KA LO CHHIAR THIAM NGAI LO A...

"A thar thui tir a ngai hleinem, kawrte chu i ngah lutuk, bakah pawisa pawh ka nei lo" ka nu chuan a ti a."Midang pawhin kawr thar an thui tir vek dawn, ninawm eee! Zualite ho phei chuan pathum lai asin an thui tir dawn" tiin ka chhang a, ka dang duh bik lova. Ka chhungte chungah chuan ka thin a rim em em mai a.

Kan kohhranin inkhawmpui kan thleng dawna, usher tur zingah min thlang tel ve hlauh mai a. Keini angte min thlan ve duh avangin ka lawm hle nangin ka rilru chuan ka huphurh ru khawp mai. Eng dang vanga huphurh ru pawh ka ni lova, a chhan ber chu ka thiante chuan kawrthar nalh tak tak an thui tir leh sup sup ang a, pheikhawk nalh leh man to tak tak kha an lei thar leh ngei dawn tih ka hre sa a. Zirlai mai ka la nih avang leh ka chhungten pawisa an nei dawn lo tih ka hriat lawk sa reng avangin hrehawm ka ti rilru hle mai a. Ka nu hnena sawi ka huphurh lawk ang ngeiin ka nu chuan min chhang ta reng a, mahse, vanneihthlak takin kawr pakhat thuina man leh puan man tur chu min pe ve hram a.

BAZAR LAMAH...
Thiante ho nen chuan inkhawmpui ami tur leiin kan bazar tlang ta a. Ka rin lawk ang ngeiin ka thiante ho chuan puan man to tak takte chu an pawt pharh kual vel a. Kei lah chuan mawi ve tho si, man tlawm chi ka lo melh ru ve reng bawk a. An puan leite lah chu a man to ka lo ti ru em em a, an bula bazar chu nuam lo ka ti khawp mai. Pheikhawkte lah chu bun hnih bun thum manto leh nalh zet zet an lei a, kei lahin pakhat pawh ka lei ve thei si lova, ka rilru a lo na ru ngawih ngawih mai a ni.

Thiante ho lah chuan pheikhawk nalh tak tak intlar tuarh ho chu an phawi thla zung zung a, an han bun chhin a, 'A nalh em ?' tiin min rawn sek lehnghal a. A chang leh 'Eng rawng hi nge ka inhmeh zawk?' tiin rawng hrang hrang bun kual pah chuan min zawt sek bawk a. 'Pakhat pawh han lei ve theih loh chu' ka ti rilru a, ka chhungrilah chuan ka inkhawngaih em em a, 'Nei pha ve lo nih chu kohhranah pawh a inhman ve theih loh anih hi' tiin ka lo inngaihtuah lungpuam a. Ka nu leh pate chungah ka thin a rim thar a, 'Thil tih dawn apianga pawisa nei lo tih reng mai, ka inkhawm tawh lo tawp ang' te ka ti rilru a. Chhungril lama tawt up up siin thiante zingah chuan lem takin ka nui der a, khi sang pahin, "Kha kha i inhmeh tawp, a sen kha la rawh" te ka lo tia. 'A dum kha i kawr nen a in matching zawk, la zawk rawh' tihte chu ka tih ve theih tawk a ni mai a, 'leitu' ni lova thiante leitur 'endik saktu' nih chu nuam lo ka ti kher mai.

Kan bazar chu rei ka ti khawp mai a, ka thiante hovin thil lei tur an enkualte chu leina tur ka neih ve loh avangin ka lo ning ru em em mai a. Haw vat vat ka chak a, kan intluk tlang lo lutuk chuan ka mood a ti off a, vanduai bik riau hian ka inhria a, khawngaihthlak em em hian ka inhre bawk a. Ka chanah chuan han dem em em tur ka hre bawk si lo, hlawh ka la nei lova,chhungte chawmhlawm ka ni a, ka chhungte lah duh hun huna kawr thar min lei turin an hausa tawk bawk si lo.

MAHNI INKHAWNGAIHNA...
Kan haw kawngtluan chuan ka mitthlain inkhawmpui ni lo thlen hun tur chu a hmu lawk a, thiante hovin an thawmhnaw leh pheikhawk sang nalh tak takte chu an rawn bun chhuak ang a. An han in ensak vel ang a, khawi dawra a lei nge tih te, eng zat man nge tih te an han inzawt vel ang a, kei chuan pheikhawk hlui bawk ka bun chhuak leh dawn chu a ni si a. Theihtawpin kohhranahte kan inhmang ve a, chhungte pawh hian min hriatthiam ve tur ania, thiante neih laia nei lo bik nih hrehawm ziate hi an hre ve phak si lova. Tum khat phei chu ka mittui hi a rawn tla sawk a, thiante hmuh hlau takin ka inhru nghal vat a, an thil lei thar sawi ta reng renga an buai hlawm avangin min lo ngaihsak lem lo hlauh a.

In kan thlen hnu pawhin tumah ka be duh lova, ka roomah ka lut tlang nghal a, khumah ka bawk thlawpa, rizaiin ka inlukhuh a, ka tap ta zawih zawih a. Chaw pawh ei lovin ka mu tlang nghal ta daih a, ka nuin min biak tawng tum hle mahsela, a hlawhchham chiang kher mai. Zanah lah ka muhil tha thei lo, keimah leh keimah ka inngaihtuah a, ka inkhawngaih lutuk a,ka tap leh thin. Inkhawmpui nia thil awm dan tur zawng zawngte chu ka mitthlaah a awm reng a, ngaihtuah loh ka tum pawhin anni pheikhawk man to leh nalh thar sur kara ka thing bik em em tur chuan ka rilru a luah lo thei si lo. Khawvar dawn hnaih lamah chuan ka hriat loh karin ka lo muhil ve ta mai a.

