KA ROPUI(loh)NA KHUA LEH NULA RIM VAWI 3-NA

KAN TUM RAM LAM PANIN
Fur pui a la thleng lo nangin kal kawng chu a diak lai leh tuitling lai a tam hle mai a, tlanchak a har hle bawk a. Muangchangin kan kawmthlang pa scooter select II ngei maiin ka thianpa nen chuan kan inphur a. Kawng a chhiat em avangin a khat tawk hian kan tlu deuh reng a, vun chhe pilh hi kan pawt leh dun mawlh mawlh thin.

Khaw hrang hrangah ka thianpa nen hian he scooter ngei mai hian office thilah kan lo zin dun fo tawh thin a. Tun tumah pawh hian survey nei tura office lamin min tirh kan ni a, khaw kar kawng a chhiat em avangin kan kal tumna khua chu kan thleng har hle mai a. Tlai lam dar 5 vela khawchhung lut thei mai tura min hrilh kha kawng a nal em avang leh diak bawk si avang chuan kan tlan sawt hlei thei lova. Kan tlu deuh reng bawk a, kan tluk apiangin driver kan inthlak zel bawk a. "Khawi, i khalh thiam lo em mai! Keiman ka'n khalh ang e" tiin kan inchhuh sak zel a. "Ngai lo" pawh ti bik chuang lovin vawi sarih vel zet chu ka thianpa nen chuan driver seatah kan inthut chhawk a.

Khawchhung kan luh hma chuan khuain min thim hnana, ka'n scooter headlight chu a la chhe zui lehnghal a, kan mangang ru dun khawp mai. Siam tumin kan han bei ngial a, mahse, kan thiamin a tlin ngang loh avangin kan buai dun hle mai a. Zan thim hnuaia ramhnuaia han awm dun reng lah chu thil tih chi niin kan hre lova (kan ngam lo a ni mah zawk). "A hnunga chuang zawk zawkin torchlight hian lo en mai ang" ka ti ta a.

Tichuan, driver seata thut kan inchuh ti tih deuh a, a tawpah chuan a hnungah ka thu ta zawk a. Ani'n a khalh a, keiin torchlight-in kan tlanna tur ka lo en a. Kan torchlight ken chu a eng nep bawk si nen, khuarte hi kan dai leh thut thut zel a, a chang leh kan tlu ri leh bur thin. "Ding lamah kal rawh, vei lamah zawk, khuar a awm a nia" tiin ka lo te chul zel a, ka sawina lam apiangah a khalh ve zel a. Tunge khalh zawk pawh ka hre thiam lo, keiin 'tawng' ka lo tum a, ani'n 'action'!

Khawchhung kan luh hma deuh hian "Kha..kha..kha.. chhak lam ah kal rawh.." ka lo ti chul a. Chhak lamah chuan a kal ve mai a, mahse, ka lo hmuhsual chu niin, khuar thuk deuh hi kan dai a, kan tlu dun chiang kher mai! "I va khalh thiam lo tak! Keiman ka''n khalh ve tawh ang e" ka'n ti dek dek a, engtin mah min chhang lo hian "khawi maw" tih leh ka torchlight ken lai chu min pawhthlak sak lawp a. Scooter tun thawh pah chuan a driver seatah chuan a thu a, torchlight chu a in on sa in a hmuam kawh ta put a. Kei aia upa zawk anih avang hian thil a'n tih deuh hmak tawh hi chuan ka hnial ngam ngai lova. Torchlight a hmuam eng vu mai han hmuh chuan nuih a za duh hle mai a, mahse, nuih ngam loh khawpin a thu tak tlat mai bawk si a, ngawi rengin passenger seatah chuan ka
lawn ve leh ta a.

BETTER LATE THAN NEVER
Dar 8.30 ni tain ka hria, khawchhung chu berh em em hian kan lut ve ta a. Chutianga berh luaia khawchhung han luh chu ka hreh rilru khawp mai a, kan scooter rawng hring pawh chu eng rawng nge a ni tih hriat loh khawp hian chirh a kai nasa bawk a. Mahse, vanneihthlak ang reng takin a lo reh tawh fu mai a, tlangval khawlai leng kan tawk zauh zauh tih loh chu mihring hmuh tur vak pawh an awm lo va.

