THU LEH A TAK

TAH LEH HA THIALNA ROAD
“Zanin chu ka lo leng lo mai ang, ka bike ka siamtir a” ka tih pawhin, “Taxi-in rawn kal mai rawh” a tih tlat avangin taxi ka la a, Chaltlang lam panin ka tlan ta vang vang a. Dan pangngaiin ka leng rei leh pek hle a, duh berte bula awm hi chuan sana hi a lo vir chak khawp mai, a kal mai pawh ni lovin a tlanin a tlan ta emaw tih mai tur a ni a, hriat loh chhungin dar 12 a lo ri tep tawh a.

Haw ka tum meuh chuan 12 a pel tawh a, an kawtah taxi min chan pui a, mahse, zan a rei tawh avangin a vang tawh kher mai, a vang pawh a ni lo, a awm lo a ni e. Min rawn lam tura hrilh tumin thiante ka’n phone kual a, tumah lah chuan an pick up thei tawh der si lova, “Mmmm...lut mai rawh, tihian ka kal ang a, kalkawngah ka hmu ve mai ang” ka ti ta ringawt a. Ani chu inah ka luh tir a, kalkawnga taxi hmuh fuh mai inringin kein ka kal ta a.

Chaltlang kawn ka thleng phei a, taxi rawn tlan a awm tak hlauhin tiin ka’n ding deuh vang vang a. Minute 20 vel ka din hnuah pawh chuan bike pahnih chak deuha rawn tlan bak lirthei dang engmah ka hmu lo. ‘Chanmari kawnah tal a awm ang a’ ti rilru chungin ka kal leh ta zel a. Chanmari ka zuk thlen pawh chuan taxi hmel hmuh tur a awm lo, motor dang hrim hrim pawh a vang kher mai, ka beidawng deuh chu Zarkawt lam panin kein ka kal phei leh ta tauh tauh a.

Zarkawt ka thlen phei chuan ka ke a kham tawh kher mai, ka kephahte chu ka pheikhawk chhungah chuan a sa vut vut a, ka bawpte chu a rawl thum a, ka hah tawh bawk si nen, ka thin a rim thut. Ka duati chu ka ngei tan, ‘Ka lo leng lo mai ang’ ka tih pawh khan, ‘Lo leng hram rawh’ a ti vei tlat a, amah chauh a inngaihtuah, Chaltlang atanga Mission Veng thleng kein haw ve ngat dawn se..’ ka ti rilru a, ka kal tau nghawng nghawng a. Chutih lai chuan a rawn phone a, ka lungawi loh em avang chuan ka pick up duh lova, a rawn call char char a, ka hah tawh bawk si nen chuan ka reject hmak hmak a. Vawi 10 chuang ka reject hnuah chuan, “Tige reject zel, koge thlen th?” tiin mes sage a rawn thawn a, chu pawh chu ka reply duh loh avangin a rawn call leh ta a, chu pawh chu ka reject zel, “Ege omxia, pik duh lo a, repy duh bok c lo, khoge om?” tiin message a rawn thawn leh a. “KEIN K HO, AIZOL K THLEG TOH” tiin thinrim deuhin hawrawppui ngatin ka chhang let a. Rang deuhin a rawn call leh nghal a, ‘Ka pick up ang em aw...?’ tiin ka inngaihtuah tete phawt a, a ring tawp tep tawh ang tihah chuan thinrim zetin green button chu na deuhin ka zuk hmet a, “Eng ngeeeee...” ka’n ti deuh vak bawk a. Ani chuan min khawngaih thu leh hrehawm a tih thu a rawn sawi mial mial a, kei chuan tawngkam khat pawhin ka chhang lo. A tawpah chuan, "In ka thlen hunah ka rawn hrilh ang che" ka ti bung nghut a, ka hang up ta nghal hmak a.

Ka kete chu a kham tawh em avangin a duru-suih ut ut tawh hian ka hria a, ka kephahte pawh chu a na tawhin a thip hial hian ka hria a. Khaw vawh lai mahnise, a lum ka tih em avangin treasury ka kal lai phei chuan ka jacket ka hlip hial a. Khatla ka thleng tep tawh tihah hian Taxi hian min rawn tlan pel zuk a, ka hma deuhah chuan a lo ding a, min rawn au , “Ka pu, i hmang duh em?” tiin. ‘Chaltlang atangin taxi ka zawng kawngtluana, hei leh chen kein ka kal tawh a, tunah hei ka thleng tep a, ‘Taxi hmang duh em...de de dei dei...rawn ti teh suh, I pu pawh ka ni lo’ tia hauh nek mai hi ka duh a, mahse, ka insum hram hram a, “Duh lo e” ka ti a, “Khawi lamah nge i kal dawn?” a la rawn ti hram a, “Kal mai teh” tia vin hrep ka va chak kher em! “Sawtah” ka ti ringawt a, a tlan ta a, lung chhar lawk a, vawm chawrh ka chak ngei mai. Chaltlang atangin ‘Taxi a la awm mial lo maw le’ ti rilru ran chungin Khatla thleng rawk beidawng leh thinur tak chunga kal tauh sawk sawk hnuah chuan a ngeiawm duh em a ni.

