NULA RIM VAWI HNIHNA...
(In lo tawng ve tawh em?lol)

Tun tum kan nula rim tur chu Sarah-i te ina leng tur ang ngawt kha chu kan ni tawh bik lova, a chhan chu an in kan hre chiang ve tawk tlat, kan vengchhung a mi ngei an nih avangin. Kan thianzaho ngaite bawk kan ni a.Kan thianzaho chuan cho eikhamah Thantei dawrteah chuan kan innghak khawm thap a. Mahni tawka nalh theih tawpin kan inchei theuh a, mahse, Zuala hi chu amah a thau bawk a, a inchei nasat poh leh bedding tawn luih vak a ang a, mahse, zanin chu present fun sual a ang ber zawk.

BUAINA HMASA BER :
Nilai zan a ni a, inkhawm an kal rem ta maw tihin an in lam pan chuan kan kal ta tham tham a. An in kan thlen hma deuh chuan buaina kan nei leh ta tlat! An in atanga a him chin nia kan hriat, mahse an in hmuh theih siah chuan kan ding khawm laih a. Kan buaina chu a pa chu a inkhawm ngei ang em, lo inkhawm lo ta se engtin nge niang, a inkhawm leh khawm loh engtin nge kan hriat ang tihah a ni a. A pa hi kan veng paah chuan kan zah ber leh kan hlauh ber a ni a. Tunah pawh hian a inkhawm daih dawn avanga leng ngam chauh kan ni. Mahse, hetia kan han dinkhawm lehna chhan pawh hi kohhran upa min a ni a, a inkhawm ngei ngei thin ti mahila, a lo inkhawm loh palh tum te pawh a ni ve thei, a hritlang avangin inah a lo awm reng pawh a ni thei, office hna tul avangin inah a awm mai thei bawk. Kan dawn thui tlang hlawm kher mai, dawn thui lo thei pawh kan ni lo,kan va luh a, a lo awm vaih chuan kan chhe vek a ni mai tih kan hre chiang hlawm em a ni.

PLAN A B C :
Tih dan tur kan han sawi khawm a, kan ngaihdan theuh chu tha berah kan ngai vek a. Midang rawt apiang sawiselna kan lo nei zel a. A tawpah chuan kan zinga inti fing ber mai Rina ngei chuan a thluak a rawn vawrh leh ta. A ni hi kan mangan huna idea fahrah te te zawm loh thei loh si rawn thawh chhuaktua kan neih a ni reng a. Hmawlh a la a, leiah chuan Plan A B C a rawn thai chhuak ta.

Plan A - Thawm dim thei ang berin an stepah kan chhuk thla ang a, kawngka bul kan thlen hunah bengchheng hauh lovin Zuala chuan kei chu min chhipchhuan anga, kawngkapui chunga ventilator inhawng atang chuan inchhungah tute nge awm ka bih kual vek tur a ni. A pa a awm lo ngei a ni tih ka chian hnuah dimtein Zuala chuan min hlang thla leh ang a, midang tuizem phena lo biru ho chu lo kal turin ka signal ang a. TIchuan, ngampa takin kawngka kan kik tawh mai dawn a ni.

Plan B - A pa a lo awm a nih chuan rang takin ka chhuk ang a, thawm nei lo thei ang berin kan tlan haw mai ang. Thantei dawrah kan leng mai ang.

Plan C - A pa a lo awm a, min rawn hmu palh hlauh a nih chuan mahni rem chan dan ang angin kan tlan vak ang a, kawnah innghahkhawm leh vek tur a ni.

