MI BO KA(N) HMU!!

Zan dar 6 vel a ni a, YMA information mike a rawn kiu ruai ruai a. TV ka en avangin ka lo ngaihsak lutuk lova, ‘Retailer No. 1 ah ration buhfai a awm a..’ tih vel bak a ni chuang lovang ka lo ti rilru a. “Mi bo zawn a ngai..” a rawn tih tak ah chuan TV chu ka off a, pawnah ka va ngaithla chiang a. Tunge maw bo le tia ka ngaihtuah lai tak chuan an rawn puang nawn leh a. “...Tv. Sangmawia a bo va...” tia an rawn puan lai tak chuan ka hrethiam nghal mai a. Vawiin lam khan an sawi thawi kha ka hre deuh tawh a, mahse ka lo la thu tak vak lova, chutia YMA Information mike-ah meuh an rawn au takah chuan,“Eee, Sangmawia chu a bo tak tak a nih chu..” ti rilru chungin ka thianpa ka call nghal a.

MI TLUK LOH SANGMAWIA!
Tv. Sangmawia hi thingtlang lam mi a ni a, kan vengah chhungkaw fel takin an lo enkawl a. A awmna chhungkuate hi an fel bawk a, tlema mi a phak lohna hret pawh hi an khuh mawi thiam em avangin kohhran leh khawtlangah pawh miin an hmelhriatin an lawm hle a. A enkawltute’n an zir bawk a, YMA leh KTP velah pawh a tangkai em em a.

Hnatlangah te hian a kal deuh ngei ngei a, chhawntu an tam thin bawk a, amah pawhin nuam a ti thei hle a ni. Biak-Inah lah lamtualah lam hmahruaitu a ni thei deuh reng bawk a. Chubakah ‘halleluiah’ a pe ring thei a, tawngtai rualin a tawp han khar chang lah a ngah bawk. Kohhran upate ho pawh a nelin an ni lah chuan an lo lawm thiam em em bawk a. Khawtlangah a lar bawk a, naupang tê tê atanga puitling thlengin hre lo hi an awm lo hial awm e.

Thil tha ve deuh chu a hun leh hmun azir hian a in ‘adjust’ zung zung mai thei hi a ni. Amah hi lam ti mi tak a ni a, a zei pawh a zei khawpin ka hria. Eng music pawh hi play ila a lam rem thei vek mai a ni. YMA function-ah te hian lam tur hian an sawm fo thin. Rap music leh tunlai hla hot zet zet rema mipui hmaa a han lam kual vel tak tak chu pui tak a ni. Hmeichhe ho an lo te rin deuh phei chuan a aia uar mah zawkin an eu kual vel ta thin a, mipui kal khawm min tihlim thin khawp mai. A tuk lawkah te Biak-Inah ‘halleluiah’ pap pap chungin lamtualah mihlim lamin tui em em hian a lam ve leh mai bawk thin.

A BO DAIH !!
Ka thianpa Fela nen chuan an in lamah chuan kan han chho ve ta a. An in kan thleng chho chu mi an lo tam khawp mai a. An lo thlan thut deuh thup ni berin ka hria, kan kohhran upa te pawh an lo awm nual a. Amah enkawltute chhungkua pawh an hmel a ngui khawpin ka hria. A hrechiang deuh awm te kan han zawt a. Ni li hmalam daih tawh atang khan inah a haw tawh lo a lo ni a.

Vengchhungah duattu leh ngaihsaktu a ngah avangin a lo haw loh zan hmasa berah chuan ngaihthat lohna em em an nei lova. A tukah chuan a kalna tur awm ang te an han zawh kual chuan tumahin a chin an lo hre reng reng lo mai a. Midang pawh hrilh duh lem lovin an chhungkua chauhin a kalna awm vel an dap kual a.

Sangmawia chu an khawlamah te a lo haw daih a ni lo maw tiin an khawlam te an zuk telephone a, an ni lah chuan engmah an lo hre bawk si lo. An buai ru tawh khawp mai a.

