A SAKHMING KA SA E...LOL

"Khaw'nge a lum em mai" tih pahin tukverh ka hawng a, ka'n dakchhuak chu kawngpui sirah hian zu rui pakhat hi a kal pai tuang tuang a, a tlua, a thoa, a kal dawn chauha a tlu leh thin. Ka zuk enchian chuan LALDINGN

GHETA a lo ni reng mai a. 'Nimin tlaiah YMA duty ho khan LALTHIANGHLIMA nen an man dunin ka hre sia..' ka ti rilru a. "Khu pa khu St. pauls-ah kan kal ho thin, tunge a hming kha aw..?" tih pahin tlangval polythene khai bawr teuh chu ka thlir reng a. A hming ka hre chhuak zo ta hauh lova. Pu LALRINAWMA, eiruk avanga hmanni lawka an suspend tak fapa a ni tih erawh ka chiang si! 'E.. tak a, ka hre leh si, LALHRIATRENGA maw le..!' tih pahin ka chal kan dawm vang vang a.

Tuemaw hian kawngkhar an rawn kik ri dat dat a, ka va hawn chuan tleirawl pakhat hian inneih sawmna card nen a lo ding ran a. 'Kan fapa LALHMINGTHANGA leh..' tih thleng ka zuk chhiar hman a, kan veng mi chu a ni ve sia, ka va'n hre ngai lo em em! 'LALHMINGTHANGA..LALHMINGTHANGA..' ti nuah nuah chungin dawhkanah chuan ka dah mai a.

"Mama, nizana VANLALFELI kohhranin an phuar kha i hria em ?" tiin ka u chuan min rawn zawt a."Hre miah nang, ka thianpate taxi LALNUNMAWIA'n a lo tlan bo pui a, kan zawnpui avangin ka inkhawm hman ta lo a, tu fa nge a pai reng reng a? tia ka zawh chuan, ani chuan, "Aw, Vengthlanga a bialpa LALTHAFAMKIMA, pu ZIRTIRA fapa kha.." a ti a. "Ka hre leh si, hmanniah LALNUNNGILA'n an ar a ruksak kha, ka hria lawm" ka ti a.

Ka ril a tam deuh avangin vai thingpui dawr lamah inhnawh puar tumin ka chhuahsan ta a. He vai dawr neitu tak hi pu RAMHMANGAIHA a ni a, mahse, amah erawh chu dawrah hian a thu ngai lem lova. Thingpui nghah pah chuan chanchinbu ka han bih a, 'kum tling lo pawngsualtu man' tih chuan ka mit a la deuh a. 'Pu LALHMANGAIHA, kum 52 mi chu man a ni tawh e' tih ka chhiar thlen lai chuan thingpui a rawn thleng a, ka ril a tam tawh bawk a, chhang nen tui ti takin ka ei chhunzawm ta a.