NULA RIM LEH VAWK RAWH (humour)

SMS DUHAWM CHU...

"Boih, nktk cu kymh cauhin inah om don, lo leg roh o"

Ka chhiar zo a, ka chhiar nawn leh thin. Ka phur lutuk chu ka zang ta durh hian ka inhre hial a. Thla thum vel lai chu kan inzui ve tawh nangin an inah vawi khat mah ka la leng ngai lova. Ka len chak loh vang pawh ni hauh lovin school naupang mai kan la nih dun avangin school leh pawn lama inhmuh bak chu tih ngaihna vak pawh kan hre lova. A nu leh pate hian an khuahkhirh hneh hle a, inleng neih chu sawi loh, zantin deuh thaw hian an unau lehkhazir chu an la inthutpui chhawk thin a. Ngaihzawng tih lamah ngat phei chuan a pa hi 'ham sitrik' vet vet tak a ni. A nu leh pa hriat laiin phone-ah pawh min be ngam lo kha a ni a, ka tan chuan len ngaihna a awm lo hrim hrim a ni.

Zingah chuan ka phur tawh lutuk vang nge ni, hma zetah ka harh hlawl mai a. Ka tho chhuak nghal zawt a, zai rut rut chungin bathroom lam chu ka pan nghal a. Tuk dang chu nise delhhlum sa ei tum ang hrimin rizai ka la sin tha sauh sauh ang a,chung hunte chu zanlaiah ka la chantir awm si a! Anih loh leh chawei dawnah vawi 10 chuang thinrim tun chungin ka chhungten min rawn kai tho leh tawh ang chu! Mahse, tukin chu a nuam tlat! Future a bright em alawm!

Bathroom atanga ka chhuah hnu chuan "Gud mrnig, Duat...." tiin message sei fe mai ka thiam ang tawka thlum chu ka'n thawn a. Ka phur tawh lutuk chu awm ngaihna pawh ka hre lo, ka phi cheng mai a. Tihtur tulte chu ka zawng sek a, hmunte ka phiat thul! Nidanga thil tul ti peih ngai lo leh chhungten 'hei lo ti ve teh' an tih pawha phun nuah nuah thin kha, bathroom-te chu ka va sil suah suah a! Chhungte lah chuan mak min ti nasa mai a, "I mumang a va fuh awm ve.." an tih loh leh "I piangthar a ni maw.." tiin min fiam sek a, kei lah chuan ka rilru te tein "In hre ve der mai si lovah!" tih pahin ka thinlung chhung chu a nui ver ver mai si a.

CHHURA A AWM TA LO VE...
"A nu leh a pa an chhuak chiah, lo kal tawh rawh" a rawn tih takah chuan rang mang khengin ka bike ka start a, ka thleng phei ve chawpchilh nghal mai a. Chawei thleng a lo sil rak rak a, hnung lam atang chuan ka va kuah vei thuak thuak a. "Lo thu rawh, TV kha lo en la, hei ka sil zo tep" a ti a. Kei chuan, "Hmanhmawh thlak hleihnem, nileng kan nei lawm" tih vel ham ham pah chuan an TV te chu a neitupa ber ang maiin ka va on vel pawp pawp bawk a.

Midang tumah an awm lo tih ka chiang bawk a, intithu ber niawm fahran hian thleng a sil lai chuan ka pheikhawk leh mawza ka hlip sauh sauh a, an sofa-ah chuan tlangnel zet hian ka mu zar a. Thatchhe deuha lo mu kawi vel chung chuan TV channel vel chu ka lo thlak kual vei pup pup bawk a. Ka lo ti ring deuh aniang, "A ring lutuk, ti zawi deuh rawh" tih pahin ka bulah chuan a rawn thu nghal a.

Nuam hi ka'n ti mai mai khawp a, ka ke chu a mal chungah chuan ka hlang a, confi zet leh thlamuang em em hian ka mu ar bawk a! Inti zei fahran hian muchung chuan ka lamah ka pawt hnai a, a lo tang der ve a. A aia nain ka'n pawt leh vak a, a rawn kun hnai a. A hmui sen no chek duhawm em em maiah chuan ei zawh vek pawh hnial lo leh duham em emin fawh ka tum chiah a,ngaiteh, thawm a rawn awm tlat!

I NUNNA ATAN TLAN CHHE RAWH...