A tukah chuan an chhung hnai deuh te hrilhin Aizawl veng hrang hranga a lenna thin te enkualin an buai hle tawh a. Thingtlang lama Sangmawia chhungte ho pawh chuan an lo in dap kual a, an lo buai hle mai bawk a. A nilinaah chuan an mangang tak tak ta a. An chhungte mai nilo an thenrual hnaivai deuh chuan an lo hria a, a kalna tur awm anga an ngaih zawng zawng an enkim deuh tawh avangin khawlaiah te an phek zawn ta ngawt mai a.

Motor-a zawng tawk leh ke a zawng tawk te an awm bawk a. Kan hriat ve miah lovin an lo dap chipchiar tawh hle mai a. A then chu Aizawl mai pawh ni lovin Ngaizel kham phei te, Mualpui lam leh Reiek Tlawng road lam te pawh an lo dap nasa tawh a ni awm e.
Muallungthu leh Aibawk thleng thlenga lo va zawng te pawh an awm a. Tih ngaihna dang vak an hriat tawh loh avangin khawtlang hruaitute hrilhin YMA information-ah an au tir ta ringawt mai a lo ni a.

Khawtlang hruaitute chuan an tih theih ang ang an han ti nghal zar zar a. Police lam pawh hriattir nghalin TV lama lo puang zar turin Zonet leh LPS lamah te pawh an va thlen nghal bawk a. A tuk lama nitin chanchinbu-a tihchhuah turin a thlalak leh a
bo nîa a thawmhnaw hak te ziakin an pe nghal vek bawk a.

MIZO ZIAA KA NGAIHSAN LOH LAI...
Hetiang nî khuaah hi chuan Mizo mi zia dik tak a rawn lang leh ta a. Midang aia thil hre zawk leh sawi tur hre tak an lo awm leh teuh mai a. Rin dan leh ngaihdan pawh a tam khawp mai a, thiam tak maia an han sawi phei chuan, ‘a ni awm tak mange..’ tiin kan lo inhlan thlup mai thin. A thenin a thih daih tawh an ring a, a then chuan a thih an la ring lo bawk a. “Misual kut a tuar palh anianga” tia thiam taka chhuidawn thei te
pawh an awm a.

Fela chuan, “Ti rawh, Pa Zuala thil i va zawt lawk teh ang,” a ti a. Pa Zuala hi Sangmawia awmpuitu chhungkaw pa ber a ni a. Fela chuan an zawn tawhna te a zawt a, “Zari te in Tuikuala mi kha in en tawh em?” a’n tih chuan ani chuan an la en loh thuin min
lo chhang ve mai a. Chutah ka thianpa chu a rawn inher thut a, “Kal nghal ang” tih leh tlanchhuah a rual ta a. Pawnah ka zui chhuak a, tichuan bike kan ti nunga hmanhmawh zetin Tuikual lam pan chuan kan tlan phei ta a.

DETECTIVE FELA NEN..
Fela hi Sangmawia kan venga a rawn awm tirh laia a kaihruaitu ber a nih thin avangin Sangmawia chanchin hi a hre chiang hle a, a kalna thin te pawh a lo hre khawp mai a. A lo awm ngeia rinna ka neih avangin ka mitthlain kawngka kan va hawn huna a lo awm dan tur te ka hmu lawk a, ka phur khawp mai a. Tuikual kan va thleng chu, “Ding lawk teh, Zari te in awmna ka hre tawh miah lo,” Fela chuan a ti ta heu mai a. “Eng aaa..=!! Tinge hre si lo, kan phei ve ringawt?” ka’n tih chuan ani chuan, “Ka hria a..se ka bo
tlat..” a’n ti leh rih a.

Kan bul vel building leh step te chu a han bih kual thuak thuak a. “He lai vel hi an awmna ni chuan ka hria a.. se a ang tawh lo bawk sia, khawilai nge kha aw..?” tiin amah leh amah chu a inbe mawlh mawlh a. “Zari te nen chuan engtin nge in inhriat reng reng a ?” ka’n tih chuan, “Hmanah vawi khat chu kan leng tawh alawm..chu mi tum chuan survey kan nei a, he lai velah hian” a ti ringawt a.

