... KA ZAK TLAT SI A..!

CLASS X-AH
Classroom chu a reh duk a, kan English 'Miss' a rawn luh tawh hi chuan tumah tawng ngam leh ninhlei ngam kan awm ngai lo. Ka zawn chiah chhak lama hmeichhe thu tlar zinga ka lam hnaih ber chu ka melh ru deuh reng a. A sam dum tle siau mai ngil tak chu sang takah a tawn a, a lang fai var mai bawk a. Khawlum avanga a biang tai sen tan mai leh a hmui lipstick tel hauh si lo sen vam ham mai te chu ka en kham thei lova, ka hriat loh karin ka lo hawi chho leh vung vung thin. Ka 'Best Friend' tia ka lo sawi ve thin kha a ni si a, mahse, thian ang chauha en harsa ka tih zia leh 'ka ta NI HLAUH SE AW..' tia ka duhthusam ka thinlunga riak ta reng mai te chu mak ka inti hle mai a. Mahse, chutiang ang chuan min en ve si lo tih ka hre chiang si a. School banah chuan a ngaitein kan pahnih chauh chuan kan haw dun leh a. Ka thinlung chhungrila thil awmte chu a hnena phawrh ka duh hle nachungin ka ngam ngang si lova. Ka hmangaih a ni tih hrilh tawp mai ka duh, mahse, KA ZAK TLAT SI A...

CLASS XII-AH
Ka cellphone a rawn ri tang tang a, amah ngei a lo ni a. Tap faih faih chungin a uite 'Micky' thih thu a rawn sawi a, a khua a har thu leh leng tura min duh thu a rawn sawi tel bawk a. Tichuan, ka va leng a, kan pahnih chauhin an inah chuan kan thu dun a, chips leh lays te ei pahin a titi siam siam a. A hmel chu ka'n en thin, ka en chian poh leh a tha tulh tulh mai si a. A mitmeng mawi tak te chu enkham a har hi ka ti ngawih ngawih a. Kan movie en lai pawh chu ngaihtuah nachang hre hauh lovin ka lo en leh vung vung thin. 'Ka ta 'ka ta ni hlauh se aw..' tiin duhthu ka lo sam a,mahse, Chutiang ang chuan min en ve si lo tih ka hre chiang si a. Darkar thum chuang zet kan thut dun chhung chuan ka thinlung chhungrila thil awmte chu a hnena phawrh ka duh hle nachungin ka ngam ngang si lova. Ka hmangaih a ni tih hrilh tawp mai ka duh, mahse, KA ZAK TLAT SI A...

COLLEGE LAMAH
Admission tih a lo hun a, kan inah rawn kalin "I luhna apiangah ka lut ang, i bulah lo chuan khawiah mah ka kal duh lo" a rawn ti a. Min hnaih zet hian ka bulah a thu a, thian ang chauha en harsa ka tih zia leh ''ka ta ni hlauh se aw...' tia ka duhthusam ka thinlunga riak reng mai te hrilh nghal mawlh mawlh ka duh a. Mahse, Chutiang ang chuan min en ve si lo tih ka hrechiang si a.Ka thinlung chhungrila thil awmte chu a hnena phawrh ka duh hle nachungin ka ngam ngang si lova. Ka hmangaih a ni tih hrilh tawp mai ka duh, mahse, KA ZAK TLAT SI A...

GRADUATION DAY
Ni a liam a, kar a ral a, thla a her a, kum a vei a, mitkhap kar lek nia ka hriat chhungin Graduation Day a lo thleng ta mai a. Gradution Day Programme pui ber kan hman tuma stage-a a lawn chhoh laia a pian nalh leh duhawm takte chu mit tla lekin ka lo thlir a. Lawma avanga zuang tawr tawr chunga min rawn kuah laite chuan 'ka ta 'ka ta ni hlauh se aw..' tiin duhthu ka lo sam a, mahse, chutiang ang chuan min en ve si lo tih ka hre chiang si a. Ka thinlung chhungrila thil awmte chu a hnena phawrh ka duh hle nachungin ka ngam ngang si lova. Ka hmangaih a ni tih hrilh tawp mai ka duh, mahse, KA ZAK TLAT SI A...