An step chu a rawn ri ta khauh khauh mai a. Chu pui! Kan mengphawk nasa dun kher mai! "Chaw hmeh zuar aniang" tih pahin a va tho a. Kawngkhar chu zimte hian a va hawng de de a, chutah le! thlahrang hmu ang maiin a rawn tlan let, mel tam tak ke a tlan tawh ang mai hian a rawn thaw huam huam a, "A pa.. a pa ..a pa, biru nghal rawh" a rawn ti ta mai aleh! Ka tho rang kher mai! 'I nunna atang tlan chhe rawh' tih thupek khauh zet mai hmu ang maiin ka pheikhawk pawh ka bun hman tawh lo,ka khai lawp a, frigde phenah chuan ka va biru ta ringawt a!

Ani chu a rawn tlan phei a, ngawi reng hian ka kutah a la lawk a, a room lamah chuan min kai ta dawr dawr mai a. Bihrukna tur kan zawng a, a awm mai si lo! Chutah a khum hnuaiah chuan vah luh ka tuma, a lo hniam em kher a, ka lut leng ta aw zawng lo mai! Kawngkhar inhawng ri a ri ta rawk mai a. Tih ngaihna dang awm tawh hek lo le, a khum chu a chawi kang a, ka vak lut ta a. Suitcase leh eng eng emaw an hnawh luh avang chuan a chep em em mai bawk si! "Mate, khawnge i awm?" a rawn tih lung lung takah
chuan ani chu rang zet hian room atang chuan a tlanchhuak leh ta a.

An inbe thawm chu ka hre thei a, mahse, eng ber nge an sawi ka hre pha lova. Khum hnuaiah chuan ka bawk phek thlar a, ka kut dinglam chuan ka pheikhawk chu ka hum ran bawk a. A chhuak leh mai tura ka ngaih chu a rei ta phian mai a, ka awm leh ka khup ruh te chu a rawn kham tan ta a, a chep em avangin ka inlet thei der mai si lova. Che thei pawh ni ila, ka che ngam kher awm love. Ka tawmna ka ning tawh lutuk leh hlauthawng bawk si chuan, a pa chu ka rilru hian "Chhuak rawh, chhuak rawh" a lo ti mawlh mawlh a. Ka thinlung chhungril chuan a lo namchhuak nawk nawk reng tawh a!

KHUM HNUAI ATANGIN RILRU TAWNGTAINA NEN...
Chu le, ke pen thawm a ri ta tlauh tlauh mai! Room lam a rawn pan a ni ngei ang! Lungphu chu a rang duh hle mai a, a su dup dup hian ka hria. Ka sana chek ri te chu tuboha thil chhut ri tluk tluk ang maia ring ni hian ka hre hial a. Thawk pawh thaw tha ngam mang lovin ka lo ip fan fan a, chutah le, ka hrawk a rawn za ta thut mai! Ka khuh a rawn chhuak ta, ka khuh ka hlau lutuk chu ka kut lehlamin ka hmui ka hup ta ringawt mai a, ka hrawk lah chu a za ngang mai si a, khuh loh chuan a reh dawn hauh lo mai tih tur hian a rawn za ter ter mai a! Ka hmui chu ka kut vei lamin ka hup ngat ngat a, ka hnar hmangin khuh thei hlauh ila ka ti ngei mai! Ka rilruin ka tawngtai mawlh mawlh a, chung lam hnenah ka hrawkza ti reh turin ka dil nasa kher mai. Hemi tum tluka ka tawngtaina ka tih tak kha a tam kher awm love, ka mangang em a ni! Ka ngaihtuah miah loh laiin ka hrawk za chu a lo reh ve daih mai bawk a, a mak ve mai mai khawp mai!