Taxi driver chuan ka thinrimna a rawn chawktho thar leh a, tlaia leng tura Machhuani’n min sawm laite chu ka ngaihtuah chhuak leh a, ka rilruin, ‘Hetiang teh hrepin kein ka haw dawn tih chu hria ila, ka va han leng awm love aw... min sawm leh anih pawhin kea ka haw dawn ai chuan ka leng tawh hauh lovang..’ tiin ka insawh nghawng nghawng a, a chungah chuan ka thin a rim ta viau chu awm hi ka ti a, a message ka chhang duh lo leh a phone ka pick up duh lote chu ti tha hle hian ka inhria a, ka be tha duh lote chu ka inthiam ngawih ngawih bawk. Thlasik khaw vawt hnuaia Chaltlang tawp atanga Mis sion Veng thlenga zan lai pelh tawh hnu lehnghalah, tum reng vang pawh ni lova kea ka han kal haw ngat ngat mai chu lungawi a har a ni. Lungawi leh hlim taka ka tlan hawna kawng 'Lungawina Road' ni thin kha zanin zet hi chuan 'Tah leh Ha Thialna Road' ah a chang zo ta ni mai awmin thinurin ha chang ka thial kawng tluan a ni ringawt mai!

In ka thlen chuan ka chau lutuk chu ka khumah chuan ka thu hnawk a, ka thlen thu pawh hrilh duh lovin ka pheikhawk ka hlip sawk sawk a, ka mu ta hmak a. Ka mut lai chuan ka phone vibrate chur churte chu hre reng mahila ka ngaihsak duh lova, reiloteah ka muthilh san ta thuai a.

KA MESSAGE MIN TIZAKTU
Zing ka tho chu ka phone ka’n en a, ‘23 miss call’ leh ‘1 unread message’ a lo awm a, message ka’n hawng chu ka phu chiang kher mai! Hmana ka message thawn ngei kha min rawn thawn let a, ka thawn ni pawh a rawn type lang thlap bawk a - ‘Even if you want me to, I would walk 100 miles for you, my love!’ Kum tir lama ka thawn kha a ni tih ka la hre chiang khawp mai. Ka rilruah chuan a tana mel tam tak pawh kal huam khawp khan ka hmangaih thu ka thawn a, mahse, a tak tak a lo thlen chuan meuh chuan ka lo tithei hauh lo mai. Mel 100 pawh kal huam nia insawi khan Chaltlang atanga Mission Veng ka kal meuh chuan ka titau nasain ka thinur leh em em mai si a, mel 100 tak tak han kal dawn phei ila chuan....awi karei! ‘Said is easier than done’ an tih ang maiin kan thil sawi mai hi a takah chuan tih a lo har dawn hle mai a, kan tih theih loh pui tur hi lo sawi loh tawp tur a nih hi tiin ka inngaihtuah harh a, ka message dawn chuan min tizak ta kher mai!

Ka mitthlaah ka thianpa Sangtea a lo lang zawk a, hmanni lawkah a bialnuin a then avanga intihhlum a tum dan kan nuihzat ziate kha a lo lang uarh uarh a. A bialnuin a then avangin ‘Ka tan dam hian awmzia a nei ta lo ve’ tiin lungngai leh rilru hah em emin hruizen nen an huana Lamkhuang kungah inawhhlum tumin a chhuk thla a. Lamkhuang kung a thlen hma chuan rul a hmu ta mai a, a hlau lutuk chu rang zetin a inher a, a hruizen ken chu a paih lawk a, ‘Rul...rul..rul...’ tia au chul chungin chak zetin in lamah a tlan chho a, a chhungte hnenah ‘Ka thiha ka thih teuh zia chu...’ tiin rul a hmuh hnaih zia leh a chuk hman teuh zia thu chu thaw hlawp hlawp chungin a han sawi ta vel a ni awm e. A hun laia ka nuihzat teh lul nen, keipawh eng nge ka nih bik? A tana mel 100 kal inhuam kha mel 10 pawh tling lo tur ka kal dek dek a, ka thinrim avangin ka be duh lo ringawt! ‘Shame on me...’ ka inti mawlh mawlh mai.

I SAWI HMAIN NGAIHTUAH HMASA RAWH
Kan inkawt electric banah pawh ka lawn theih loh laia, ‘I tan chuan arsi pawh lak ka inhuam e’ kan han tingawt maite hi ngaihtuah chian chuan a va lo nuihzatthlak em! ‘I tan chuan thih pawh ka huam asin!’ ti chung reng siin, thih chu sawi loh mualpho pawh ka ngam leh si lo, mualpho ai chuan tiin a ruka tualthah (in hrethiam!) ka thlang zawk leh tlat si! Inti Sap tawng thiam taka, ‘I’d do anything for you’ tia biahthu ka hlan ngun teh reng nen min mamawh em em laia ‘KA HMAN LO’ leh tlat thin site ka ngaihtuah let phei chuan ka zak thar a, a message rawn thawn chu chhan let ngaihna ka hre hlawl lo!

“Ka tih theih tur leh ka tih ngam tur chin bak engmah ka sawi tawh lo ang, ka sawi apiang erawh tih theih leh tih ngam zel ka tum tawh ang” tiin ka zawitein ka phun sap sap a, ka lu ka bu nghat nghat bawk a. 'I thil sawi tur reng reng, i sawi hmain uluk takin ngaihtuah hmasa thin ang che' ka inti a, rilru thar put ngei tumin ka khum atang chuan ka tho chhuak ta a.