INHMEH LO KHA AN INHMEH LEH SI!

"A va chhe lo ve a.." ka thianpa hnena tih pahin chuan nula chhuak ta chu ka thlir zui hu hu a. "Mizo hmeichhiaah chuan a aia tha kha chu an tam bik vak lovang a" ka'n ti zui a. Ani chuan "Mathani anih kha, kan veng nula chhuanvawr a nih kha. Mahse, beisei chi pawh a ni tawh lo, karlehah khian pasal a nei dawn" nui hak hak pah hian a ti a. "Ka va ui e, min tawng lo chu a pawi hle mai a" ka tih fiam lai chuan chu nula ngei mai chu dawr chhungah chuan a rawn lut leh a. A hnungah chuan mipa hmel bum ro ang reng tak hian zakdawh tiang nen bai auh auh chungin a rawn zui lut bawk a. Chu pa chu hmel bum ro ka ti ngawt a, a hmai dinglama ser lianpui inrin ruak vang ani mah zawk a, ser chu awm lo se, tlangval hmel pangai tak a ni ngei ang tih ka va hmuthiam a.

Ka thianpa nen an inbiak laite chuan chu nu chu ka lo thlir vung vung a. A nui hmelte chu a va mawi tak em! 'Ria chum bat' an tih thin hi tawngkam chiahin ka lo hre thin a, mahse, he nu an sawina hi a nih ka ring nghet nghal bur a. A mitmeng, a hnar, a hmui, engkim mai chu sawiselna tur reng reng ka hre lo. A tawng dan leh a chezia reng rengte chu mahni inringtawk ve tak a ni tih hi a hriat hle mai a. Kebaia chu a ngaihsak hle mai a, a duat hmel khawp hian ka lo hria a. 'An chhungte a nih dawn hi' ka lo ti rilru a. Reilote hnuah chuan chu nu chuan duat hmel deuh hian kebaia chu a kai a, hlim hmel tak hian an chhuak dun leh ta a.

An kal liam chiah tihah chuan, "Kha pa kha a nih kha" ka thianpa chuan a'n ti ringawt a. "Tu maw ? Eng maw?" ka lo ti hu a. "A pasal tur a nih kha, tuna mi kha.."a ti chiah mai chu ka phu chiang kher mai. A fiamthu a nih ka ring a, a lo ni der si lo. Rin harsa ka ti kher mai. "Engtin nge khatiang hmelchhe lutuk, ramhuai ang deuh kebai lehnghalte a duh a..!?" ka'n ti deuh chiam a. "Midang pawhin an ti zel alawm" a ti a, a nui mai a. Khatiang nula hmeltha em em khan kha kebai hmai ser deu do pa kha pasalah a nei dawn a maw !!!? Ka lo ui em em mai a, khatiang em em nula hmeltha tih kha ka la nei ngai lova, chu nu chuan kha zakdawh tiang nena bai uih uih, hmel bumro pa kha damchhung atan 'Tiam tlat e' a tih pui dawn a nih chu!!?? Awih harsa ka tih em avang chuan ka thianpa chu an chanchin ka zawt chiang ta a.

"Mipa kha Zuala a nia. Mathani min hrilh dan chuan, college a kal laiin a college kalna a hlat deuh avangin firs period hi a nang hman lo thin a, Zuala kha zirna ngaisang mi a loh nih avangin chutia first period a 'miss' ziah chu tha a ti lo hle a. Office kal hma hian a rawn hruai ta ziah thin a. An veng a lo inhlat ve deuh bawk avangin Zuala tan pawh chhuah hma a ngai thei lutuk a, office tlai kha a duh bik si lo nen, a chang phei chuang zing chaw ei lote khan amah hruai turin a rawn kal fo thin. Vawi khat chu zingkara a buai deuh avangin a rawn chhuak tlai a, a hmanhmawh lutuk chuan bike chu a lo khalh chak viau mai a. A vanduai ai ve reng aniang, a hmaa taxi tlan lai chu kawngsira passenger-in an lo phar avangin a ding thut a, chu chu a va su ta nghek mai a ni. A su na bawk a, amah chu invawrh chhuak lawpin taxi hnung darthlalang chu a va deng keh chuaih a ni awm e. Chung darthlalang keh chuan a hmai a at kak duaih a, hmun 12 laiah thui a ngai ta a ni. A thi lo kha a hmuna hmutute chuan mak an ti viau a ni awm e. Chuta tang chuan hmel pangai a pu ta lo a ni. Mathani lah chuan, 'Keimah vang anih avangin a hmai ser te mai mai chu ka hmu mam vek' a ti fiam vel mai mai thin" a tih lai chuan ka mitthlaah chuan Kebaia hmai ser thla ruak leh chik nuk mai chu a rawn lang a. 'Midang tan chuan hmel rapthlak leh tihbaiawm tak nimahsela, Mathani tan chuan hmangaihna leh inpekna chhinchhiahna a ni hlauh thung dawn si a' ka lo ti rilru a.