Kawn hi kan va thleng a, patling rual ho hi an lo thu deuh thup a, 'VDP duty vel an nih dawn hi' ka ti rilru a. Kan tlan pelh lai chuan nghah nei ang tak hian kan rawn tlanna lam chu an rawn hawi deuh vung vung hlawm a. Kan va thlen hnaih hnu chuan nu pahnih pawh hi an lo tel ve tih ka hmu thei a, pangpar thi ang deuh hi an keng bawk a, 'Minister an hmuak a nih dawn hi' ka tih rilruk mek lai chuan anni chuan min rawn melh zawk a, kan rawn tlanna lam chu an hawi lehnghal daih hlawm a.

Kan thlenna tur ina kan han innghal lut chu, nu ber hian "E khai aw.. in rawn va thleng tlai ve, kan pate ho nen khan in inhmu em?" a tih lai chuan tlangval pahnih an rawn lut a. Kan hmingte min rawn zawt hnu chuan thil awmziate min hrilh a, a rang a rangin nichina kawna patling lo thu khawm awmnaah chuan kan va let leh ta a. Anni ho kha VC ho an lo nia, min lo hmuah tumin kawnah khan min lo nghak char char a, parthi te nen inring em emin min lo hmuak reng chu niin! Min hmuak tih reng reng hre lovin keini lah chuan kan tlan pel mai mai si a, anni lah chuan an hmuaha te kan nih tih hre lovin min lo thlir liam mai mai bawk a. A awm ve thoin ka hria, mi ropui tak rawn lut tura an ngaih laia scooter tawng tawh lam chirh kai lei luai, a chunga chuangte lah berh em em kan ni bawk nen, inhai chu awl tak tur a ni.

Sap pawhin 'Better late than never' an tih ang deuhvin kawnah chuan parthite min han awrh tir leh hnuhnawh a, ka thianpa pawh chuan thusawina a han nei zui leh rih bawk a. Hei hi ka damchhunga parthi ka awrh hmasak ber a ni a, tun thleng hian a hnuhnung ber a la ni hrih bawk.

NULA RIM ANG AW...
He khuaah hian nithum lai kan cham a. Zan khat chu an khaw nula hmeltha ve ber nia an sawi chu 'RIm ve reng reng teh ang,sawi ve reng reng ah' tiin leng turin kan inbuatsaih a. Nula zei lo tak ve ve kan nih avangin ka rilru chuan a hreh ru khawp mai a, mahse, ka thianpa chuan a tih tlat avangin kan inzui chhuak ve ta a. Ka thianpa lah hi ngaihzawng a neih awm pawh hi ka la hre lova, a insawi theihna ve ber pawh, "Kei chu
hmeichhia hian min star ve vak ngai lo va, se min duh tawh vek vek chuan min atchilh bur zel" tih a ni a. Amah atchilhtu hmeichhia an awm reng reng erawh sawi tur a hre der si lo, duhtu a la hmu lo tluang zel a ni phawt ang!

Tichuan ka thianpa nen chuan an khaw nula hmeltha ber an tih chu rim turin kan chhuak dun ta a. Mikhual nimah ila, Aizawl tlangval kan nih avang chuan confi na thamah kan ngai a, min lo ngaihsak viau turah kan han dah dun thla ngawt a. Khawtual tlangval ringawt ai chuan tlatlum hle turah kan inngai bawk a, phur zetin pen zang vahin kan inzui phei dun a.

A hmain ka thianpa nen chuan remruatna fel tak neiin khunkhan takin kan nula rim huna kan awmdan tur leh kan tawng dan tur kan lo rel fel vek tawh a. Hausa hmel deuhin kan awm tur a ni a, motor pawh ngah hle angin kan insawi tur a ni.

Intih changkan nan dawrah thil hmeichhe duh zawng nia kan hriatte chu kan lei phei a. Kan ak tan a, muangchangin Hmar veng an tih lamah chuan kan phei dun ta a. Current a awm loh avangin kalkawng chu a thim hle mai a, kan arkhawthim dai phei vel mai mai a. Khawchhiat lai a nih avangin kawng chu a diakin a nal hle mai a, tui tling han dai per leh chhawkte a ngai thin a. Ka thianpa chu kawng inti hre fahran hian ka hmaah hian a
kal vei par par a, tui tlingte chu a zuan kan leh thauh thin. A kalna apiangah ka kal ve zel a, thlang lama a kal leh thlang lamah ka kala, chhak lama a kal leh ka kal ve zel bawk a, a zuan apiangin ka zuang zui ve vat thin.