‘Chutiang teh tlawng ringawt chu a’ ti rilru chungin ka lung a awi lo ru khawp mai a. Kan mi hmuh ho apiang chu, “He lai velah hian Zari in hria em?” tiin kan lo zawt zel a, an hre lo zel mai bawk si a. Fela hnenah chuan, “An awmna lai i hre sual a ni lo maw..?” tia ka’n zawh lah chuan, “Helai hi a ni ngei alawm,” a ti tlat mai bawk si a.

Chutah ka thluak ka’n vawrh vir a, “In lenna kha a rei tawh hmel si a, pasal a nei tawh anga, veng dangah a awm tawh a ni ngei ang” ka’n tih chuan ani chuan, “A ni mai thei..” pawm vak lo hmel pu chung hian a lo ti a. “An chhungkua veng dangah an insawn tawh pawh a ni mai thei asin, hei, helai vela mi tumahin i Zari tih ve chu an hriat loh hi..” ka tih chuan chhan pawh min chhang duh lova.

VCP LEH A CHHEHVEL..
Meizial ka tan a, “Haw mai ang, i thil hriat ve hi a bo em mai, saw lamah..” ka tih mek lai chuan, “Eeee.. tih dan ka hria,” a rawn tichhuak hluai a. Eng nge ni tih pawh ka zawh hma chuan dawr lamah chuan a kal chho a, ka um zui ve nghal a. “VCP in awmna min hrilh thei ang em?” tiin dawra lo thute chu a zawt ta mai a, ka bo kher mai. Zari leh VCP inzawmna awm reng reng ka ngaihtuah thiam lo, Sangmawia leh Tuikual VCP in inzawmna an neih awm pawh ka chhut thiam lo. Mahse, a hmel ka va en chuan a thu tak zia ka va hmu a, eng emaw tak chu a hria a ni ngei ang ka lo ti rilru a.

Tuikual VCP in awmna lai vel min hrilh hnu chuan an in awmna mual lamah chuan kan inkhalh phei leh ta a. Kan tlan pah chuan Fela chuan VCP chungchang chu min hrilfiah ta a. “Hmanah helai velah hian survey kan nei a, VCP tlangau-in min hruai kual vel a, Zari te inah min luh pui a. An inah chuan thingpui te kan in a. Kan titi laiin Sangmawia chanchin kan sawi chhuak a. An lo hre lutuk a, a rawn len thin thu te an sawi a..” a tih lai mek chuan, “Chu pawh ni se, VCP leh Zari te chu eng nge an inzawmna ?” ka lo ti hmuk a. “Aw... VCP Tlangau khan Zari te chu a hria a, Tlangau-pa awmna chu VCP kan zawt dawn alawm..i van man lo tak! ” min ti ta zêk a. A va han kual thui ve aw ti rilru chungin kan tlan phei dun bap bap a.

Sangmawia a bo a, Zari te inah a awm ringin kan va kal a, mahse Zari te in ber pawh chu kan va hre chuang hlei lova. Zari te in kan hriatloh avangin a hre tur ber Tlangau-pa lah chu Fela chuan a awmna chu sawi loh a hming pawh a hre tawh si lova. Tlangau-pa awmna hre tur chuan VCP zawh a ngai a, chuan VCP awmna kan han zawt hmasa leh tê tê phawt anih chu. Ka rilru chhungril takah chuan ka hlim ru leh ta khawp mai a. Sherlock Holmes rilruah a lo lang nghal a, kan han chhui kual vel dan chu a detective story ru riauin ka hria a, a hma lawka ka thianpa mawl ka tih deuh kha tunah chuan fing ka ti leh tawh khawp mai a.

VCP in chu kan va zawng hmu ve mai a. Naupan chhiat a chhuak nge ni, lut hmasa zawk nih hrehin kawngka bulah chuan kan ding dun ang ren rawn a. Pawnah chuan VCP hnena kan sawi dan tur chu rehearsal te kan han nei leh dun tê tê phawt a, tichuan inthlahrung takin kawngka kan kik ta dat dat a.

