KA THIANPA SANGA LEH SAM 118:8

"Pawisa pakhat mah ka nei tawh lo ania, rawn thawn vat rawh u" thinrim leh titau aw deuh mai hian Sanga chuan a ti bui bui a. "E... Mambawih, lungngai reng reng suh, Pathianin i mamawh engkim a hria a..." a tih mek lai chuan dawhtheih loh hmel zet hian, "Ka hria..ka hria, nitin zantin ka tawngtai ziah, rawn thawn vat ula ni mai" tih pah chuan phone chu a dah bur a, STD Booth atang chuan tum deuh chungin a chhuak nghal a.

Khang lai khan phone bill-te kha a va lo tam duh e aw ka ti thin. STD hmanga chhungte kan han biak khan, Rs 100 man te chu reiloteah a kal thuai mai thin kha a nia. Tunah chuan India ram chhunga midang biak nana Rs 100 man hmang tur chuan inbiak ve fe a ngai tawhin ka hria. Chhungte kha rang tak leh hmanhmawh takin kan han be zung zung a, kan mamawh leh kan duh kan sawi thuai thuai a,thil an sawi tam hlau takin leh an sawi zawh hma hmain kan duh kan sawi tawh chuan rang em emin kan kut leh lamin phone kan chelh a, leh lam hmangin phone kha kan hmet hlum thin kha a nia. Chutah, a rawn ri ta cher cher a, bill zat a rawn lang ta a. Rs 40 te a lo tlin chuan tam hi kan han ti thei em em khawp a. Chhungte kan be zo te te a, muangchangin Karhla D te kha lungrun thei ang berin kan han be leh thin kha ania, Rs 100 lek lekte chu reiloteah a kal zung zung mai a, tam kan ti ngai reng reng lo. Mahse, chhungte biak nana Rs 50 hman erawh kha chu na kan ti tlat!

Mizoten cellphone kan la hmelhriat tak tak hma, vai ho zingah erawh chuan 'sweeper' thlenga an hum tat tat tawh lai kha a ni a.Tun lai anga ATM, Bank transactions leh Money transfer tih vel a la awlsam si lova, Dâk (Post) emaw MO (Money Order) a inthawn kha a la ni hrih mai a, chu chu dakpu(Postman)in a rawn keng thin.

Ka la hriat reng chu thla tawp lamah phei chuan kan 'broke' tlang tawh thin bawk a, 'broke' mai pawh ni lovin 'broken' kan ni tawh thin zawkin ka hria. Kan pawisa nei lo lutuk kha weekend-ah te chuan leng chhuak peih pawh hi kan awm lova, kan mu vel mai mai thin. Thla thar a lo ni a, tlai tin hi kan hostel bathlarah kan dak far a, Dak-Pu a lo kal em tih kha kan ngaihven thei em em thin. Thirsakawr nena a rawn tlan luh pap pap tawh hi chuan 'Ka pawisa a tel ve ang em' tiin kan phi buai chung tawh thin. Pawisa chah thleng hmasa apiang hian dinner ei turin chhuah an han tum nghal ngei bawk a, mi hausa tawntaw fapa ang mai hian kan hmang nghal hiau hiau thin. Keimahni phak tawkah kan han che na thei bawk a, kan pawisa neih loh a hriat tluk zetin kan pawisa neih hi a hriat theih thin khawp mai.

Ka thianpa Sanga pawh hi 'broke' ve thei deuh mai hi a ni a, chhungte hnena pawisa han ngen vel hi a tina ve thei thin khawp mai. A nu leh pa hi kohhran mi deuh an ni a, tawngtai turte hian an rawn chah ngun hle thin. A tirah chuan a ti ve ziah a, a rei deuh tak hnu chuan mut dawn tawngtai tak ngial pawh a peih mang tawh lo. A sawi dan phei chuan, "Zan mut dawn tawngtai tura ka'n maimitchhingte hi tum loh deuh hian, 'Aw Lalpa, chaw leh thil tinreng..' tih te hi ka lo sawi leh ringawt zel!" a ti a, kan nui dar dar thin.

Midang pawisa chu a rawn thleng vek tawh a, a ta a la rawn thleng ve thei si lo a, engtik lai pawh hian a tum deuh buau reng a, a huatthu sawi palh a hlauhawm thei thin khawp mai. Ka pawisa a puk a, a chhungte a han telephone a, an inbiak lai chuan a bulah chuan ka awm ve reng a. A nu leh pa chu a vin tuarh tuarh hi a ni ringawt a,"..in fapa hi riltamin thi mahila pawi inti lo a nih hi.."te a tih lai chuan ka nuih hi a lo za ru khawp mai a, a hmel enin nuih ngam a ni si lo! "..min hmangaih tak tak lo a nih hi.." te a tih phei chuan ka lo inhup tang tang a, ka insum zo lo thelh a ni. A nu chuan zaidam zet hian, "Mambawih, kan rawn thawn daih tawh alawm, a lo thleng ve dawn tawh ang" a rawn ti diai diai a, ani lah chuan, "Thleng dawn.. thleng dawn... tih a hun tawh lo, midang zawng zawng pawhin an dawng vek tawh! Hei, tunah pawh ka thianpa pawisa pukin ka rawn phone che u a nih hi, nangni pawh ni ula hrehawm in ti ve tho ang" te a la ti ta deuh deuh! A tawpah chuan tha deuhin an in mangtha thei ta hram a.