PLAN-A A FAIL:
A bu ang thlapin Plan-A ang chuan kan che tan ta a. Kei leh Zuala chu thawm dim thei ang berin stepah chuan kan chhuk thla a. Stepa kan chhuk thla lai min lo hmutu chu awm se 'step rah chim an va hlau awm ve le' min ti ngei ang. Mi dang ho zawng chu step sira syntex lianpui phenah chuan a thim lai chuhin an lo biru khiau a. An kawngkhar bul chu kan zuk thleng thla ta a, Zuala chu a kun du a, a kokiah chuan ka lawn ta a. Ka lawn pial deuh phat phat a, mahse, min zo hrim a, min koki-chhuan ta luah mai a. Kawngkapui chunga ventilator in hawng chu ka bih hman tawk tihah chuan kawngkhar chu a ri ta rawk a, a rawn inhawng ta heu mai a. A nu ngei mai chuan a rawn hawng chu niin, tunge phu nasa zawk pawh ka hre lo.Keini lah chu kan lo in chhipchhuan ut mai bawk si a, "Aaaaaaahh" tih pahin a tawlh dawrhin ka hria. Keini lah phu nasa bawk, Zuala chuan min thlauh loh chauh a. "Eng nge ni ta ka nu" tiin an rawn te chul a, a fate ho chu an rawn tlan khawm ta rup rup mai a. Keini lah chet ngaihna hre tawh hek lo, ngawi rengin che lo lekin a ngai ngaiin kan inchhipchhuan ut mai si a. Ka buai vek tawh, chhuk nachang pawh ka hre tawh lo, Zuala lah chuan min chhuktir nachang hre bik hek suh. Hnar chu iskut tiat tiat hi a ni tawh a, khuk chem chema khuk ral daih a va chakawm teh lul em! Lalrina plan-A chu leh! Ka hnek a ba chiang lutuk!Hetih laia midang syntex phena biru te ka awh dan chu pui tak a ni.

"Eng nge in tih reng reng a?" lungawi lo hmel zet hian Rebecki nu chuan a ti a. Chhan ngaihna pawh kan hre lo, Zuala chuan ngawi reng hian min chhipchuan lut ta ut ut a. An chhungkua chuan mak min ti ngang aniang, eng mah pawh an sawi bik lo, ngawi rengin min thlir thap a. Zuala'n min nghah laite chuan samak hmuh hian min hmuin ka hria. Mahse, vanneihthlak takin Rebecki chu a hmel that ang bawkin a lo fing fel a. A nu hnenah chuan schoola a thiante kan nih thu leh fiamthu an duh ziate a hrilh ta vat vat a. A nu chu nu fel ngang a lo ni bawk aniang kan fiamthuah a la ve ta a. Kan nu leh pa hmingte a nu chuan min zawt a, sande sikul naupang fel tak ang maiin kut hnung suih titih hian kan chhang vat vat a.A nu chuan min be sawm peih bawk a, a rei deuh hnu chuan nuam kan ti dun ta phian a. Kan thian syntex phena biru ho chu kan awt ta lo kher mai!

BUAINA PAHNIHNA:
Door bell a ri tlang tlang a. Zuala nen chuan kan in en vat a. Kan rilru chu a inhmu kher mai, kan thian dangte khan hetia Rebecki te inchhunga kan awm ta vang vang mai chu min thik a ni ngei ang a, zah pawh dawn lovin rawn luh an tum ve a ni ngei ang tih melhin an inmelh a.

Rebecki'n kawngka a va hawng chu kan thiante syntex phena biru ho ngei mai chu an rawn inzui lut tham tham a. Zuala chu ka mitin 'hre lo der tlat ang' tiin ka va signal zauh a, a lo bu nghauh a. Thuthlenga zak hmel deuh taka an rawn thut ve laite chuan hre ngai miah lo ang mai hian kan lo awm a. Keini lah inla tlangnel tawh hmel zetin 'easy' tawkin sofa-ah chuan kan lo thu vel a. Thiante chuan min awt se ti em em hian Zuala nen chuan kan han awm kual vel a. Mawia inlafel, inla zakzum leh inla inthlahrung vel chu a kil thlang lampang tukverh bula side table an dahah chuan a thu tlat a. Rebecki chuan, "Hetah lo thu phei ve rawh" a tih pawhin "A ngai lo, helai hi a nuam" a ti tlat a, Rina te chuan an lo hui ve bawk a. Mahse, a tang ve laklawh tawh bawk nen,side table-ah chuan a thu ta reng a.