Nula la tleirawl hmel deuh mai hian kawngka chu a rawn hawng a, mak tih hmel tak hian min en a, lut tura min sawmna chang pawh a hre lo va. “Inleng ka nei ngai lo,” tih melhin min melhin ka hria. Keini pawh chu kan lai ang reng khawp mai a. Inchhung lam
atang chuan, “Lo leng rawh u,” a rawn tih takah chuan chu nu chu kan zui lut ve ta nghal a.

VCP nupui ni ngei tur hi TV hmaah hian a lo thu a. “Enge ni ta ? Eng nge in duh a ?” a lo ti a. Kei chuan kan veng awmna te kan han sawi hmasa tê tê a. Kan kal chhan tak han sawi dawn chuan Chemtatrawta thawnthu ang maia kual kawi thui a ni si a, sawi dan tur thiam a har em em mai a. Fela nen chuan, “Nangman sawi rawh,” tih melhin kan in melh a. Chutah Sangmawia bo thu atangin ka’n tan a, Zari te in leh Tlangau-pa chungchang te pawh chu ka sawi zel a, Tlangau-pa hming leh in awmna chu VCP in a hriat ngei kan rin avanga rawn pan ta mai kan nih thu te ka sawi a.

Chutianga a chepakaia thil awmdan ka sawi vek hnuah chuan ani chuan, “Kan pa hi VCP a ni tawh lova, Tlangau-pa in sawia chu a tu bera kha nge ni ang aw.. .?” a ti a. Fela chuan survey an neih kum te chu a han sawi a. Chu nu chuan, “Eee.. Ka hre leh si.. Mawia a nih chu.. Lalmawizuala, “a rawn ti chhuak hluai a. Fela chuan, “A ni tak.. Aw.., Mawia male..Ka hre leh si,”a’n ti leh lawi a. “Mahse, an awmna ka hre miah lo, vengthlang lam khu chu niin ka hria. Kan pain a hria ang, mahse, a ni lah chu a committee daih bawk sia..” a tih lai chuan, “A phone theih ang em ?” ka lo ti vat a. “Theih ang..Ka’n dal (dial) ang a, nangmahni’n in be dawn nia,” a ti a.

Fela leh VCP chu an inbe ta a, ka lo en ha a. An inbiak zawh hnu chuan Fela chuan, “Khutah kawngpui hnuai zawkah Salvation Army Biak In bulah an awm a nih chu,” a ti a. Lawmthu te kan thiam ang tawk tawkin kan sawi ve a, kan chhuahsan leh ta a.

TLANGAU PA IN LAMAH...
Tichuan Salvation Army Biak In a awm em tih melh pah chungin kan tlan thla zel a. A veng a mawng deuh a, a tlai tawh deuh bawk nen mi han zawh mai tur an vang hle a. “Khu khu a nih dawn khu..” tih pah in kan hmalam kawngpui chhaka Biak In chu Fela chuan a kawk a. A bulah chuan kan ding a, a lo hnai ber in chu kan han kik nghal ringawt a. Kan thil zawn chu hmu tawh dawna kan inhriat deuh vang nge ni kan phur dun tawh khawp mai a.

Nu pakhat hian kawngka a rawn hawng a, “Mawia, Lalmawizuala te in a ni em ?” ka’n ti a. “Aw ni e, eng nge in duh a ?” a tih chuan chhang pawh chhang lem lovin Fela nen chuan hlim hmel tak hian kan inena, kan innuih sak a.