Ka mitthlaah chuan tun kum tir vela Sandra-i ka star laia a bula ka khuh puah pawp kha a rawn lang a. Ka star tih ka thianten an lo hrilh tawh si, min duh ve nge min ngei zawk tih pawh ka hriat loh laiin tum lawk loh deuh hian kan school bang chu city bus-ah kan thu dun ta tlat mai a. Ka thiante pahnih hi kan hnung chiahah hian an thu dun bawk a. Sandra-i chuan pangai tak hian min han be ve a, chhan ka tum apiang hian ka hrawk hi a rawn za a, ka khuh puak dawn tlata ka hriat avang hian chhang lovin ka ngawi ta reng a. A chhukna hmun tur kan thleng tep tawh tihah chuan "I va'n in duh em em!" a tih takah chuan ka inthiam lo lutuk chu, chhan ka tum, ka ka ka ang dawn chiah tihah chuan inrinna hman pawh awm hlek lo hian a rawn puak ta thuai mai a! Ka hnunga ka thiante pahnih chu an lo nui khek nasa kher mai! Midangho pawh chuan min rawn en deuh thup a, min rawn nuih deuh thu bawk lehnghal a! Zah avangin lu a chhum ngai love tih chu tih mai mai ni hian ka hre hial a, thla neiha, thlawh bo daih ka va han chak
tak em!

"Tunah ama khum hnuaiah nge ka biru chu a ni si a" tia ka ngaihtuah mek lai chuan room kawngka chu a rawn inhawng ri rak a. Ka phu zawk a, mahse, ke ka va hmuh chu amah ani tih ka hriat chuan ka thla a muang leh nghal a. A rawn kun vak a, min rawn bih a, zawite hian, "File a theinghilh a, kan zawng char char a, kan la hmu lo a" a rawn ti mai chuh! Ka thin a rim kher mai, khum hnuai chep zetah chuan taksa kham thumin thawk pawh thaw tha ngam lovin ka tawm ngawt ngawt tawh a, "A chhuak leh tawh" a rawn ti dawn amaw tih nakalaiin! Ka awm, ka dul leh khup vel chu a kham tawh em avangin ka kutin khum chu chawikang turin ka signal a, a chawikan lai chuan ka inlet a, zangthal zawngin ka mu leh ta thung a, ani pawh chu a chhuak ve leh ta a.

Rei fe hnuah chuan a rawn lut leh a,beisei takin a rawn kun chu ka lo en a, ka lo nghakhlel tawh bawk a, a hmeltha sawt hian ka hre bawk a. "'Ka tlai tawh em mai, office chu ka kal tawh lo law law mai ang' a ti a, engtin nge niang?" a rawn ti leh ta mai a, ka zawi nghal vek hian ka hria. Ka dream zawng zawng chu vawilehkhata thlipuiin rapin a chhem thlu rup ang mai hian a chhe ta rup hian ka hria a.

Chhan pawh ka chhan hmain "Tikhan, lo awm leh lawk rawh" tih nan a kutin min signal a, a chhuak leh ta nghal daih a. Lo leng malek ila tha tur ania! A pa kher kher pawh chu a, eng vanga file theihnghilh kher kher nge maw a nih chu le!?? A va han hmelchhiat thlak tak! A mawl em mai a dam rei lovang ti tein a pa chu ka rilruin ka lo hau ve mawlh mawlh a! Vawikhat mah ka leng leh tawh ngai lovang te ka ti rilru thul!

PRISON BREAK OOPS... KHUM HNUAI BREAK!
Reilote hnuah chuan a rawn let leh vat a,"Ka Duati" chuan khum chu zo leh zo lo hian a rawn chawi ta ting ting a, "Lo chhuak vat rawh, hmanhmawh rawh, mawh..vat vat" a rawn ti chung chung bawk a. Rang fahran hian ka chhuak a. "Bathroom-ah a lut a, a lo chhuah leh hmain tlanchhuak vat rawh" a ti sawt sawt bawk a. Sitting roomah chuan thawm dim thei ang berin dindihlip ai ai chungin ka kal phei a.

Pheikhawk bun tuma ka mawza ka'n phawrh chu 'Ka Duati' chuan ka kut leh ka pheikhawk chu hmanhmawh em em hian a rawn tham khawm rawk rawk a, "Nakinah bun mai rawh..." tih pahin min nam nawk nawk a. Chutih lai tak chuan, Bathroom kawngkhar a rawn ri rawk a, a rang a rangin ka pheikhawk chu ka khai lawk a,
hmanhmawh em em chuan ke lawngin ka tlan chhuak ta a.

Ka bike awmna ka zuk thleng a, ka hmanhmawh em avangin ka mawza pawh chu bun hmanin ka inhre lova, ka ipteah ka ak lawk a, pheikhawk chu a hangin ka bun mawlh mawlh a. Ka bun lai chuan 'Min lo hmu reng mai ang a' tia ngaihtuah chung chuan an in lam chu ka hawi let zak zak bawk a. Rang takin ka bike-ah ka zuang kai a, hawilet hauh lovin chak fahran hian ka tlan liam ta nghal a.

