‎"A MAMAWH EM EM LAI CHE KHAN KHAWNGE I AWM?"

ICU kawngkhar a rawn inhawng a, doctor rawn chhuak a hmuh veleh rang zetin Pi Jenny chu a thutna atang chuan rang zetin a tho a, hlauthawng tak thin phu dep dep chungin "Engtin nge ...? Eng nge chanchin ? Bawihtea chu engtin nge a awm zel ? Engtin nge in tih ? A tha em ? A hmuh theih em ? Ka hmu thei ang em ?" tiin zawhna chhan sen loh doctor chu a zawt nghal mawlh mawlh a. Doctor chuan a chal dawm vang vang chungin, "Ka pi, a pawi ka ti khawp mai, kan theihtawp chu kan chhuah a.." tih bak a sawi thei lo, Pi Zuali chuan engkim a hre thiam nghal vek. A thutna ngaiah chuan a thu zawi hnawk a, a fapa chu a awm ta lo tih a hrethiam nghal.

A inhup a, a mittui a tla zawih zawih a, a thinlung chhung chu a rum vawng vawng a, "Aw Lalpa, i rorelna hi eng nge a awm zia ? Naupang leh zelin cancer an vei ? Ka fapa neihchhun hi engtin nge min laksak theih ? I hnenah vawi tam tak a tawngtai ve thin si a, enga ti nge a nunna i zuah duh loh ? A mamawh em em lai che khan khawiah nge i awm ? I hming a lam lai kha i hre lo em ni ? I tanpuina dila a tawngtai lai khan khawiah nge i awm ? Engkimtithei Pathian kan nei alawm tiin ka thlamuan ve fo thin a, i hmaa tih tak meuha kan thingthit dun laite khan khawnge i awm ?" tiin Pathian a dem mawlh mawlh a.

"Ka pi, min lo hrethiam lawk la, hei i fapa ruang kan buatsaih fel a, university lama kan thawn hmain va lut ta che" tiin doctor chuan a rawn koh takah chuan a fapa ruang an tuam hlun bulah chuan a va kal a. A fapa hmai vawt thler chu a khawih a, a thlarau chuan a taksa chu a chhuahsan tawh tih hriat hle mahse a hmel chu thlamuang hmel em em hian a hria a. A fapain a thih huna a taksa university lama donate a duh tih a hrilh lai chu a mitthlaah a rawn lang a. A tirah chuan a phal lova, mahse, a fapain, "Ka nu, ka thih hnuahte chuan ka taksa hi ka hmang tangkai tawh dawn chuang hlei nem, keimah ang bawka mipa naupang cancer vei ten an nunna ni khat tal pawhsei saka an awm a, an nute bula nikhat dang an awm leh theihna a lo nih hlauh chuan a hlu dawn em asin! Ka nu, ni khat dang tal hi i bulah la awm thei ila ka va'n ti tak em aw... ka nu, ka hmangaih che ka nu" a tih siam siam laite chu chiang em em mai hian a mitthlaah a rawn lang a.

Thla thum dawn damdawi ina an awm hnua a vawi khatna atan amah chauhin an inchhungah chuan a lut leh ta a. A fapa room-ah chuan a lut tlang nghal a, a han hawi kual vela, bangahte chuan a fapain poster hrang hrang a tarte chu a ngai ang angin a la awm vek a, Isua, spiderman, superman, batman leh an school sports-a high jump-a lawmman a lak tuma a thlalakte, summer vacation an neih tuma an thiante nena bag ak puar luah chunga tlangram thingkara an lakte chu a ngai ngaiin a lo la in tar vek mai a. A pheikhawk bawmah pheikhawk intlar thap zinga pakhat phei chu a birthday-a a leisak, mahse bun pawh a la bun hman loh a ni a. Toys hrang hrang pawh wardrope chungah a lo inrem khawm thlap a, neitu leh enkawltu an nei tawh lo tih an inhre ve ni awm takin an ngui nghiai hian a hre hial a.

A hawina lam apiangah chuan a fapa sulhnu a hmu a, lungchhe em emin a fapa khumah chuan a bawk thlawp a, lukhamah hmai phumin a tap ta hawm hawm mai a. Chutia a tah lai chuan lukham hnuaiah chuan eng emaw ni hi a khawih fu a, a'n enchiang chu lehkhathawn a lo ni reng mai a. Tu ta tur nge maw ni le ti rilru chungin rang takin a hawng nghal rawk rawk a. A chhunga thu inziak a han chhiar chiah chu a phu chiang kher mai.

" Ka nu duh tak,

'Ka hmangaih che' tih hrilh tur chein i bulah awm tawh lo mahila, ka hmangaih em em che a nia. Min ngai dawn lutuk tih ka hria a, keipawhin ka ngai tak zet che. Engtik niah emaw chuan kan la inhmu leh ngei ang. Kan inhmuh leh hma chu i lunglen lutuk loh nan fa lo la la, (I duh phawt chuan kei chuan ka rem ti e). Mipa a nih chuan ka roomah khan a awm ang a, ka pheikhawk thar kha i lo pe ang a, ka toys zawng zawng pawh kha nei vek rawh se. Hmeichhia a nih erawh chuan hmeichhe naupang lawm tur ka neih loh em avangin barbie vel i lo lei sak mai dawn nia.

Tuna ka awmna chu a fai em em a, a mawiin a nuam bawk si a, ka thlen veleh hmana ka pi leh ka pu kha an lo awm a, kan inhmu a, a nuam lutuk. Isua pawh ka hmu a, mahse, a thlalak ka rooma ka tar ang kha a ni miah lo, a fel lutuk, min duat bawk sia, i lehkha tur ka ziah pawh hi a vantirkoh Gabriela a rawn pek tir dawn che a.

Ih maw, nu, tunah chuan na ka nei tawh miah lo. Cancer ka nei tawh miah lo a nia aw... Na tuara ka awm reng kha Isuain a phal lova, ka natna zawng zawng kha min lak bo sak vek tawh! Ka nu, keimah vangin tap tawh suh aw, na ka nei tawh lova, Isuan tuma min tihnat a phal tawh lo, min veng tlat tawh!

E... ka sawi theihnghilh tep, ih maw... ka kalsan lai che a, 'A MAMAWH EM EM LAI CHE KHAN KHAWIAH NGE I AWM ?' tia i zawhna kha Isuan lo hrilh rawh a tia, 'Mihring ka chan laia Kross-a min khenbeh lai khan i zawhna chiah hi Ka Pa hnenah ka lo zawt ve tawh asin, mahse, engtik lai pawhin min lo awm pui renga, min lo kalsan ngai reng reng lo. Chutiang chiah chuan, i fapain min mamawh em em lai khan a bulah ka awm reng a sin!' a ti.

I lo kal ve hunah mi tam takin an lo hmuak ang che. Mi tam tak zingah chuan kei leh ka pi leh ka puin hma kan rawn hruai ang. Nghakhlel takin kan lo thlir reng che.

Ka nu, ka hmangaih che."