Inchhung kan han lut chu nu pathum hian heater an lo kil bial laih a. Fela chu a inti tlangnel vei khawp mai a, “Mawia thianpa ka nia,” te a ti vel thar thar a, “Khawnge Mawia hi ?” a’n ti zui nghal a. “Lunglei-ah a awm daih tawh alawm, hna thar a hmu a,” an zinga a naupan hmel ber chuan a ti a. “A va han ninawm zo zai tak, VCP lah kha a lo awm lova, harsa takin he in pawh hi kan rawn zawng hmu hram a, a hlat teh lul nen, Mawia leh zel chu..” ka rilru chuan a lo ti hmak pek a. Fela chuan kan vengin mi bo kan neih thu te leh Zari te inah a awm kan rin thu te, Zari te in kan hriat loh avangin Mawia chu zawh kan duh thu te a sawi hnu chuan a phone number te chu kan han la a. Amah Fela bawk chuan a’n dial a, a ri tawt tawt a. Chhangtu an awm lo, a han ti tha leh a, chhangtu an awm chuang lo. Vawikhat a han dial leh a. chu pawh a ring ral leh ta thak a.

Rilru a beidawng ru hman khawp mai a. Mahse, reilote hnuah chuan Fela cellphone chu a rawn ri ta tang tang a, rang zet hian a la nghal a. “Hello”... Hello,..min rawn phone a mi ? Hei crusade kan nei a, kan bang har deuh a, kan bang chiah aaa.. Eng nge ni ta
?” a rawn ti a. Fela chuan, “Fela ka nia, min hria em?” a’n ti a. “Ka va hre mai lo che, tu Fela nge aw..?” a rawn ti leh a. Fela chuan an inhmelhriat dan te leh survey an neih lai te chu a han sawi vel a. Chuti chung pawh chuan Mawia chuan a la hrechhuak zo ta chuang lo va. A mangan thlak ka lo ti khawp mai a. An in kan luh tirh khan Fela’n, “Mawia \hianpa ka nia,” te kha a ti lut vei thar thar kha nia, tunah Mawia chuan a lo hre leh mang si lova, a hrilhhai hmel chu ka lo khawngaih ru ang reng khawp mai a.

“Anih leh, Zari kha i hria em ? An inah min hruai a, thingpui te pawh kan in kha ?” Fela chuan a’n ti leh hram a. “Ka va’n hre mai tawh lo, khang hun lai khan mi hrang hrang kan chhawn hnem lutuk a..” a rawn tih takah chuan ka bei hi a lo dawng ru khawp mai a. Tih ngaihna dang vak awm ta hek lo i, ngui ru tak chungin kan chhuah san leh ta a.

Kan phurna leh beidawnna chu a in-chhawk zut hian ka hria a. Tuikual lama kan tlan phei kha kan phur em em a, VCP in kan pan lai pawh khan kan phur viau a, Mawia te in kan zawn lai phei kha chuan phur tak kan ni tawh. Mahse, kan phur hnu chiaha hnual rawihna tura thil a lo awm leh zel chu hrehawm kan ti dun hle mai a.

BEI NGE SEI RUN DUNG ?
“Fela, Zari te in chu a awmna awm lai vel nia i hriat chu han rin zawn tawp mai teh ang, in tinah zawt kual ve mai ang, bei nge sei run dung an tia lawm,” ka’n tih chuan ani pawh chuan tha a lo ti ve hle mai a. Tichuan Zari te in awmna nia a hriatna lamah chuan kan let chho leh ta a, kan lo pel thui viau tawh mai a lo ni a. Chu lai bawr vel kan han thlen chuan Dar 11 a lo ri reng tawh a.

Fela chuan step chhuk deuh hi a zawh a, keiin ka zui zel a. A hre zawk a nih avangin a hawina lam apiang ka hawi ve ringawt zel bawk a. Reilote hnuah chuan ngawi reng hian ding lamah a peng ta thurh a. Mi kawmkarah rei vak lo kan kal hnu chuan kawtzawl nuam ang reng tak hi kan va thleng a. A ding deuh chut a, a hawi kual a, chutah phur hmel zet hian, “He lai hi niin ka hria..mmmm.. A nih hi...a ni chiang lutuk,” a ti chhunzawm mawlh mawlh a. Kan phur sual leh ang tih ka hlauh avangin kei chu ka lo phur vak ngam tawh lova. Ka rilru chuan ka thianpa chu a ‘chiang’ sual leh palh ang tih ka lo hlau em em mai a.