'Chun leh zuate chu doral iangin hrang mahse.." tih hla kha inhmeh ta bik em em hian ka inhria a, hrehawm hle mahse romantic ta riau hian ka hre bawk a. Kalkawnga ka tlan laite chuan 'Romeo' ang ta riau te hian ka inhre hial a, ani 'Juliet-i'! Mak tak maiin khatiang teh hrepa awm e ti lo chuan ka rilru chuan leng hlawhtling ka inti hle mai a! Kan inkarte chu a 'sweet' ta sawt hian ka hre hial a ni.

BREAK TAK TAK !!!!
Kum hnih zet tluang taka kan nih hnu chuan zan khat chu...

"Min rawn tibuai tawh suh, midang ka nei tawh"

"Duat, eng nge tih sual ka neih ? I pawi ka lo sawi anih chuan min ngaidam hram rawh" tah aw deuh tuauin ka sawi chhuak thei hram a.

"Chutiang engmah a awm lo. Min hrethiam la, khawngaih takin min rawn contact tawh suh" tih pahin a phone a dah hmak a.. tuuuut tuuuuuuut...

Ka tawt up up a, ka kawchhung a rawn sa hut hut hian ka hre bawk a. A number 'Muah' tia ka save chu ka dial a, a 'ring' tawp thak a. Ka dial nawn leh a, a ring tawp leh ta tho a. Ka dial a, ka dial nawn leh a, ka dial zel a, vawi 10 vel ka dial hnu chuan, hmeichhe aw puam tel tawlh hian 'The number you....has been switched off!' rawn ti ta tawlh tawlh mai chu, a tawp chiang kher asin! Ka tho hluai a, ka thu leh a. Choka lamah chuan ka va phei ringawt a, ka pindanah ka let leh a. Chhungte an mu vek tawh bawk sia, thawm dim ngai bawk si, chuti ni lo se chu kut han vai pawp paw a, 'hui ham' duai duai hi ka duh a. Veranda lamah ka va chhuak leh ringawt a, thlifim rawn thaw heuh heuh mai maite chuan ka rilru a ti na em em ringawt mai a. Reiloteah ka pindanah lutin ka va mu ta ringawt a.

Khumah chuan ka let ka let a, ka thaw leh hawk thin. Duat em ema a hmui no chek mai ka lo fawh thinte chu midang ta a ni tawh mai dawn si! Ka ta ni tawh ang maia intineitu taka ka lo kuah thinte chu midangin duhtawkin an rawn kuah tawh dawn si! Ka thinlung chu chemte lu zum taka vih ngar ngar ang hian a na a, a la kar zui hi a ni ber mai! Ngaihtuah lo ka tum pawhin mitthlaah khawlaia induh taka kan inkaih dat dat laite chu a rawn lang a, an ina ka leng, ka haw dawn a, an step tawpa rei tak inthlah hlei thei lova kan din dun reng thin laite kha a rawn lang zut zut bawk a. Kan lo kal dun tawhna hmun zawng zawngte leh kan awm dun thin dan zawng zawngte chu ka hmaah chuan a rawn inlan zut zut a, kei aia a thlan zawk nen chuan an awm dun ve leh dan tur nitein ka dawn a, ka rilru na lutuk chu ka hriatloh karin biangah mittui a rawn far ta fap fap a. Tum loh deuhin ka insut ri ta hruih hruih mai a, mipa hi mipa nih a va har em! 'Dam chhan ka nei ta love' tiin ka rilru ka siam a, intihhlum hial duh khawpa ngaihtuahna sual chuan min hneh ta hle mai a.

A INREM THLAWT LO...
Chutia rilru na em ema khuma ka let ka let chu engtin tin emaw khawvar hnaih lamah chuan ka lo muhil ve ni ngei tur a ni, "Mama, tho rawh.. tho rawh.." tih hi ka hria a. Ka mut a la chhuah em avangin ka ngaihsak peih lova, ka muhil zui leh mai a. Reiloteah vin zet hian, "Vanlalpiang, tho rawh ka tih chuuu..." tih pahin ka pa chuan ka rizai sin lai chu a rawn theh hlim pawp a, ka harh nghal kawk hian ka hria. Ka'n meng chu ka pa hi khum bulah chuan hnathawh kawr nen a lo ding reng a, 'enga tinge tun ang zing lutukah te min rawn kaih thawh le..?' tia ka ngaihtuah lai tak chuan ka hre chhuak ta zawk a. 'Eeeee.... vawk talh tur kan nei tak!'

