COFFEE AL CHU A THLUM

 
A hmuhna hmasa ber chu a thianpa birthday party a ni a. A hmelthain a piante a nalh bawk a, mipaho chuan an bawr deuh laih laih reng a. Ani ve thung chu tlangval naran ve mai anih avangin tuman an uksak lem hlei lova.

Party a zawh hnu chuan zah pawh dawn lovin coffee in puiah a sawm ve ta ngawt a. Hmeichhe hawihhawm tak a lo nih avangin a lo remti ve mai bawk a. Tichuan coffee dawr nuam zet maiah an chawl dun a, coffee in puia sawm e ti lo chuan sawi tur reng reng a hre lova, a lai chhe der a ni ngawt mai a. Hmeichhia chuan chutia han thut ngawih dun reng chu nuam a tih loh em avangin haw rawt mai a tum a. 

Mahse, chutih lai tak chuan, “Chi a awm em ? Coffee-ah hian tlem ka telh duh a..” tiin waiter chu a ko ta lauh lauh a. Midang awm ve chuan mak tih hmel zet hian an lo en thap mai a, ani chu zak tih hriat tak hian a sen tan tan a. Chi chu a coffee in tura telh pah chuan, “Ka naupan laiin tuipui kamah kan cheng thin a, tuipui al leh chu mi hmuna cheng ka chhungte leh thiante kha ka rilruah hian an awm reng thin, ka ngai thei lutuk a, coffee al ka in apiangin engtin emaw ni ka awm a, a nuam veng veng hian ka hre thin a,” a tih lai chuan nula chuan mak tih hmel deuh hian a lo ngaithla a. Nula chuan chu pa mize mak dangdai tak chu a ngaina ru ta hle mai a, tichuan, a chhungte chanchin leh naupan lai chanchin te chu a hrilh ve ta a. Mak tak main an titi tui dun ta hle a, an lo inmil em em mai bawk a.

Kum thum hnuah chuan an innei ta hial a. An induh tawn em em a, nupa hlim tak an ni chho dun ta zel a. An nu chuan coffee a siam sak reng rengin chi a telh sak ngei ngei thin, coffee al a duh zia a hriat tawh miau avangin. 

Kum 50 a a ral chuan an pa chuan a boral san ta a, a thih hmaa a lehkha hnutchhiahah chuan, “Ka duh tak, I laka ka damchhunga dawta ka nun avangin min ngaidam ang che. Kan inhmuh hmasak ber tuma coffee al ka duhthu ka sawi kha dawt liau liau a ni. Ka nervous em avangin ka sawi tur hre lovin ka lam ringawt a, coffee al kha kan inkawm tanna a ni ang tih reng reng ka ngaituah pha lo. Vawi tam tak thudik hrilh che ka tum thin a, ka sawi ngam lo leh thin. Mahse, kha bak kha chu ka damchhunga dawt hrilh leh ngai tawh lo tur che in ka intiam ta a ni. Tunah chuan ka thi dawn ta a, thudik tak chu ka hrilh ngam ve ta chauh che a ni. Coffee al kha a tui lo khawp mai, a tui lo tak zet a ni, mahse, ka damchhunga ka in kha a tul ta si a. Nang ka tawng che hi ka inchhir ngai lo a, ka hlimna ber I ni reng si a. Piang nawn leh dawn pawh ni ila damchhung hun hman dun puia’n tawn leh che hi ka duhthusam a ni, coffee al in ziah pawh ngai leh dawn mahse…” 

A hnua a thiante’n fiamthua “Coffee al chu engtin chiah nge a awm a?” tia an fiam changte hian ani chuan, “It’s SWEET” tiin a chhang thin a ni.