I VANDUAINA CHU KA VANDUAINA..

"Duat, lo chhuak leh lawk teh"
"Tinge, engati nge aaa...?"
"Phone-ah chuan a sawi chi loh, lo chhuak lawk teh, vat..."
"Awle.."

Clinic pawnah chuan rilru hah hmel zet hian a vei tawn sek a. Clinic kawngkhar chu a rawn inhawng rawk a, nula hmeltha zet hi a rawn chhuakin mipa vei tawn sek chu a ngaihna hriat loh hmel zet hian a rawn en ha a. Chupa chuan engmah sawi lovin a banah a kai lawk a, midang awm lohna lamah a hruai hrang hmawk hmawk a. A chal a dawm vang vang a, rilru hah hmel zet hian a thaw hawk a, "Ih..hmm.. eng lo a nia..uhmm.." Nula chuan, "Eng maw i sawi ? Eng nge ni ta..?" a lo ti sek sek a. "Ka rilru a nuam thei thlawt lo, Pathian ka hlau ani, ka ti thei lo, a dik lo, nunna hi kan siam a ni lo, tual kan that tur a ni lo, anih nih kan ni mai ang, mahse, tual chu kan that tur a ni lo..."
tih pahin a bialnu chu a kai lawka, stepah chuan a kaithla ta dawr dawr a.

"Mahse..mahse.. engtin nge min tih dawn ? engtin nge ka awm ang.. min kal san dawn mi ?" a bialnu chuan a zawt thla mawlh mawlh a, a ni chuan engtin mah a chhang lo. Car kawngkhar chu a hawng a, a bialnu chuan eng emaw sawi tum hian a ka a ang zuauva, mahse, a ni chuan 'engmah sawi suh' tih nan a kungzungchal chuan a hmuiah a lo nawr bet vat a.

Kum thum dawn lai an lo inzui ve dun tawh a, buaina em em pawh nei lovin induhtawn em em in hun an hmang chho dun a. Zuala chuan Pathian zarah hna tha tak a hmuh tak avangin inneih mai a duh thu pawh a lo sawi tawh a, mahse, Mawitei chuan MA zawh ve phawt a duh avangin kum khat hnua innei turin an intiam dun kha a ni a. Mahse, vanduaina rapthlak chuan an chungah thla zarin Mawitei chuan pawngsual a tawk a, sualna zawng zawng lalpa Lucifera pawhin 'hei chu em em a' a tih turin a pawngsualtu chu a mangan thlabar lai ber pawha amah humtu tur leh a thlamuanpui tura a ngaih, ama putea ngei a ni tlat mai!

An inkawtah chuan car chu a tiding a, a bialnu mitah tak chuan rei vak lo a han en vang vang a, chumi hnuah muangchangin a dul lam chu a en leh a, "Duat, tunah hian ka pian a hnu lama a vawi khatna atan ka nu leh pate dawt chiang bang ka hrilh dawn. Inah kan lut dun anga, i naute pai kha ka fa a nih thu ka hrilh ang a, chuan, kan inneih theih dan tur kawng min siam sak turin ka dil nghal dawn a ni, engpawh thleng se, a tawp thlengin i lamah ka tang tlat dawn! I natna chu ka natna, i lawmna chu ka lawmna, i vanneihna chu ka vanneihna, I VANDUAINA CHU KA VANDUAINA tih ka thinlung takin ka pawm thlap e. Ka hmangaih che, i pumchhunga mi pawh nangmah ka hmangaih anga ka hmangaih theih nan Pathianin min pui ngei ang" tih pahin Mawitei kut chu a hmer a, a kut leh lamin a pum chu a chul sak a.

Mawitei mit atang chuan dan rual lohvin lawmna mittui a rawn sur zung zunga, engmah a sawi thei lo. A rilru chhungril chu lawm avangin a zuang tawr tawr a ni ber mai! A hma lawk khan nau tihtlak tumin clinic-ah an awm kha a ni a! A ngaihtuah zel a, pawngsual a tawh hnua tap zawih zawih chunga Zuala a hrilh dan te, chhungkaw mualpho ai chuan tiin tumah a hrilh ngam si lo, chutah a la rai zui! A rai thu chu an chhungte bulah pawh a hrilh hmain a mangang lutuk chuan Zuala a hrilh tawp kha a ni a. Zuala thinrim lutuk leh rilru na bawk si hmel te,"Min hrethiam la, naute hi ka tihtlak pui che ang a, se min rawn beisei tawh suh ang che, chu chiah chu kan inhmuh hnuhnung ber ni rawh se" Zuala'n a tih lai te a mitthlaah a rawn lang zut zut a. Mahse, hun rei lo te chhung lekin
engkim a danglam zo ta.

Tahna mittui chu lawmna mittuiin a thlak a, thenna thu chu damchhunga awmdun tura chhechhamna thuin a thlak dawn ta zawk si a!