INNEIH NIAH
Tunah chuan Biak In thuthleng hnung berah kan thianzahovin kan thu thap a. Ka 'best friend' ka tih ve thin khan pasal a nei dawn a, reiloteah inneih kawr fual mawi tak nen kawngkapuiah a rawn lut dawn tih ka hria. A rawn lut ta, a nalh kher mai. Min hmuh tur ngeia lo thu hnai ka ni bawk a, min rawn hmu ta ngei reng a. Min rawn nuih sak a, mahse,ka nuih let ve thei tlat lo. "Ka nupui ni zawk hlauh se aw.!" tiin duhthu ka lo sam a. Pastor'in "A rem lohna hria kan awm em..?" a tih lai chuan din hluai a, ka thian tha ber chu ka hmangaih tak zet a ni tih mipui zingah chuan han au chhuah pui mai ka duh a. Mahse, Chutiang ang chuan min en ve si lo tih ka hrechiang si a. Ka thinlung chhungrila thil awmte chu phawrh ka duh hle nachungin ka ngam ngang si lova. Ka hmangaih a ni tih sawi tawp mai ka duh a, mahse, KA ZAK TLAT SI A...

VUI NIAH
Thang hnih lian zet a ral hnuin ka 'best friend' ruang an zalhna kuang chu mittui nen ka thlir reng a. Mipa naupang fel tawh tak hian mipui kara rawn innek talh talh chungin ka lam a rawn pan phei a. "'Hei hi va pe rawh' an ti" tih pahin envelope hlai ang reng tak hi min pe a. Lawmthu pawh ka sawi hma chuan a lo bo leh daih hman a. Mipui zing atang chuan ka kal hrang a, mi bathlar kailawn fai ang reng tak chu va belin thuthmun ka rem a.

Tichuan, muangchang leh uluk takin ka'n hawng a, post card mawi zet mai hi a ni a. Tlang kara ni her liam tur hmeichhe naupangin phul hmuna thu chunga lungleng hmel taka a thlir lai lem hi a lo ni a. Kan let thawk a, a leh lamah chuan thil eng emawni hi a lo inziak a. A fiah vak tawh lova, a ziahna a rei tawh a ni ngei ang tih hriat tak hian a then chu a reh lek lek tawh bawk a. Ka tarmit ka phawrh a, ka mit si dawnin ka keng hnai a, uluk zet hian ka zuk chhiar a :

" 'A ta ni hlauh ila aw..!' tiin ka 'Best Friend' chu thlir ru rengin duhthu ka sam thin a. Mahse, Chutiang ang chuan min en ve si lo tih ka hre chiang si a. Ka thinlung chhungrila thil awmte chu a hnena phawrh ka duh hle nachungin ka ngam ngang si lova. Ka hmangaih a ni tih hrilh tawp mai ka duh, mahse, KA ZAK TLAT SI A... "Ka hmangaih che" min han ti se,"Keipaw'n ka hmangaih che" tih ka va chak tak em!"

He thuziak zet hi chuan min va thawngin min va deng na lehzual tak em! A thihna khan min vel a, biangah mittui a luang a. Tunah, a thlarauin a chhuahsan tawh a ruang vawt ngiaiin kuang chhunga min luhsan hnuah chauh KA RILRU ANG CHIAH A LO PU VE RENG THIN a ni tih ka hriat meuh chuan mittui chuan bianga luan mai a duhtawk ta lo, a sur hian a sur thla zung zung a.

Thuziak hnuaia a ni(date) lo inziak chu mittui kar atang chuan ka zuk bih chiang leh a...

"Dt. 26 August 1982."

E heu.. CL-X kan nih kum ngei kha a nih hi! Vawiin chiah a ni lehnghal a..!!!!

(Kawng engkimah kan thiltih avanga inchhirna aia "Ka lo ti ta lo kha.. Ka lo sawi ta lo kha" tih avanga inchhirna a hrehawm zawk zia min zirtir a. Kum chawhnu lam ni tawh mah ila, "Ka lo ti ta lo kha aw.." ti leh tur si a ka inchhir ngaih tawh lohna turin ka hmaa chona awm apiang zirna lam emaw, infiamna lam emaw, hna lam a ni emaw, engpawh, hmachhawn zel ka tum ta a...)