Rebecki nau kum 10 mi awm vel hi pindan atangin a rawn chhuak a, a rawn nui ta vak vak mai a. A u Rebecki chu a beng bulah a va hrilh ru a, Rebecki chu nuih insum tih hriat zet hian a nau hnenah chuan, "I mawl lutuk, va mu mai mai rawh" a ti a. "Vawiinah an Miss tih dan min hrilh a, a a tak tak ani" tia thup mawi tum mahse, a nuih zat hmel danah chuan kan zingah chuan tu emaw ber dik lo chu kan awm chiang mai ti niawm takin ngaihthalo takin kan vai chuan kan indap ru a. 'Ka zipperte hi a lo inhawng reng a nianga'tiin ka zuk endik a,a tha si, Zuala lam hawiin 'ka hmaiah eng nge awm? tiin ka va signal a, 'engmah a awm lo' tih nan a lu a lo thing ve mai a. Rebecki chuan, "Thingpui ka va lum ang e" tih leh thawh a rual a, choka lamah chuan hmanhmawh zet inchhuih pah deuh nawk nawkin a phei a, a thawh laia a hmel awmdan kha ka lo enchiang kher a, a nuih za lutuk insum zo lo inthiarfihlim tum a ni tih ka man thiam nghal mai a.

Chutah le, Lalnuna chu a rawn nui ta,Mawia chu a kawk a, a nui dir ta char char mai a. "I kawr kha.." a nuih za lutuk chu sawi pawh a sawi tha thei lo va, a kawk ngawt ngawt a. Mawia lah a phawk hru a, "Eng ngeeeee.." a lo ti bui bui a. Kan han enchianga Mawia kawr leh tukverh parda(purdah) inzar chu a rawng leh a tial dan zawng zawng nen a lo in ang chiah chu niin, kan han nui tha leh tak tak mai a. Nichina Rebecki leh a nau nuih vak vak nachhan chu kan hrethiam ta a. Tleirawl nuih duh lai a ni bawk a, insum kan tum poh leh a za mai si a. Mawia lah chu zah ahnekin a nuih za ber berah a la tang zui! Rebecki'n thingpui a rawn chawi luh laite chuan a la nui khur dut dut a. Mawia chu thingpui nen chuan a rawn pan hmasa ber a. Thingpui a la kang hman chiah tihah chuan a side table thutlai chu a ri thawt a, a chim ta rup mai a. Chiang zet hian hnung lamah chuan a inbin thla ta nuaih mai a. A thingpui ken chuan a la inleih zui, a sa ti bawk si chu rang em em hian a rawn tho a. A intuai nawk nawk a, a kawr chu a huh pur a, chhuatah chuan thingpui chu a baw nuaih bawk si. Side table lah chu a ke a chhe vek bawk nen, thingpui leihna sa ti bawk, zak bawk si, a hmel manganna zawng zawng lo lang chhuak chu khawngaihthlak tak hi a ni tawp mai! Keini lah chuan khawngaih chu sawi loh kan nuih za lutuk chu kan vai chuan pawnah kan tlan chhuah san ta ringawt a. An veranda ah chuan kan va nui let tawp tawp ni ber hian ka hria. Sawi ngaihna a awm lo, a za em a ni.