RAMHUAIIN MIN UM..????
An in kan thleng tep tawh ang tihah chuan ka thianpa chuan thil dum ren run hi a su a, a inchhuih a ni mah zawk, chu thil dum ren run chu a rawn tho ta uaih mai a. Kan phu nasa dun kher mai! A thim bawk sia, eng nge a ni tih kan hre bawk si lo. Mit lianpui de ru
mai hi a nei tlat hian ka hria a. Ka tlan ta vak mai a, a hmaa fimkhur taka tui dai hlau zeta kan zuan kan thauh thauhte chu kan pal darh phei chuai chuai a. Ka va lehhawi zawk a, chu thil dum lian ren run mitmu lian pui pahnih nei de ru mai chuan min la rawn um zel chu niin! Kan han tlan dun tak tak mai a, heta tang chiah hian hlauh tak tak chuan a lo
tlan chak theih khawp mai tih ka hriat tak ni. Ka tlan chak hle emaw ka tia, ka thianpa chuan min rawn lehpel fua mai a. Tawlh thlu lo phei se chuan min tlan san daih hial ang chu. Rang zet hian a tho lehnghal a, kar lovah kan len tumna te bathlar chu thaw hlawp hlawp chungin kan va thleng ta mai reng a.

Kan hlau leh hmanhmawh tawh bawk si chuan zahpawh dawn hman lovin an kawngkhar chu kan kik dawt dawt a kan len tumna kawngkhar chu hmanhmawh em em hian kan kik ta dawt dawt a. Pa pakhat hian a rawn hawng a, min han hmu chu mak a tih hmel hle mai a. Kan hlau hmel leh kan thaw huam huam atang chuan thil dik lo a awm ngei aniang tih rin dan a nei aniang, "Eng nge ni ta le ? " a ti a. Keini chuan thaw hlawp hlawp pah hian kan hnung lam chu kawkin eng emaw ni thil dum lian pui mit meng de ruin min um hrep thu kan han hrilh chuan inchhung lama mi ho chu an rawn chhuak ta tuau tuau mai a. Tlangval inleng an lo tam ngang mai a, eng nge kan
thil tawn hriat tumin an rawn chhuak sup sup a, min umtu lo kalna lam chu an rawn en sup sup a. Kan nula rim tur thleng thleng chuan an rawn chhuak fai ta vek a.

"Saw... saw ..saw" tih pahin ka thianpa chuan Kawnveng lam atanga thil dum lianpui rawn kal phei chu a kawk a. Kan vai chuan kan hawi rual thup a, thil dum lianpui meng de ru mai chu a ding thut a, chu veleh chuan a 'bu' ta ruah ruah mai a! Bawngpui dum lek chu lo niin! Tlangval ho chu an nui ta ham ham a, kan nula rim tur lah chu a nui ring ringah a lo la tang zui! A zahthlak duh haih haih khawp mai.

THUTNA KA THLANG FUH LO...
Zahtheih vak ni tawh hek lo, an inah chuan kan lenglut zui ve ta nghal a. Chu nu chu an khaw nula hmeltha a lo ni bawk a, inleng an lo tam kher mai. Thutna tur pawh awm lo khawpin tlangval ho an thu khup mai a. Current a awm loh avangin tapchhaka an meituah eng chu chu ina eng awmchhun chu a ni deuh mai a, chu lah chu inleng ho chuan an thut hual thup lehnghal a. Pindan lama laltin eng lo zet zung rawn inkap
chhuak chu a ni leh mai bawk a.

Ka thianpa chu kei aiin a zakthei lo bawk a, sum a la a, a letling zawngin a thut a, nula hnai deuh tak mei hnaih tak siah chuan a va inzep ve ta a. Kei chu mi inthlahrung chi ka nih avangin tapchhak kil thim laia thil dum deuh herhsawp nimaia ka hriat lam chu ka bel ve ta a. Ka'n thu chu a lo dup deuh thaih a, inti thutna nei fuh zet hian ka thu ta hman a.

Khawtual tlangvalho chuan kan hming leh awmnate hawihhawm tak hian min han zawt a, ka thianpa chuan dawt tlem belhin a lo chhang zel a. An khua kan kal chhante chu ram lei tur zawng angtein a sawi a, an motor service nan a tlak a ni dawn em tih enfiah tura lo kal pah kan nih bawk thute a la sawi zui. Chutia tui taka a insawi theih lai vel chuan ka mawng hi a rawn lum ta pap mai a. A tirah chuan mei kan thuthnaih vangah ka ngai mai a. Reiloteah chuan ka mawng chu a rawn sa telh telh a, 'Tinge maw ni
le' ti rilru chunga ka thutna ka zuk khawih chiah chu le! Vawk chaw bel lo ni rengin! Vawk chaw chuan ka mawng chu a lo chiah lum lek chu niin!

