahse, car chhung kan han lut fel chiah chu ka cellphone a rawn phu ta der der mai. Ka pick up dawn chuan mipui kan la bengchhengin kan la ri nuaih nuaih si a, a fuh dawnin ka hre ta lo va, ka 'ring' ral tir ta ringawt a. A rawn call nawn leh a, chu pawh chu ka la duh hrih ta lova.

Kan veng kan thlen hnu chuan call back tumin ka phone ka phawrh vat a, a message pakhat hi a lo awm ran a. Rang takin ka hawng vat a, "Comtee membr cu n va tam ve!" tih ringawt hi a lo awm a. Ka hrethiam lo kher mai, ka call ta vat a. A 'ring' char char a, a 'ring' ral ve ta thak a. Ka'n dial nawn leh a, a 'reject' leh ta hmak thung a. Ka ti leh thin, a reject leh thin. Ka va text ta a, "Tinge reject zel a, thinrim mi ?" ka va tih chuan ka chhanna hmuh chuan min tiphu chiang kher mai. "I lo lam tyam hle my, comtee-naa lam k hmuh voi1na"

Ka harh chhuak thut hian ka hria, 'Eeeee... Zonet Live ah kan lang a ni chiang mai, e khai aw, van hit lo tak!' tia rilru buai taka ka inngaihtuah lai chuan inchhung ka lut a. Ka nu lo mut tum mek chuan, "Lalramhlun, in va zahpuiawm ve a, khatia lam chiam kher a ngai a mi!" tiin min lo hau nghal bawk nen, engkim chu ka chiang ta vek mai. "Zama lawm, a mawl lutuk a, lam a rawt a, kei chuan ka duh lova, Tluangtea leh Ricky ten min pawt tho lui alawm" tiin thiam inchantir tum deuhin ka chhang a. Zama kher kher chu aw, a ti 'bam vek! Amah vangin Mamawiin min hriat chhuah phah vek ka ti rilru a, ka nuin min la hau zui bawk. Zama chu ka haw thar ta thut a, Tluangtea leh Ricky pawh ka ngei phah deuh hial a.

I TIHSUAL KHA PAWM MAI RAWH...
Ka mut hmunah chuan ka rilru a hah khawp mai a, engtin nge ka tih ang aw! Mamawii rilru tur chu ka dawn a, a thiannu birthday-ah hlim takin kan kal dun ang chu tia min lo beisei em em laiin committee ka neih thuin ka lo chhang si. A hnual tawh sa teh lul nen, committee daih tura min ngaih kha, TV-ah ka lo lam haih haih mai si ale. A va thinrim dawn tak em! Kan va inbum lo chiang ve le aw... "Comtee membr cu n va tam ve!" tia message a rawn thawn te chu ka hrethiam chiang ta kher mai! Ni e, kan tam khawp mai, Chanmari Hall khat tlatin kan awm! TV-a live-a lan chu a lo ropui lo ngei mai kei ka tan chuan, ka pian a hnu lama mipui zinga ka vawik khat lamnah nasa takin ka duh ber pawi ka sawi ta si aleeh! Zama vang vek! A thil rawn rawt kha a tul lo ngawt mai! Tluangtea leh Ricky te kha a, an va'n mawl tak, min rawn pawt tho lui kher kher a niiiii!

Mahse, ka han ngaihtuah chiang leh a, ka thiante ho kha mawhpuh ka tum ngawt nain, he ka buaina kaikuang ber chu keimah ngei hi ka ni reng si a, dawt kha lo rilh loin thudik lo sawi mai ila tha tur a ni a le... Ka ngaihtuah thui zel a, thil dik lo leh thil tha lo a lo thlen hian enga ti nge midang mawhpuh tur hi kan zawn zel le, enga ti nge 'blame' tur hi kan hriat theih em em le, enga ti nge keimahni hian kan thil tihsualah mawhphurhna kan lak duh miah loh le tiin. Drug addict thenkhatin an tih chhanah an thiante an han puh ringawt ka dem viau thinte chu keimah ngei pawh ka lo bang bik lo a nih hi, thiante avanga zu in ta nia insawite nen pawh ka danglam bik love tiin ka rilru a kal thui ta hle mai a.Dawt pakhat sawi chuan a khuh nan dawt dang pasarih sawi a ngai an tih te chu keimah min tihchhanah ka ngai deuh roh a. "I thil tih sualah mawhpuh tur dang i zawn chhung chu i insiam tha tak tak ngai lo ang a, i puitling thei bawk lo ang" tia kan Sir-in a sawi te chu ka hre chhuak a, ka pawm ta hle mai a.

Tichuan, Mamawii chu dawt hrilh leh ngai reng reng tawh lo turin ka rilru ka siam ta a.

(Lalmizoidol, ka hua che, mahse, ka lawm tho e..)