A tuk tlaiah chuan hostel bathlarah kan dak leh thap a, chutih lai tak chuan Dakpu chu a thirsakawr hman thiam ngei mai chuan a rawn inkhal lut leh ta pap pap a. Ka thianpa ka va en a, a hmel zawng zawng chu a nui fai vek hian ka hria, a phur hmel lutuk chu, 'Chhei raw pip..Hai ro..hai ro'! A hma zawnga tum hmur reng kha tunah chuan a ka pawh zen ila min seh lo ang tih tur khawpin a khi nasa ta mai a. Mahse, vanduaithlak takin Dakpu chuan pawisa a rawn keng lova, 'parcel' ka thianpa Sanga ta tur erawh chu a rawn keng a. Sanga chu a lungawi lo nasa mai a, vai tawngin 'pawisa engmah i rawn keng lo maw?' tiin a han zawt vel thin, 'Nahi' tih bak chhanna a hmu thei der si lo. "I thil dawn chu a rit nalh mai a, thil tha tak an rawn thawn che a ni ngei ang" ka'n tih chuan phur zet hian ama room lamah kan tlan luh pui dun nghal a. Hmanhmawh zet hian a tuamna chu a pawtthler kawk kawk sawk sawk a, a beisei loh deuh maiin 'Bible' dum, hnum tle hlarh mai, zipper invuah thlap hi a lo ni a. Lehkha them hi a lo awm bawk a,"Sam 118:8 kha lo chhiar ang che aw" tih ringawt hi a inziak a. A meng khup deuh lap hian ka hria, khumah chuan a thu hnawk a, a tum leh ta vuau mai a.

Zanah chuan a chhungte chu ka'n han phone dun leh ta ngei a, a han hau ta hrep hrep mai a. Mahse, a nu leh pa chuan zaidam tak hian, "Mambawih, Bible chang chhiar tur kan tih kha i chhiar ta em?" an rawn ti a, ani lah chuan, "Chhiar chhiar chhiar, vawi 100 ka chhiar" a ti tun tun a. "Mambawih, Pathian hian engkim a ti thei tih i hriat kha, lo chhiar nawn leh rawh" an rawn ti dek dek a, "Ninawm, ka chhiar ka chhiar a, pawisa ka dawng chuang hlei nem!" tih pahin phone chu a dah tau leh ta hmak a, ka khawngaih ru ang reng khawp mai a. A khawngaih thlakawm ve lah tak a, duh zawng leh mamawh leina tur a neih loh chu thuhran, hostel fee pawh a pe thei si lova.

Kar khat a liam hnu chuan tuk khat chu zing karah hian ka room-ah a rawn tlan lut a, "Hei, tho teh, tho teh" tih pahin min rawn pawt nawk nawk a, "Thil tha deuh hrilh tur che ka nei ania" a rawn ti chul a. Ka tawng chhuah pawh nghak hman lovin, "Ka zak lutuk, ka zak lutuk" a'n ti a, "Mahse, nuam tak a ni" a'n ti leh ringawt a. Hrethiam lo fe hian ka lo en ringawt a, a hmelah chuan a thinlung chu lawmnain a khat tih ka hre thei nghal mai a. "Eng nge maw i sawi awm zia le ? Eng nge ni ta a zing kar karah ?" ka'n tih chuan, ani chuan, "Nia, hei min hriat pui vek tho a, ka rilru hah avangin zanah ka mu tha thei thin lo kha a ni a. Rei tak tak ka inngaihtuah thin a, mahni ka inkhawngaih em em thin. Ka inngaihtuah fuh chang phei chuan ka mittui a tla hial thin. Nizan chu engati teh reng nge maw ni, ka rilruah ka nute Bible chang min rawn thawn kha a lang tlat mai a. Khumah muhil thei lovin ka let ka let a, tukin khawvar hnaih tawh lamah khan Bible an rawn thawn kha ka suitcase atangin ka va la chhuak a. Sam 118:8 ka'n keu chiah mai chuh ka phu nasa kher asin aw...!!" a tih lai chuan, "Tinge? Enga ti maw i phut kher a ?" tiin ka lo zawt sek sek a.

"Pawisa an rawn thawn kha, kha Bible chang karah khan an lo inzep reng alawm" a ti ta mai a.

(Bible pum puia bung(chapter) lai ber chu sam 118-na hi a ni a, Bible-a chang(verse) lai ber chu Sam 118:8 a ni. Bible bung lai ber leh chang lai berah chuang eng nge chuang i han en dawn ang hmiang :

" Mihring rin ai chuan
LALPA-a rinna nghah hi a tha zawk a ni" )