Ka tho ngam tawh bawk si lo, ka mawng zawng zawng chu a huh pur mai a! Haw rawt mai tumin ka thianpa ka va en a, a ni lah a lo titi tui em em mai si a. Ka mawng lah chu a sa tulh tulh buk si, ka va mangang tak em! Ka va hawi phei a, nula lah chu a ner a ner a, a hnar a hup leh thin, a hawi kual ruai reng bawk a! 'Chhai le, ka vawkchaw thut rim hi a hria a ni ngei ang' ka ti rilrua, ka lo zak ru em em a, tih vak ngaihna ka hre bawk si lo. Nichin lawkah khawtual tlangvalho leh amah ngei khan min nuih chiam tawh kha a ni a, min hriatchhuah vaih chuan tih chi dawn loh lutuk ka ti rilru a, ka mangang em em mai a!

A ROPUI BIK LO...
Ka thianpa lah chu khawtual tlangval dang leng ve te chuan ngaihsan hmel zet hian thil an lo zawt sek bawk si a, nuam a ti lutuk chu min ngaihsak reng reng si lo. Nula hnaih thei ang ber chuan a tawlh leh hrut hrut thin, kei lah chu rilru hah em emin ka thuthmunah chuan tuma hriat pui si lohvin ka awm ngawt ngawt a, kan dinhmun inang lo lutuk chuan ka tah a ti chhuak kher mai! Ani lah chu che fuh inti zet hian nula lam hawi chuan kak suah hian a tawlh hnai hurh hurh reng mai si a!

Kawngkhar a rawn inhawng rawk a, naupang kum 11 mi awm vel hi a rawn lut a. Tapchhak mei lum bulah chuan a rawn inzep tawlh tawlh a, "A va uih e, bawng êk rim a nam" a la ti lung lung zui lehnghal a. Ka thil thut hi a ni ngei ang tiin ka lo hlauthawng lutuk chu lo ip chawih chawih a. Nula chuan, "I va leng rei ve, naupang mut a hun, va mu tawh rawh" a tih chuan chu naupang chuan, "Ka ke ka hem lum ang a, ka mu ang" a ti mai a. A sawi rual rual chuan a nui ta nghek nghek mai a, "He pa hiiiii" tih pahin ka thianpa chu a kawk ta vin vin mai a. Ka va en phei nak chuan ka thianpa chuan a hma lawka a bawp a kak suah chu rang em em hian a chip vat a, a kap chu a zen ta ngur ngur a. Tlangval ho chu an lo nui ham ham a, nula pawh chu insum tih hriat tak hian a inhup tat tat a. Keilah chu ka lo lawm em em mai a, ani nuam leh tlatlum taka a awm laia kei vawkchaw bel lo thut tui pur pui bik kha chu a hrehawm dan a riang em a ni! Ka thil tawrh pawh chu a zia ve sawt hian ka lo hria a.

A zak ve deuh ngang aniang haw a rawt ta chung chung a, kei pawh chuan bang lam ka mawng hawi tir tat tat chung chuan ka zui a. A thim hlauh a, ka mawng huh pur mai chu an hmu lo hlauhin ka hria. Ka hmaah chuan kalin kawngkaa a chhuak tur chu mei eng atang chuan chiang fahran hian a mawng a bawngek kai deuh luai chu ka va hmu ta a. Nichina nula ner vak vak nachhan leh a hnar a hup sek nachhan kha a lo nih ngei hi, thil dumin min um laia a tawlhthluk khan bawngek nalah a lo tawlhthlu lek chu niin!

NAUPANG THIL HMUH KHA...
Kan thlenin lamah kan haw nghal vang vang a, a tuk zing karah Aizawl lam panin kan haw nghal nal nal a. Kalkawngah chuan, "Nizan ka inbual zawh khan kekawrte ka hak theihnghilh daih a, zipper ka khar lo tih hre miah lo khan ka lo thu hnai ve hurh hurh a, naupangin a rawn kawh khan ka zuk en mai chu..! Mei engah khan a lo inkhai zuar maiah!" tia min han hrilh leh mai chu ka scooter khal lai pawh chu khalh tha hlei thei lovin kan nui tha leh tak tak mai a.

He khua hi cheng nuaih 1 hlawh tur pawhin ka tlawh leh duh ang em tih ka hre rih lo tunah chuan!lol