KA FAPA MIN ZIRTIRTU

"Nupui hmu chuan thil tha a hmu a ni" an tih hi ka hmangaih leh duh ber nupuia ka neih takah chuan a lo dik tak zet a ni tih nitin hian ka hre thar thin a, "Fapa nei phei chuan hlimna a hmu a ni" tih ve mai duh khawpin fapa duhawm tak kan han neih chinah phei chuan ka khawvel chu ka fapaah a inchhungkhawm vel vek ni mai hian ka hria.

Pathian hmangaihna ropui zia tehkhin pha teuh bera an sawi thin 'Nuin a fa a hmangaihna' hi ka thik hial thin, a chhan chu 'Pain a fa a hmangaihna' hi keimahah hian a chiang em em hian ka hre tlat thin! Ka hmangaih leh duh em em ka nupui chungah hian ka lung a awi loh ve fo chang a awm nangin, he ka fapa chungah erawh hi chuan ka lung hi a awi hliah hliah mai a ni. Lungawi loh chu sawi loh, ka thinrim ber lai pawh hian a kiang ka thlen chuan buhsi thliin a len bo vang vang ang maiin thinurna chu chhemkian duak ang mai hi a ni thin. Office bang ka hawng, min hmuh veleh ka lama rawn tlan tarh tarh chunga, tawng la fiah mang lova, "A pa, a pa" tia a ban a rawn phar phei te chu a va hmuhnawm ngai em! Hahdamna damdawi tha ber ka tan chuan a va ni teh lul thin em!

TV-a zai a rawn rik ruala kan chhuatlaia ding sawi lei lawia phur tak maia a su tarh tarhte chu lam thiam ka va han ti tak em! Kan pindan kawngkhar vuan chunga thei leh thei lova lawn paha,"A pa, a pa, en teh, min lo en teh" intithei leh lawn sang inti em em maite chu lawn sang thei tawh hi ka va han ti tak em!"A pa, a pa, min lo en teh, ka huai tawh asin" tih paha kan khum hniamte atanga a zuang thla te chu huai hi ka va han ti tak em! Fiah mang lova, 'one two three' a han sawi nawk nawk a, a dik lo nuaih tih hre reng chungin a thiam hi ka va han ti tak em! Chhung inkhawm kan han nei a, ka bulah thuttirin a kuangkuah ve than a, Lal Tawngtaina (Lor's Prayer) sawi turin kan han ding thap a. A kut khinghnih kan han suihtira, "Kan Pa, vana mi..." tih lai chu ring deuhin a sawi a, a tawp vang vang a, sentence tawp apianga ".... che" "....che" tih lai bak kha a sawi ve thiam leh tawh hauh lo nachungin thiam hi kan va han ti tak em!

Kan inluah kan insawn dawn tumin ka la hre reng, bungraw lian tham deuh ho chu motor lianah kan hlang vek tawh a. Keima thil deuh ho bikte chu ka motor hnungah hlan tumin ka inpu bawr luk a, ka indah fel ka han hawi chhuak chu ka fapate reuh chuan ka lehkhabu thenkhat chu zo tha mang lo hian a rawn pawm bawr ve lai lai a, a hmel ka han en chu rit a ti ve hmel hle hian ka hria, a thil ken chu a tan chuan a rit ve reng bawk a! Ngawi reng hian ka lo thlir a, ka thinlung chu hlimna leh lungawinain a khat a, ka fapa chu ka'n en leh thin, ka biangah lawm avangin mittui a rawn tla thei hial a ni. A thil ken lai tam lam leh rih lam chu ka en lo, mahse, a theihtawp a lo chhuah vena, a phak ang tawk tawka a tih thei ve chhun thahnem ngai taka lo tih a duh vena ka fapa rilru leh thinlung chu ka zuk hmu phak hian ka inhria a, chu chuan min ti lawm a, min vel a, lawm avangin ka biangah mittui a rawn luang lo thei lo a ni!

Ka rilruah tawp chin nei lova min hmangaihtu Pathianina min en dan leh min teh dan tur awm angte chu a rawn lut nghal a. Ani chuan kan tih theih tawk leh kan tih thiam chin te, kan phak tawk te a hriat chian tur zia te, kan thiltih ropui leh ropui loh lam ni lova, kan phak ang tawk tawka theihtawp kan chhuahna thinlung lam a en tur ziate, a fak hla kan sak laiin kan aw a mawi em, kan zai mawi em tih aia thinlung takin kan fak em tih a enzawk tur ziate, thawhlawm thawh tam lam aia kan phaktawk atanga min teh tur ziate ka ngaihtuah zui zel a.

Ka fapa khum atanga zuang thla huai ka tihna chhan chu a phak tawk ani tih ka hriat vang a ni a, kawngkhara tawite a lawnte chu lawn sang ka ti tlat, a theih chin tawk ka hriat vang a ni a, '1 2 3' a sawite chu fiah lovin dik lo neih nuaih mahse, thiam ka tih em em nachhan chu a kum zat ka hria a, a thiam ve tawk a ni tih ka chiang em a ni! Lal Tawngtaina "... che.. che .. che" a lo sawi ve bauh bauh ringawt pawh thiam leh fel ka tihna chhan em em chu a kum ka hre chiang a, a phak tawk ka hre chiang em a ni. Bungrua min thiar puia a zawh tawk lek a rawn chawi ve tang tangte chu kei atan hian lawm lohna chi rual a ni lo. Thil rit pui pui leh lian tak tak a keng lo tih ka hria, mahse, a zawk tawk a rawn keng ve kha ka tan chuan thil ropui ber zawka chu a ni. Famkim lo
mihring, hmangaihna tawp chin nei, kei meuh pawhin ka fapa chutianga ka en anih chuan mi zawng zawng PA, tawp chin nei lova min hmangaihtu, kan sual lai ber pawha min phatsan ngai lotu, PATHIAN chuan keini a fate min en dan tur leh teh dan tur phei chu a va ni leh zua dawn em ka ti rilru a.

Thil ropui leh lian tak ti turin a phut ngai lo ang che, phut se chuan mi zawng zawng hi thil ropui leh lian ti thei vek turin a siam vek ang, chutiang a ni der si lo, i phak tawka thahnem ngai taka a tana i lo tih ve tluka ropui kha Pathian tan a awm lo. I theihpatawpa i lo tih ve tek tek tluka hmuhnawm kha Pathian mitah a awm bikin ka ring lo. Mawi leh nalh taka zai turin a phut kher lo chu, phut se chuan aw nalh tak mi zawng zawng a pe mai ang, i aw nalh lo leh beu, chher chhei chhuaite kha thinlung taka i zai chuan chu tluka rimawi chu Pathian tan a awm ka ring lo!

Do your best and God will do the rest!