Tlem kan han phei leh deuh hnu chuan, “Aw..khu le, ka hmu ta e,” tih leh tlan thlak a rual ta mai a. Tun tum chu ka thianpa hi a tisual tawh hauh lo a nih hi ti rilru chungin ka um zui ve nghal a. Zan a rei ve tawh sia, a reh viau tawh mai a, tawng ringawt pawh a rin duh teh reng nen kan tlan ri thla dun khup khup mai kha chu ka ngaituah let leh hian a zia lo ka ti leh hnuhnawh khawp mai.

Fela chuan kawngka a kik dat dat a, tuman min rawn chhang lova. “An mu tawh anianga..” ka’n ti sa sa a. Kawngka chu a aia ringin kan kik ve leh dat dat a. Patling lian pui mai, mutchhuak tawh hmel zet hian ham bui bui chungin min rawn hawn a. “Eng nge ni ta a..?” a rawn ti tuau a. Inthlahrung hmel zet hian Fela chuan, “Zari te in a ni em lee..?” nuih tlawn ti tih deuh hian a han ti a. Chu pa chuan, “Zari a..? Kan buiding hnuai berah khuan an awm..” a tih mek lai chuan lawmthu pawh kan sawi hman lo, kailawnah chuan kan tlan thla nghal hlawk hlawk a.

Kailawna kan tlan thlak lai chuan, “ Lo awm hlauh se aw.., a lo awm reng mai ang a..” te kan ti thla dun a. Building hnuai ber kan thleng thla a, kawngka pui ka han hmu chiah chu, ‘Zanin zet chu hmelhriat loh kawngka kan kik hnem dawn hle mai a..’ ka ti rilru
a. Inchhung atang chuan hmeichhe nui thawm a rawn ri a, an la eng pap mai bawk si a. Meng rei ve tak thin chhungkua chu an nih ngei dawn hi ti rilru chungin kawngka chu ka kik ta a.

KAN HMU TA E..!
Chutia kawngka ka kik chiah chu ka aw hriat than em em mai, khawihmunah pawh awm ila ka hai ngai loh tur hian aw zangkhai zet hian, “Lo lut r’u” a rawn ti lauh mai chuhhh.. Awm ngaihna pawh kan hre lo, kan hlim bawk si, kan nuih a za bawk si, mipa thiandun e ti lo chuan kan inkheuh dun nawk nawk khan ka hria! Kha leh chen a chhungte leh khawtlangin mangang leh beidawng taka an lo zawn tawh hnu, a then chuan thi tawh hiala an lo sawi hmiah tawh, mihlim thenkhatin khawhar len puia an lo len pui hman titih tawh, khawtlang mipui kan phek buai nuaih nuaih kara thlamuang leh hlim aw zangkhai zeta amah ngeiin keini thiandun kawngka kik a rawn chhawn lauh chu a lawm awm dan a thuk em ani!

Tichuan, kawngka kan han hawng chiah ta ale, amah Sangmawia ngei mai chu ngaihngam leh thlamuang zet, lungkham reng reng nei lo ang mai hian thuthleng seiah chuan a lo thu mu diai mai a, TV remote a lo hum ran a, channel a lo hmet kual pup pup bawk a. A awm dan, a thut dan, a hmel zawng zawngte chu ka'n en thin, kan veng lama a chhungte leh khawtlang nu leh pa, nula leh tlangval, thalai tawh phawt chu amah zawnga kan buai mup mup te nen chuan a va inhmeh lo lulai em! Nutling leh patling thlarau changsang deuh ho pawhin an tawrhpui vang nge khawhar in zaikhawm thusawina remchang a awm hlan an nghakhlel zawk nge, an thu hmur kha a ni a, an thlan thut tawh ti ila kan sawi sual tam awm love. Chutiang zawng zawng leh tuna a lo awm dan dik tak han mitthla dun chuan ke hnuai hiah zat chu nepte a ni mai, insum a har thlawt a ni.

