NAUPANG KAWR SEN HA... (TRUE STORY)
(Naupang Special-in Sunday special min siam sak!)


"Kha lai mi kha... he lam lo hawi rawh.." tiin zirtirtu chu a au lauh lauh a. Mahse, chu naupangtê chuan a la hre chuang lo aniang, a thawhlawm tur ken cheng 5 thir chuan dawhkan chu a lo thai ngat ngat a.

"Kawrsen ha kha.. he lam..he lam..lam" a tih tak thak thak hnu chuan a thiante ho chuan an lo kheuh sap sap a, a rawn hawi ve ta chauh a. A rawn hawi chhuah chuan zirtirtuin a lo melh kur reng tih a hmu ta a,inthlahrung hmel zet hian a cheng nga thir ken chu a kawrhma ipteah chuan a thun zal zal a. A thiante ho melh deuh zak zak chung chuan an tih dan angin fel hmel takin a inkuangkuah ve ta sat sat nghal bawk a.

A hre lo tan chuan naupang ninhlei leh thuawih lo tak, sual leh luhlul tak amaw tih mai tur hi a ni reng a. Kohin a lo hawi tha duh lova, zai laiin a zai ve duh ngai hek lo, chang zir lahin a sawi ve duh bawk si lova tih mai tur hi a ni reng a. Mahse, a beng a that loh avangin ri a hre thei lova, chu chuan tawngtheilovah a siam a ni si a. Tunah hian Sande sikul, primary deppt. ah a awm a, ,zirtirtu thar an awm chang hian lo inhrilh hman lo palhte hi a awm ve a, chung ho hauh chu a tawk ve leh zauh thin. Naupang hmeltha leh duhawm tak a ni a, a ngo vang mai a, a kum rual pui te aiin a la thang duh lehnghal a. Han en mai chuan mipa naupang hmeltha tak, fel leh bright tak hmel a pu reng a ni.

Din hunah te hian a thianteho chezia enin muangchang bik hauh lovin a ding ve vat thin a. Tawngtai dawna kut suih turte pawh a hre tawh khawp mai. Mahse, vawi khat chu ka rilruah zawhna a rawn lang thut a, tawngtai dawn hian a maimitchhinga, a zawh hian a lo meng ve leh thlap a, engtin nge men hun a hriat le tih chu ka hre chak ta tlat mai a. Tichuan, tawngtai laiin ka lo meng ru a, ka lo en ru kar mai a. Rei vak lo hnuah chuan a rawn meng a, a thiante an lo la meng si lova, a maimitchhing tha leh a, chutiang chuan vawi li vel lai chu a ti a, a vawi nga mennaah chuan tawngtai chu a zova, a meng fuh ve ta ani!

Ka ngaihtuah chiang a, Mosia Tuipui Sen vuak chah te, Davida'n a vawmvira a aia palian elkhen Goliatha a vawmhlum dan te, Samsona chakzia te, Daniela te thianzaho meipui chhunga kang hlek lova an awm dan te kha hre thei ve se chuan ninhlei chu sawi loh mitkhap lo lekin a ngaithla ve ngei anga, mahse,zirtirtu chuan engpawh sawi sela, a tan chuan danglamna a awm si lo, hmui phun bak chan a nei si lo. Zirtirtu hmui phun ringawt en reng mai chu ani ang naupang hrisel tha pangai leh ninhlei rual ta nafam tan chuan a ninawm tur zia ka lo chhutpui ve a, a phak tawka hun khawhralna lo zawn ve mai bak tih tur a neih loh zia te ka ngaituah chuan, a ninhlei te chu ka thiam ta em em mai a.

Thei se chuan "Isu zaidam leh nunnem" tia a thiante an zai dal dal lai chuan ani pawhin awr phiar tawng tawngin Pathian chu a fak ve ngei ang mawle! Bible chang zirlaite pawhin awmhlei chu sawi loh a sawi ring ber ber leh a phur ber berah a tang lo ang tih tunge sawi thei le... tih thlengin ka ngaihtuah a. A hmel ka en thin a, ka khawngaih zual ta em em mai a. Tu pawh an tel lova kan awm theih hauh loh thian neih ve te a chak hle awm sia, thian kawm chak rual a ni a, thian infiam pui tur te a duh ve thin ngawt anga titein ka ngaihtuah ta zel a. Khawvela amah duat bertu a nu leh pa hmangaihna aw nem zaidam tak te chu a damchhungin a hre ngai dawn si lova tih ka ngaihtuah thlen phei chuan Pathian ka dem ta em em mai a.

Kut ke kim leh hriatna bo hauh lova kan lo piang ve ringawt lo lawmawm zia min ngaihtuah chhuah tir a, a dinhmuna ka zuk indah chhin a, ka tim uaih uaih thei hial a ni. Ani ang ni ta ila, tuna ka thian tam tak ka kawm ngeih em em hote, ka chhiat ber lai pawha ka bula ding tlat thin ho nen hian kan inkawm ngai dawn reng reng lo a ni tih te ka suangtuah thlen phei chuan ka tah a chhuak hial a. Min hmangaih em em tu ka nu leh pate min biakna tawngkam khat pawh ka bengin a hre ngai lo tura ka han indah chhin phei chuan ka mittui a hnai dawn tlat! Motor tlan ri leh 'horn' ri ka hriat theih loh avanga kawngpui min kan puitu ka mamawh zel tur te ka ngaihtuah thlen phei chuan lawmthu sawisen loh ka batzia min hriatchhuah tir uaih uaih a. Ka duh duh sawia ka ka ka ang zawt zawtte chu a tur ve rengah ka lo ngai mai thin a, ka beng hriatnate chu ngaiah ka lo nei ve mai thin a, Pathian khawngaihna liau liau a nih zia min va hriatchhuah tir chiang em! Chuvangin he NAUPANG KAWR SEN HA hi ka tan chuan naupang special tak a nih mai bakah vawiin hi ka tan hian SUNDAY SPECIAL-ah a siam ka ti lo thei lo!

Ka ngaihtuahna kan her hret a, dawt sawi ve ngai miah lo leh midang rel ve ngai hauh lo tur te,thu bengtlalo ngaithla ve ngai miah lova a Siamtu hnen lama a let leh tur te ka ngaituah chuan ka awt letling a. Mi pawi a sawi loh tur ziate, midang huatna a nei loh tur zia leh a rilru thianghlim tur ziate chu ka dawn kual vel a. Pathian enkawl bik liau liau, NAUPANG SPECIAL ni hian ka va hre leh lawi a.

'A vanduaina hi a vanneihna a lo ni reng mai a..ni e, a hming pawh Malsawmdawngzela a ni tlat' tiin hmuhnawm ti em em in a inkhawm bang hlim hmel taka nui var var chunga a nu, amah lo nghak rengtu, lama a tlan tar tar chu ka thlir zui vawng vawng a..!