KA TLUK LOH HMEICHHE NAUPANG KEBAI...
Ka mut har em avangin ka'n harh meuh chuan a lo tlai tawh hle mai a, inrinni chu ni lo phei se, kan in bul lawka office chu a ri leh mum mum tawh ang. Ka riltam em avangin ka va tho chhuak a, ka inphih fai vel hnuin Pu Kima thingpui dawra chow vel ei tumin kan in kawt maia kawngpui chu ka kan a. Pu Kima dawr ka thleng tep tawh tihah chuan tu emaw hian min rawn ko a, hnung lam hawi let paha ka kal chu tu emaw hi ka su chawrh mai a,"Ui ka nu! Ka duh thei lo" ka tia, ka te deuh vak a, ka phu zawk chiang kher mai,

Ka thil sut ka'n en chiang chu hmeichhe naupang tih dawna nula ve lek lek tawh hi ka lo su thal tawp hi a lo ni a. A ri deuh thawk a, "A na em ? A na em ? Ui ka tihpalh lutuk' tiin inthiamlo leh mangang deuh hian ka zuk kai tho dawn a, a tho mai thei ta lo! Ka'n en chianga, a ke lehlam a lo bul reng mai! Ka phu nasa kher mai, ka hlauthawng zual sauh a. Ri deuh thawk pawh kha a tluk ruala zakdawh tiang tlu ri a lo ni a. Midang an rawn tlan khawm tak tak a, min rawn puia, a zakdawh tiang an rawn chhar sak a, a inhawlh ding ve leh ta mai a. Ka zak ru khawp mai a, "Ka tihpalh lutuk, ka lo hmu miah lo che a" ka ti mawlh mawlh a, ani lah chuan nui sang chung hian, "Tihpalh a nih kha, keipawhin ka lo en lo che alawm, a ho lutuk, engmah a na hleinem" a ti a, a hlim ta zawk emaw tih mai tur hian a nui har har a. "Hei engtin mah ka awm lo, inthiam lo duh reng reng suh" tia min nuih sang chung chuan a inhawl kal leh ta mai a.

A hnung atang chuan a inhawl kal bai auh auh chu ka thlir zui a, a ke lehlam chuan ka mit a la ta thut mai a. A ke lehlam bul chu ka en reng a, ka rilruah thu tam tak a rawn sawi nghal a, ka zak ta em em mai a (Ka sut thluk tawp laia midang rawn kal khawm tuk tuk ai khan ka zak fe zawk!). 'Saw nu sawn, pheikhawk bunna tur ke a nei tawh miah lo,mahse, hlim takin a nui thei tho!' tiin ka thinlungah chuan a rawn inthum rawn ta tlut tlut mai a. 'Saw nu sawn pheikhawk bun ve duh hle mahse a bunna tur ke a nei lo, pheikhawk thar nalh eltiang leh man to elkhen pawh lei mahse, bunna tur ke a nei tawh lo. Kei ve hi, pheikhawk bun tur nei lo pawh ka ni lova, leithar bun tur ka nei lo a ni mai. Mahse, kei chuan saw nu neih loh saw ka va nei hnem em!

Kei, chhungte biak theih loh khawpin ka thinrim a, ka titau a, tumah ka be duh lova, zankhuain mahni inkhawngaih avangin ka tap a. Mahse, saw nu ke bai, pheikhawk pawh nei lo, pheikhawk bunna tur ke pawh nei tawh lo, saw ka fimkhur loh avangin ka su thlu tawp a, thinrim ahnekin 'Engmah a na love' tiin min la nuih sang thei a. A ke neihchhun, a zakdawh tiang pahnih darh chuai khawpin ka su thlu a, mahse, hlim hmel pu takin, 'Tihpalh mai mai anih kha' tiin min la kalsan thei a nia leh!!! Kei hian ka malsawmna chhiar sen loh ka dawn hi ka lo hmu thiam lova, ka lo thinrim pui zawk hial maw! Thawmhnaw thar chu ka inkhawm chhan emaw ka lo ti a, Pathian fak leh chawimawi tura inkhawm tur kan nih zia ka lo manghilh der mai maw...! Isua nena kan inkar a tha em tih lam ai chuan 'Ka nalh em' tih chu ka lo thupui zawk a, Pathian a ropui lovang tih ai chuan 'Ka nalh lovang' tih ka lo hlau zawk a nih chu!

KA LO CHHIAR THIAM NGAI LO A
Chu hmeichhe naupang zakdawh tiang nena inhawl bai auh auh chu kawng kawia a liam thlengin ka thlir zui a, a . A liam chiah tihah chuan ka kun a, ka ke pahnihte chu ka zuk en a, ka vanneih zia leh Pathian malsawmna ka dawn nasat zia ka hrechhuak chiang kher mai! "Lalpa, min ngaidam rawh. Ka vanneih zia hi ka lo hre chiang ngai lova, i malsawmna ka dawnte hi KA LO CHHIAR THIAM NGAI LO A lo ni e. Min ngaidam ang che" tiin ka rilruin ka tawngtai mawlh mawlh a, a tawp lamah phei chuan "Lalpa ka lawm e, Lalpa, kawng engkimah ka lawm e" ka ti a.

Ka veng nghal duak a, Ka zang ta vek hian ka inhre hial thei nia. Inkhawmpui pawh chu lo thleng vat vat se tiin ka nghakhlel ta em em mai a, inkhawmpui lo awmna chhan leh a neitu dik tak ka hriatchian thar avangin! Ka thinlung chu hlimnain a khat a, nui ver ver chung leh phur em emin Pu Kima thingpui dawrah chuan ka lut ta a.