BUAINA TAWP BER, BUAINA VAWRTAWP
Kan va luh leh chuan Mawia chu thuthlengsei berah chuan a lo thu tawh a, 'a tuka talh mai tur' ang mai hian a lo thu ngui bur a. Towel hi an lo pe ni ngei tur a ni, a nghawng leh awm vel chu towel chuan a lo hru a lo hru a. A side table thutchhiat chu an lo dah bo tawh a ni ngei ang, a lo awm tawh lova. A hmel kan va hmu leh chu nuih a za thar leh a, mahse, Rebecki leh a nute chu kan zah avangin kan nui tha ngam tawh lova, insum erawh chu la har tak a ni. Kan thil tawn avang chuan kan inpawh ta phian a, fiamthute kan thawh zui a, hlim takin kan nui tlang leh dar dar thin. Nuam kan ti tlang hlawm ta ngang mai a, kan nuih dar dar laia kawngkhar rawn inhawng leh 'sakei' rawn luh lai pawh kan lo hre lo va. Zuala pek chuan "A le" phawk hru hian a ti a, a hawina lam kan va en chiah chu kan thu ngil nghal awt a. Nuih za a tawp nghal hmak a, hmel a chiai nghal nuaih mai bawk a. Chu 'sakei' tarmit vuah chuan pindan lam a pan mek a, a kut dinglamin Bible leh Nilai Thupui tih vel a keng a, lehlamin midum nihliap sei chi a hawl bawk a. Mawia vang vek! Side table ah te han thut reng reng, mawl lutuk! A chetchhiat lutuk vangin a pa a lo haw hman phah! Aaa.. he pa hi chu a mawl hrim hrim, vawikhat mah nula rimnaah hruai ve tawh lo ila a tha ang. Mawl leh lutuk mai!

'Khuavang kal lai' chu nep te, kan ngawi kar hlawm a, kan thianho chuan kan inmelh hrek hrek a. Mawia pawh a hmalawka a nuih nasat bak bak nen, thlahrang hmu ang maiin a phawk hra leh tawh a. Kan nula rim Rebecki ber lah pawh chuan nuam a ti chiah lo tih ka hre mai. A pa hi chu 'sakei' tih hlira kan lo sawi thin kha a ni a, tumah hauh hreh a nei lova, khawlaiah pawh mi hau hrep duh mai leh mi zingah pawh a fate hauh hreh lo, a tul chuan ti hrep duh mai kha a ni ve reng a. Pindan a luh veleh haw ka rawt ang chu ka tih rilruk mek lai chuan pindana lut ta lo chuan a rawn inher a, kan thutna lam chu a rawn pan chhut chhut a. A midum nihliap chhuata a hawl ri te chu ring hle hian ka hria a.

Kan bul a rawn thlen chuan a tarmit a hlip te te a, uluk zet hian min han melh kual ta a nih chu! Kan lo ip chawih chawih a, kawchhung thleng hian a hmutlang vek thei ni mai hian ka lo hria a. Min en kual kim ta maw tihah a fanu chu a kawk a, "Nang kha, va mu rawh" a tih rual rual chuan Rebecki chu zak hmel zet hian a tho a, bedroom lam a pan nghal a. "Tunge i hming?" tih pahin Rina bulah chuan a thu a, hlau tih hriat zet hian "Lalrinzuala" Rina chuan a ti tham tuak a. "Pawl eng zat nge i nih tawh?" a'n ti leh a. "Pawl sawmpahnih" tiin a chhang khur dar dar a. Kan vai chuan a mal malin kan hming leh pawl zat min zawt diat diat a. Interview ka neih tawh zawng zawngah chuan ka la hlauh ber leh ka la zam ber tum a ni e.

"Hmmm.. A tha e. Tunah hian haw nghal ula. Lehkha va zir rawh u. Ka fanu hi BA in pass hma chu rawn rim leh tawh suh u" tih pah chuan min en kual dan dan a. Inthlahrung em em hian kan tho tham tham a, Zuala nena kan inchhipchhuan luhna kawngkaah ngei chuan kan thianzaho chuan sala hralh tur an sawi ang maia lungngai hmel zet hian kan inzui chhuak ta hnak hnak a. Step kan kal laite chuan tumah tawng ngam pawh kan awm lo, ngawi rengin kan kal zel a. Kan len dawna standing committee kan neihna hmun kha kan han thleng a, he lai hi chu a him tawhin kan hre tlang a ni ngei ang, kan ding a, kan inen kual a. Chutah le, kan inrin loh lai takin Lalnuna chuan ring fe hian, "Lal sakei,hmelchhepa" tia zuk au pah chuan a tlan thut a, chak mang khenga umzuiin kan thlanchhe ve nghal a. Thantei dawrte thleng chuan speed ngai patin kan tlan thleng rak a.

He inah pawh hian kan MA pass hnu pawhin kan leng leh ta ngai lo!