Mut kham lo leh phak em emin meng chiang mang hlei lovin bathroom lam panin ka kal pai phei dawt dawt a. Ka inphih fai hnu chuan ka thawmhnaw zinga chhe ber, vawk thisen leh bal reh thei lo pawh kai se, paih nghal mai uihawm loh tur chu ka inbel a, ka va phur lo teh lul em!

Rilru na em em chunga vawk kan han rawh te chu a va inhmeh lovin a va han hrehawm thuahhnih tak em ve aw...! Thinlung hliam, rilru nâ, mut kham bawk si lo, mood off 'quit' thak leh vawk rawhna meichher han ken khuk luai luaite a inrem thlawt lo! Chemkawma hmanhmawh fahrana meichherin min hliau palh hlau tak chunga vawk hmul kan han ziat thlan hlup hlupte chu a va han in 'matching' lo ngai em! Mittui nen, hnap tui nen, thlan tui nen vawk ut dum thual chu kan vir kual chhen maite chu a hrehawm dan a thuahthip tlat ni berin ka hria!

Thinlung kehsawm rilru nâ, hmangaihna vanduai avanga mutmu pawh tuah thei lo kha, vawk sum ruk dawn lai mai, a bung mawng lam ka pa nena kawng chho zim tak, kawi zing zet mai, rem leh rem lova kan han zawn dun te chu a va han inrem lo lulai tak em! Ka hmangaih berin midang min neih san ta tih avanga beidawng taka awm lai leh inawhhlum mai pawh hnial loh laia vawk pum phel rit tak mai, sa chu ni lo sela kan zo hauh lovang tih mai tur, kawng chho bakbahai tak maia ka pa nena tanhmun inthlak tawn zak zaka kan han zawn chho dun mai chu tah hi a va chhuak duh tak em!

"Tunah chuan damchhan ka nei ta love" tia inchung sang atanga zuan thlak mai duh khawpa rilru nâ leh beidawnna ruama luh lai leh mittuiin mipa pawh a thliar love tia thinlung kehsawma ka awm laia vawk rawh a lo ngai kher kher kha chu aw...!!!! "Dam hian awm zia reng a nei ta love, ka damchhan ka luah zo lo" tia ka khawvel a thim mup nia ka hriat lai taka kan vawk palian kan han talh mai kha chuan suangtuahna khawvel (Fantasy World) atangin khawvel tak tak (Reality World) -ah min va hruai lut chiang em!

MALSAWMNA VAWK
Amah kha ka engkim emaw tiin ka thil neih zawng zawng a tan ka hlan a, ka hun hlu tak chu amah milin ka siam rem bawk thin kha a ni a. Amah chu ka damchhan emaw tiin zing ka thawh atanga zan ka mut thlengin ka rilru leh thinlung zawng zawng a nei a, amah chu ka khawvel a ni tawp mai.

Mahse, tunah chuan khawvel a lo zau zia leh midangte tana malsawmna ni tura Pathianin min duan ang ngeia thil tha tih tur lo tam ziate chu ka va hre tlai teuh em! Amah kha engkim ni lovin nun ti famkimtu thil tam tak zinga thil pawimawh tak pakhat chauh mai a lo ni reng tih he kan vawk palian hian min hriattir ve tlat a nih chu! Ka mihring pui tu emaw kha ka damchhan emaw tiin nun hi hlimna hlira khat tura ngai chungin suangtuahna khawvel (Fantasy World)ah ka lo cheng thin a, vanneihthlak takin kha vawk kan rawh khan khawvel dik tak (Reality World) ah min hnuk lutin ka damchhan dik tak zawk, min Siamtu Pathianah chuan a lo ni reng zawk tih hre turin ka at ber laiin 'VAWK RAWH' chu REALITY CHECKS -ah a rawn tang ta hlauh hi ka va lawm em!

MALSAWMNA VAWK ka ti lo thei lo...