CHHIAR NGAILOH LOVE LETTERS!!

Mi zakzum tak a nih avangin an in piah lawk a lehkhabu dawr nghaktu hmeichhe duhawm tak chu a duh zia leh a ngainat zia a hrilh ngam ngai lova. A hmelhmuh reng a duh a, biak chak hle mahse, chhuanlama chanchinbu hrang hrang man zawh kual vel bak a ngam si lo. Nitin hmuh a duh avangin chhuanlamah chanchinbu man tlawm te te a lei ziah thin.

Chutia nitina kal ta chu chu nu pawh chuan a lo hre viau a, a ruk takin a lo ngaina ve em em a, mahse, a sawi lang chuang lova.

Nikhat chu zah pawh dawn lo hian hun remchang a hmuh veleh a duh thu a hrilh ta pawp a, mahse, chu nu chu a lo zakzum ve em em mai niin a lai lutuk chuan inchhung lamah chuan a tlan luhsan ta ngawt mai a. Mipa hrilhai leh zak bawk si chu a haw nghal nal nal a.

Zah hle mahse a hmel hmu lovin nikhat pawh a awm thei si lova, a tukah chuan a va kal leh a, a beisei loh takin a chanchinbu lei chu a lo tuamsak thlap a. Tichuan, phur takin nitin chanchinbu chu a lei ta ziah a, anin a lo tuam sak thlap zel bawk a, mahse, hmangaihna thu erawh a sawi pui leh ngam ngai ta lova.

Nikhat chu a hmel reng reng a rawn lang ta lo, hmeichhia chuan nilengin a lo ngai chang reng a. A tukah pawh a lo la lang ta lo, kar khat hnuah pawh a lo la lang ta chuang lo.

A ngaih a that loh tak em avangin an inah chuan a va kal ta a. A va thlen chuan mipa nu chuan lungchhe takin"Hmangaih em em a nei a, chu nu chuan a duh ve si lova, a inawhhlum phah ta ani"tiin tap zawih zawih hian a lo hrilh a. A fapa room a entir chuan a chanchinbu lei zawng zawng kha a intuamna engmah pawh phelh lovin a lo inrem fel thlap a, a chhiar ngai miah lo tih a hre thiam nghal a. A hmangaih ber hmel hmuh theihna anih vang chauha lei thin a ni si a.

Chanchinbu a tuamna nena lo inrem fel thlap a hmuh chuan chu nu chu a rawn tap chhuak ta vak a, chanchinbu a rawn leiah khan a tuamsak apiangin a karah 'love letter' a dah tel ziah kha a ni si a!