PA 4 -NA

Ka pu damlo chu thla khat dawn Aizawl Civil Hospital-ah ka awmpui tawh a. Tuk khat chu Doctor hian lehkha min ziah sak a, ka pu mamawh tur damdawi chi 4 a ziak thla dan dan a. Chung a damdawi hming ziah tlar thlak diat diat ho chu lei vat tura min tih angin rang fahranin Damdawi In Canteen-ah chuan ka tlan thla a.

Dawra lo thute chuan an hmu thang tawh bawk a, ka lehkha ken chu an bih thuak a, rang zet hian ka damdawi duh ho chu an rawn la khawm nghal thuai a. A man zat min hrilh a,"Hei chu a awm lo" tih pahin ka lehkha kena doctor-in damdawi a ziah tlar zinga a tawp ber PA 4-NA chu a kawk a. "Aw le" tih pahin pawisa ka pe a, Damdawi In gate atanga damdawi dawr hnai ber pan chuan ka tlan thla leh nghal a.

Ka zuk thleng a, dawr lo nghaktu thau deuh hnenah chuan ka lehkha ken pek pah chuan "Hei hi in nei em?" tiin PA 4-NA chu ka kawk a. Lehkha chu a la kang a, a han bih hnai deuh a, "Aih, nei lo" tih pahin en pawh min en zui mang lo chuan min pe let leh a.

A bul chiahah chuan ka zawt leh a. An lo nei bik lova. A dawt leh damdawi dawr lian takah chuan "Hetah hi chuan an nei ngei tawh ang" ti rilru chungin ka lehkha ken chu ka pe a. "Hei hi in nei em?" tih pahin damdawi lehkha rawng enga damdawi hming PA 4-NA chu ka kawhhmuh leh ta a. Tleirawl tarmit vuah hi a ni a, a mit bul hnai setah chuan lakangin a'n chhiar dawn ngial a, a chhiar thei lo nge a hre thiam lo zawk, dawr neitupa ber niawm tak dulkiar zet mai hnenah chuan a va keng phei ta a.

"Doctor- ho pawh hi tinge chhiar theih tura ziah ve mai awm! An in lak style ve na nge an thatchhiat vang ? Nge an hawrawp hi a chhe ve hrim hrim le ? Mi thiam bik leh lehkhathiam thei bikteah kan ngai sia, doctor ni tur hian hawrawp that vak pawh a lo ngai lo a nih hi! Mahse, he pa em em hi chu a ti lutuk ve deuh a ni lo maw...? Kei chuan lo chhiar thei lo mahila, damdawi zuar leh zel pawhin an chhiar thiam lo a niahhhh!" tiin keima chhut thiam ang tawk te tein ka lo inngaihtuah ve nasa mai a.

Beisei taka ka thlir lai chuan, a pu ber pawh chuan a chhiar thiam ngang lo aniang, a rawn let a, nui sang chung hian, "Hei chu kan nei tlat lo mai, kei phei chuan nikhatah vawi 3 tih bak kha ka chhiar thei miah lo" a ti a. Engtin mah chhang lovin a lehkha ken lai chu ka pawh thlak sak a, ka inher nghal vut a.

Ka rilru a buai tawh khawp mai a. Hmanhmawh tur khan min ti nasa hle si a, damdawi lah chu ka la hmu kim bawk si lo. Ka zawh apiang chuan an la nei lo zel si a, damdawi zawrhna dawr phei chu a indawtin ka zawt phei deuh vek tawh a, tuman an nei bawk si lo! Ka let chho ang a, ka hmuh zawh loh thu ka hrilh tawh mai dawn em ni le ka ti rilru hman tawh a. 'Aaaa..bei nge sei run dung an tih kha, khaw'nge sawlai damdawi dawr pathum ka la zawh loh ho saw ka va zawt kim leh reng reng teh ang' tiin hmanhmawh takin ka chu lam pan chuan ka pen phei pawk pawk a.

A hmasa ber chu ka va zawt a, ka rinlawk ang ngeiin "Nei lo" tih pahin lu min lo thin san leh mai a. 'He doctor pa zet chu min va han tibuai em em ve maw le! Hetiang ang damdawi vang lutukte han inchawh reng reng! A vang si a, a mante hi a lo to hrep ang a, ka pawisa ken pawh hian a lo daih lo mai ang aaa..' ti chungin a piah deuha mi chu ka va zawt leh a.

Hmeichhe te tak te, sam kir bip bep hian sakawrbakcheh hian eng emaw ni hi a lo chep zat zat a. "Ka pi.." ka ti hman chiah tihah chuan a rawn hawi chhuak a, min melh hrep hian ka hria a, 'Pi' a duh loh hmel hle kher mai! Inthlahrung ang reng takin ka damdawi lehkha rawng eng dal lam ken chu ka'n hmuh a, "Hei hi in nei em ? Helai damdawi dawr phei zawng zawng hi ka rawn zawt phei vek tawh a, tuman an nei lo reng reng" tih pahin uar zetin damdawi dawr ka kal pelh tawh ho chu kan kawk vak vak a. "Canteen-ah pawh an nei lo, a vang khawp mai" ka'n tih chhunzawm nghal a.

Ka lehkha ken chu a la a,a bih thuak a, a rawn nui chhuak ta vak vak mai a. A nuih za lutuk chu a bu ta tlawrh tlawrh mai a, a khuh deuh bar bar bawk a. A ngaihna ka hre lo kher mai, ka en ve ringawt a. Vei vak ho lah chuan min en duh hrep lehnghal a. Chu nu samkir bip bepin min han nuih ta vak vak ringawt mai chu a ngaihna ka hre lo em em mai a, ka ding khawng reng a,a nui kun tlawk tlawk chu ngawi rengin ka lo thlir ve tlawk tlawk ringawt a.

"Eng nge ni ta ? Eng nge awm zia a ? Tinge i nuih tak chiam chiam mai?" tia ka'n zawh lah chuan a nuih lah chu a za tulh tulh mai bawk si a. A ka a rawn ang zuau a, thil eng emawni hi a rawn sawi dawn a, a nui leh thin! A tawpah chuan ka thin a rim deuh tan ta a, 'Mai mai chuan, engah nge maw min nuih vak vak chu le ? Hmelchhe ropui si!' tiin ka rilru chuan a lo hau deuh tan mai tawh a.

A tawpah chuan insum hmui hup tut tut chung chuan tihian a rawn sawi ta a. "Ka pi min ti bawk a, ka pu ka'n ti ve ang che. Ka pu, i damdawi lei tum hi dawrah an zuar ngai lo. 'TUILUM' a nih hi! Nikhatah tuilumin a NGUM (bed-sores) vawi thum in sil ziah tur tihna a nih hi!" a'n ti chiah mai chu ka nuih a za bawk si, ka zak bawk si chu ka sen tawn tawn hian ka inhria a. Tukhum thak lo pui chu ka hiat ka hiat ringawt a.

Zakru tak chungin lehkha eng chu ka la a, PA 4- NA chu ka'n zuk enchiang ve leh a, ka la zuk chhiar thiam chuang lem lova, mahse, zahzelah "Eeee.. a lo nih reng hi!" ka'n ti thla ve ta ngawt a.