HOME-COMING WITH GLORY
Kai tawi tawh mai ang, a thui tawh si a. Tichuan, haw pui kan han tum a, amah maia haw a tum tlat lo, chumite fanu Sawmtei tel lo chuan haw a tum bau lo! Tihngaihna dang awm ta hek lo, Sawmtei chu a lo fel hlauh a, a insiam sawk sawk a, kan motor chah lo thlengah chuan Sangmawia bulah chuan a rawn chuang haw ve ta a.

Tichuan le, an inkawt kan thleng ta a, mipui chu inchhungah leh pawnah chuan an lo tam nasa ta mai si a le, an inkawtah chuan a chhuk duh leh ta lo, tlangval phawk zual ho chu an lo ri chel chul tawh mai si a, a zak ve a ni ngei ang, a chhuak duh ta hauh lo mai a. Reivak lo hnuah chuan an in piah deuh thim laiah chuan motor chu tlan phei turin ka hrilh a. Chutih rual kan venga a ‘star’ em em mai ‘Babie’ chu ka ko hrang a, va kai chhuak turin ka hrilh nghal bawk a.

Babie chuan a va kai dawn a, Sangmawia chuan a kut dinglam hian a lo kai zawk a, a kut vei lamin Sawmtei a kai bawk a, motor atang chuan a rawn chhuak ta a le! Lehlam lehlamah nula kai chunga inchhung lam a rawn pan chu 'superstar red carpet' rawn zawh lai, mipui leh thlalatuten an lo bawr luai uai lai hi ang ber hian ka hria! Inchhung a rawn lut zet chu a ropui dangdaiin mipui kut beng thawm a ring tha kher mai! Ka tehkhin leh ber mai chu hmanlai pasaltha ramchhuak, hlawhtling zeta sapui lu rawn hawn, ropui taka khua a lut vel hi ka chan a, Isua Jerusalema a luh dawna ropui taka chawimawia a awmte kha ka rilruah a rawn lut bawk a.

Tichuan, a awmna pa, Pa Zuala chu a rawn ding chhuak ta a, lungchhe ru ang reng hlim em em bawk si hian a inhnit deuh faih faih a, “Hei, in hriat angin, ka fapa Sangmawia chu a thi a, a lo tho leh ta niah ka pawm thlap a...”tia a thusawi bul a han tan a, mipui ho pawh chuan a rilru tur ang hrethiam niawm takin ka lo ngaithla thap a, tahpui ve chak niawm tak hian lungchhe hmel pu tak hian kan reh thap bawk a.

Thu a sawi zawh hnuah chuan Sangmawia chuan din tul hian a hre ve tlat ni ngei tur a ni, a rawn ding chhuak a, “Hei, bo a maw min lo ti a, ka bo lo reng reng a nia..” a han ti chiah mai chu mipui ho chu kan nui fai ta vek mai a. Nuih a zat tawh teh reng nen,
“Hei ka bawihtei “ tih pahin Sawmtei chu a’n kawk leh chiah phei chu kan khek ring hlawm kher mai. “Ka bawihtei te inah hian ka awm a, ka bo lo a nia aw” a la ti ta deuh deuh mai chu insum kar lek lo hian kan te tuarh tuarh hi a ni ngawt mai a ni!

LUNGAWINA
A tukah chuan zan lama ka chauh deuh avang leh kan men rei deuh avang chuan zing ka tho hma vak lova. Hmai pawh phih hmain Vanglaini chu ka’n keuva, a chhung hnuailam veilam sir kilah chuan Sangmawia bo thu leh a thlalak a lo chuang vang mai a.”A bo tawh love, hmuh leh a ni tawh e” tiin ka phun sap a.

Ka damchhunga hei ang ema thil tha mi tana ka tih sak leh mi lawmna ka siam sak hi a la awm ngaiin ka ring lo tiin ka inngaihtuah a, midang hlimna leh lawmna siam sak theih hi a va lo hlu em, mahni tan bawk a lo ni e tia ngaihtuah neuh neuh pah chuan lungawi leh hlim rilru tak chungin thingpui chu ka in a.