KA SIM PHAH HMAK! (Humour)

Mihring tupawh mai hian eng emaw thil chin than tha lo tak, kan sim hleihtheih si loh hi kan lo neih deuh theuh mai a lo ni a. Chu kan chin tha lo tak chu kan tih lai ngei ngei pawhin kan ti tih kan lo inhre lo thin lai tak hi sim a har chhan tak pawh a ni awm e.

MI UANG MALSAWMA
Kan school kal laia ka la hriat reng chu kan thianpa pakhat, Malsawma (a hming tak chu sawi chi loh!lol) hian chin dan mak tak mai hi a nei a. Kan thianzahoa kan han ding khawm hi, amah hnaih ber a han kuah chawt a, an hnute han tham fiam nghal mai hi a ching a. Mipa leh mipa chutiah han intih chu kan duh lo nasa mai a, kan tal vak a, kan chiau le lu thin. aThiante fiamthuah ngaiin huat enah erawh kan en duh lem lova. A tirah chuan fiamthu nan tak hian a hmang fo a, a hrechiang deuh tawh ho chuan a bul hnaiah kan ding tha duh ngai lo a, mahse, hre chiang vak lo ho erawh an inrin loh lai hian a'n kuah thuak a, an hnute a tham sak zui thin, an te chel chul thin, thenkhat phei chu an tui lo thei khawp mai. A uang thei bawka, keini tui lo deuha kan te chul lai kha nuam a lo ti tlat zel!

A rei deuh hnu chuan a fiamthu vang pawh ni hauh lovin a tih than laklawh tawh vang nge ni, mi a kuah reng rengin an hnute a lo hup leh chut zel a, a nel vak lohte pawh a lo ti leh mai thin. Chet fuh loh chang a nei ta fo mai a, nuam lo tih chang a ngah ta khawp mai.Mahse, thil hi habit anih tawh chuan kan tih lai reng pawh hian kan ti tih inhriat miah loh a awl tawh thin, sim mai hi a har duh tawh khawp mai.

MISS HABI
Vawi khat chu kan English zirtirtu, Miss Habi (South Indian nu) hi kan class-ah rawn lutin essay min ziah tir a. A ni hi kan teacher-te zingah chuan a thinchhe ber kan ti thin a, kan hlau thei khawp mai. A duhtui em em a, eng emaw tih dik loh hlekah pawh hmaia han ben thuai mai hi a ching thin, kan ngei sia, kan hlau bawk sia, a hnung lam atangin kan chhiatkhum vak vak loh leh 'posi' kan lak khum vak vak thin. Tichuan, essay chu a ziak zo hmasa apiang hian kan va check tir a, a hnu deuhah chuan check tir tum ho chu kan ding bial luih a, kan tam tak deuhah chuan amah chu a hnung lam thlengin kan bial ta luih a.

A dik lo lai deuh a hmuh chuan Miss Habi chu 'English pai' deuh hian a ang chiam a, chutia a an chiam tawh chuan, naupanga thuchang, midang tih dik loh lai hmu chakin thiante dar karah kan bih tawk tawk a, a pentui sen hmanga a thai kawkalh hrawk hrawk lai chu hmuh ve kher tum hian hnung lam ami pawhin thiante darah kuahin kan bih tawk tawk hlawm a.

MI UANG LO MALSAWMA
Ka hun a thleng ve ta a, hlauthawng tak hian ka'n hmuh a, ka hlauh ang ngei ngei chuan, 'You, stupid fellow' tih atangin a tan a, pen tui sen hmang chuan a thai kawkalh ta kawk kawk mai a. Chutih lai tak chuan Malsawma ngei pawh chuan 'view' tha tak neih a tum a ni ngei ang, Miss Habi awmna lam atanga en tum hian hmanhmawh zet hian a han bawh chho ti tih deuh a. Awr phiar tawng tawnga min vin hrep hrep lai tak chuan Malsawma pek chuan engmah ngaihtuah miah lo hian a kuah ta chut pek a, a tih dan pangngaiin Miss Habi hnute chu a hum sak zui nghal hmiah bawk a. A kut chu meiah a kang ta mai emaw tih tur hian 'Eeeh' tih pahin rang em em hian a la sawn lehnghal a, a hum chhung chu second khat bak a tling kher lovang, mahse, a pawi tur angin a pawi zo vek tawh! A uan theih teh reng nen tun tum chu a uang ta lo chiang kher mai!