"Anih a ke kha tinge a va bai nasa ve ? Zakdawh tiangte kha a hawl a?" tia ka'n zawh chuan hmel ti ner nung chung hian, "A nau saw lawm, saw pa saw chu ka beng chak a nia" a ti ta zek a. "Engati nge a ? Deuh teh hrep che chuan" ka lo ti a. "Ruihhlo hi a duh ve sia, a pawi lai ber chu, a dawih ve sia, mi tihbuai a hrat ve bawk si saw nia. Nikum christmas hma deuh khan Zuala bike hi a lo la chhuak a, mi a lo va su a, a lo va cho vel zui bawk a. A ngam leh si lova, an rawn um haw a, an kawtah an rawn nangching a, an tam ang reng sia, an khawih hman tep tihin Zuala leh Mathani inchhung atang an rawn tlan chhuak a. Thil awmzia an han zawt dawn a, an lo rui ve hlawm bawk nen, an pawr khawp mai a, thu tha a sawi hleih theih ta lo a ni awm e. Mathani chu tawngkam zahmawh deuh deuhte'n an lo chhaih vel a. Zuala thinin a tuar ta ngang lova, Mathani chu inchhungah a nawr lut lawk a, chung ho nen chuan an insual ta chiam a ni awm e. Mal leh mal chuan tuman an hneh silova, hmanrua nen an bawr huk a, thingzai bungten an hlap chiam a ni awm e. Mathanite'n police an va phone a, an lo thlen meuh chuan chung ho chu an lo tlanchhe hman vek tawh a ni awm e, rawn thleng har phei se chuan an vaw hlum hman em em ang an ti" a tih lai chuan, "Mathani nau pawh chuan a pui miah nang e ? Midang pawh an awm lo mi a chutia an sawisak rawn vak a ?" ka lo ti a. "Aaa ka hre chiang bik vak lo, midang min hrilh chhawn ve leh ania, ka zin laia thil thleng ania. Police-in an man a, mahse, mi hausa fate an lo ni hlawm a, reiloteah an chhuah leh vek a ni awm e" a ti a.

Chu Kebaia chu a hmaa ka lo thik rilruk teh lul nen tunah chuan ka khawngaih ta khawp mai a, ka khawngaih rual rualin ka lawmpui em em mai bawk si a. 'Khatiang hmelchhe lutuk, ramhuai hmel pu ke bai lehnghal' tia hrechiang lova a chanchin ka lo sawi vak maite chu nuam lo ka tiin ka inthiamlo hnuhnawh hle a. A hmaa inhmeh lo em em a ka lo hmuh kha thil awmzia ka'n hrechiang chu inhmeh ka ti thar em em mai a. Ka mitthlaah an chhuak tur Mathani'n duat deuh maia a kaia, hlim hmel taka an chhuak laite chu a rawn lang thar leh a, ka thinlung chuan a lawmpui ta em em mai a.

Ka tho thut a, ka rilru chuan thil eng emaw tih sak ve a chak ta tlat mai a. Ka thianpa hnenah chuan, "RS, i dawra mi hi a tha ber nia i hriat hi min lo pack sak thlap la, an inneih present atan lo pe ta che. Petu hming hriat loh i ti mai ang a, a man chu to deuh mahsela a pawi lo a nia aw" ka ti a. Ani chuan, "Aw le, keipawh eng nge ka pek ang aw ka lo ti a, thil tha deuh pek ka duh, ka lawmpui dun tlat" a ti ve a. Chu mite kar leh lawk maia nupa ni mai tur inhmehlo tak nisi inhmeh em em si te chu ka rilruah engtin emaw tak an cham zui a, 'hmel leh taksa mawinaten a hip beh zawh loh te hi hmangaihna chuan a lawmtakin a pawm bet tlat thei si a' ti rilru chungin ka thianpa dawr chu ka chhuahsan ta a.