Miss Habi'n rum em em a ka thianpa Malsawma a melh chho lai ka va hmuh chuan kan nuih a za bawk si, kan nui ngam bawk si lo, Miss Habi hmelah chuan mak tihna leh thinurna meipui inmung tluk tluk chu ka va hmu thei hian ka inhria a, ka thianpa hmel ka han en chho leh, ani hmelah chuan inthiamlohna leh zahna, hlauthawnna zawng zawng hmu thei bawk hian ka inhria a, ka'n melh tawn thin, kha lai boruak kha reilote mah nise, boruak inmung rit lutuk avang chuan rei tak ni hial hian ka lo hria. Kan vai mai chuan eng thil tak lo thleng ang maw tih melhin anni pahnih chu ka'n melh tawn a, a awm mai mai pawh kan tih em em Miss Habi, kalkawnga kan tawh dawn pawha kan hel tawk tawk, he nu hnute han khawisak ngamtu chu engtin tak ti dawn maw ? Engtia nasa nge hremna a pek dawn tih kan hre chak theuh tih sawi chhuah kher ngai lovin kan hmelah chuan a lang chiang nghal vekin ka hria.

MISS, SORRY, I AM NOT..
Miss Habi chu thinrim hmai sen tun chung hian a rawn dingchhuak ta, tawng pawh a tawng tha thei lo, "You..you you..how dare you..." tih pahin Sawma chalsamah chuan a tham lawka, a kek ta bawrh bawrh mai a. Sawma lah chuan, "Miss.. sorry.. sorry.. I am not..i am not" a ti char char a, "I am not.." chu eng a sawi tumna nge phei chu ka hre lova, a inchhir tak zet a ni tihnaah ka lo ngaihsak mai a. Miss ber pawh chu a english thiamin a daih tawh lo nge anmahni tawng (Malayalam ni tain ka hria) hian a rak zawt zawt bawk a, "Ila ila...teri..." tih vel ni ta berin ka hria, "Zawnga Zawng sen, Zawng douhle sen.." tih tluka tawngkam na chu a ni ngei ang! Sawma chu a dak awrh awrh a, a kun leh lawp lawp thin bawk a. Miss chuan a duhtawk mai dawn emaw tih hnuah kawngkhar lamah a hnukchhuak ta, corridor-ah hnuk phei zelin office lam a panpui ta. Keini ho lah chuan Lal Isua thil mak tih hmuh chaka an zui dul dul ang mai khan eng nge thleng zel tih hriat tumin kawngkhar leh tukverhah kan inhnawh a, pawn chhuak ngam chiah si lovin kawngka, tukverh leh ventilator te chu lu hlir hian a khat a ni ringawt mai!

Hnute khawih ka hriat tawh zawng zawngah chuan a la khawih fuh lo ber awm e, khawih fuh lo ber record a siam ngeiin ka ring! Last period zawh dawn tepah class a rawn luh leh chuan kan lo enthup a, kan lo nui deuh tha bawk a, zakhmel ang reng tak hian a rawn thu a. A hnua "A na em?" tia kan zawhna min chhan dan chu "Na nang aw..mahse, direct-a a zakkha rim min hnim tir reng kha a hrehawm ber" a la ti zui! He mi ni tlai atanga chawlhkar hnih chhung chu a fel vang pawh ni hauh lovin kan school classroom zawng zawng chu tlai tin rinawm takin a phiat fai ta ziah a, a habit mawi lo tak chu a sim hneh kher mai!

KA SIM PHAH HMAK MAI..
He ka thianpa chetsual azarah hian ka thil lo chin fo, mawi lo deuh deuh, bazar lun laia thiante lo nghah paha ding vung vung chunga hnapkhir lo kheuh mual mualte, mi zinga kap lo zen leh ngur ngur thinte, midang awm laia mawng leh kap bawr vel han hiah sut sutte leh ka thil chin tha lo leh mawi lo thil dang tam tak chu ka sim phah ta hmak mai.

Thil tih fo hi kan lo ti thang zel a, kan tih than hnu chuan mahni inhre miah lo hian kan lo ching dawk laka, habit-ah a lo chang mai thin! Thil tha lo leh mawi lo tih fo hi habit-a a chan hmaa stop hmak a tha khawp mai tih min zirtir chiang ve hlein ka hria.